Eclesiastés 8 - Qullan Arunaca

1¿Qhitis yatiñanimpi chicachasispajja? ¿Qhitis take jacañjjata khanañchaspajja? Yatiñ cancañajj jaken ajanupjja khantayiwa, khoru ajanupsa koñaptayaraquiwa.

Reyir ist'añjjata

2Reyin arsutapjja phokhätawa, uqham phokhañataquiw juramentompi arstajja Diosan nayrakatapana.

3Jupan nayrakatapatjja jan mäqui sarjjamti. Jan walinacarusti jan mantamti, jupasti cuntï muncani ucwa lurani.

4Reyin arupajj jach'a cancaña aruwa, ucatsti, ¿qhitis saspa: “Cuns lurta” sasajja?

5Qhititejj mä arsuta phokhasqui ucarojja janiw cuna jan walis pascaniti, ucatsti qhititejj yatiñanïqui ucajja yatiwa cunapacha, cunjäma phokhañsa.

6Chekpachansa, take cuna lurañataquisa utjiwa mä horasa, uqhamarac cunjäma lurañataquisa, ucampis jaken mä jan walt'añapaw utji;

7jakejj janiw yatisquiti cunatejj jupar pascani uca, janiraquiw qhitis utjquiti jupar nayrakata yatiyirejja.

Jiwañjjarus jacañjjarus janiw qhitis ch'amanïquiti

8Jacaña catjjäsiñataquejja janiw qhiti ch'amanis utjquiti, jiwañjjarus janiw qhiti ch'amanis utjcaraquiti. Janiw qhitis jaltcaspati uca nuwasïwitjja. Ñankha jakerusti janiraquiw jan wali luratapasa khespiycaspati.

9Take acanacwa uñjta aca orakena cunanacatejj lurasqui ucanac uñt'añaru uchasta ucqhajja, uqhamarac jaken ch'amanïtapsa masinacaparu jan walinac lurañataquisa.

Cunatejj inamayäqui ucanacjjata

10Uñjaractwa, ñankha jakeru qhititejj kollan chekata jithektasa sarnakqui ucaru, jakenacajj wali jach'añchäwimpiw imapjje jiwäwipana; ucatsti cawqui marcantejj jan walinaca lurcäna ucanacjja, janiw qhitis ucatjja amtcjjeti. Acasti inamayaquiwa.

11Jan wali luratanacapata jan jucha uñt'ayatajja, jakenacarojj jan walinaca luraña juc'amp yatichi.

12Uqhamasti jucharar jakejj walja cuti juchanaca lurcasasa, walja maranacawa jacascaraqui. (Nayajj yatiraquïyätwa, qhitinacatejj Diosar jach'añchapqui, uqhamarac ajjsarapqui ucanacajj sumaqui jacasipjjatapa.

13Ucampis jucharar jakenacataquejj jan waliw jupanacatac utji, uqhamarac jacañanacapas mä ch'iwjamaw mäqui pasawayi Diosar jan ajjsartapjjatap laycu.)

14Uqhamaw aca orakenjja inamayaqui asqui jakenacajja t'akhesipjje jucharar jan wali jakenacäcaspas uqhama, ucatsti jucharar jakenacasti cusisipjjaraquiwa asqui jakenacäcaspasa uqhama. Nayajj sistwa:

—¡Acajj inamayaquiwa! —sasa.

15Ucatwa nayajj sista:

—Cusisiñajj utjpan —sasa. Aca orakenjja jaketaquejj asquiwa mank'añanaca, umañanaca, uqhamarac cusisiñanaca. Ucaquiw jaketaquejj utji irnakatapatjja, Diosajj aca oraken jacañ churqui uca urunacapana.

16-17Aca orakena take cunatejj lurasqui ucanaca yatekañaru, yatiñaru, uñjañaru uchasta ucqhajja juc'ampiwa amuyasta, jakejj janiw amuyt'caspati Diosajj lurqui ucatjja, aca oraken cunanacatejj lurasqui ucatsa, maynejja uruy arumasa jan icthapisa thakascpan. Jakejj wali ch'amanacsa tucchini ucasa, janiw yatjjatcaspati; yatiñan jakejj “Yattwa” sischinisa, chekpachansa janiw jicjjatañataqui ch'amanïcänti.