2 Reyes 8 - Qullan Arunaca

Sunem chekanquir warmejja yänacap wasta catusjje

1Eliseosti parlänwa cawquïr warmin wawaptï jiwatata jacatataycäna uca warmiru, aqham sasa: “Jumajj familiamampi yakha chekaru jaquir sarjjam, Tatitojj yatiyituwa: Aca orakenjja mach'awa utjani pakallk mara” sasa.

2Warmisti wact'ayasisinjja luränwa cuntï profetajj amuyt'aycäna uqhamaru. Jupasti familiapampejj sarjjänwa filisteonacan orakeparu, ucanwa pakallk mara jacañataqui kheparäna.

3Uca pakallk mara pasatatsti uca warmejj filisteonacan orakepatjja cutt'anjjänwa, ucatsti reyin ucaruw saräna utapa orakenacapa cutt'ayasjjañataqui.

4Reyisti profeta Eliseon Giezi uywatapampiw parlascäna, reyisti juparojj mayïnwa take muspharcañanactï Eliseojj lurcäna ucanac yatiyañapataqui.

5Giezi chachajj reyirojj parlascänwa cunjämtï Eliseojj mä warmin wawapar jactaycäna, uca pachpa horasanwa uca warmejj reyin ucar purinïna, uta, orakenacapa cutsuyasjjañataqui. Ucatsti Giezi chachajj reyirojj sänwa:

“Rey, acapï uca warmejja, uqhamarac acaraquiw uca wawapajja qhitirutejj Eliseojj jactaycäna ucajja” sasa.

6Reyisti warmirojj jisct'änwa, ucatsti jupajj take jacäwipwa yatiyäna. Ucjjarojja reyejj wali suma uñt'ata oficialaparojj sänwa: “Jumajj cutt'ayanjjam aca warmiru take cunanacapatï jupancqui ucanaca, uqhamarac take cunanactejj orakenacapajj achcäna ucanaca, jupajj mistcäna ucqhata jichhacama” sasa.

Hazael chachajj Siria marcan reyipawa

7Eliseosti ucatjja Damasco marcaruwa saräna. Uca urunacansti Siria marcana Ben-adad sat reyipaw usutäscäna, ucatwa yatiyapjjäna profetan purinitapa.

8Ucatsti reyejj Hazael chacharojj sänwa:

“Mä wajjt'äwi apjjarusiwayasajj profetan ucaru saram. Ucatjja Tatitur jisct'ayanirapita: ‘¿Aca usutjja waliptiristti, janicha?’ ” —sasa.

9Hazael chachasti profetan ucaruw saräna, Damasco marcana cuna suma yänacatejj utjcäna ucanacat wajjt'añatac apjjarusiwayasa, pusi tunca camellonacaru qhumuntata. Jupan nayrakataparu purisinsti sänwa:

—Siria marcana Ben-adad reyiw qhitanitu, qhititejj jumarojj mä awquirjama uñt'astam uca, usupata waliptaniti, janicha uc jisct'añataqui —sasa.

10Eliseosti ucjjarojj sänwa:

—Saram, ucatsti sanim: ‘Usupatjja waliptaniwa’ sasa, ucampis Tatitojj yatiyituwa: ‘Cunjämatsa jiwapuniniwa’ —sasa.

11Acatjamatwa Eliseojj Hazael chacharojj wali uñcatäna jaypacha uca chachar llaquisiyañcama. Ucatjja profetajj jachañaruwa uscusïna.

12Ucat Hazael chachajj juparojj jisct'änwa:

—¿Cunatsa, tata, jachtajja? —sasa.

Eliseosti ucjjarojj sänwa:

—Nayajj yattwa, jumajj jan walwa israelitanacaru lurätajja uca, nuwasiñataqui lurat utanacapjja ninampiwa naqhantayäta, ucanquir waynanacarojj espadampcamaw jiwarayäta, jisc'a wawanacarusti jiwayaraquiquïtawa, uqhamarac usur jake warminacarusti puracanacapwa jist'jaraquïtajja ucanac yatisaw jachta —sasa.

13Ucjjarusti Hazael chachajj sänwa:

—¡Nayasti janiw cunäctsa, jan ucasti mä anjamaquïtwa! ¿Cunjämaraqui ucsti luririststi? —sasa.

Ucjjarusti Eliseojj saraquïnwa:

—Tatituw nayar yatiyitu jumana Siria marcana reyïñama —sasa.

14Hazael chachajj Eliseon ucatjja sarawayjjänwa, ucatsti reyipan ucaruw purjjäna. Reyisti juparojj jisct'änwa:

—¿Camstamsa Eliseojja? —sasa.

Hazael chachasti juparojj sänwa:

—Nayarojj yatiyituwa jumajj usumatjja waliptjjätawa —sasa.

15Ucatsti uca khepürojj Hazael chachajj sarasinjja, mä isi umar chilltasinwa reyin ajanupata tapjjatäna, uqhamatwa reyejj jiwjjäna. Ucat ucjjarusti Hazael chachaw reyëjjäna jupa lanti.

Judá marcan Joram chachan reyïtapa(2 Cr 21.1-20)

16Israel marcana Acab sat chachan Joram yokapajj pheska mara apnakascäna ucqhawa Judá marcana Josafat chachan Joram yokapajj apnakañ kalltäna.

17Jupasti quimsa tunca payani maranïnwa cunapachatï reyïña kalltcäna ucqhajja, ucatjja Jerusalenanjja quimsakallko maraw apnakäna.

18Ucampis jupajj sarnakänwa cunjämtï Israelan reyinacapajj sarnakapcäna uqhamaraqui, ucatsti Acab reyita sarakapqui ucanacan sarnakatapjamaraqui, warmipajj Acab castätap laycu, uqhamasti luratanacapajj jan walinacänwa Tatitun nayrakatapana.

19Ucampis Tatitojj janiw Judá marcaru tucjañ muncänti, David uywataparu qhuyapayasitap laycu. Juparusti Tatitojj arsünwa mä lamparjja nactatapuni jupan nayrakatapana jaytaña.

20Joram reyejj apnakascäna uca maranacanjja Edom marcajj Judá marcataquiw sayt'asjjäna, ucatsti jupa pachpaw reyipa utt'ayasïna.

21Ucatjja Joram reyejj saränwa Zaer sat chekaru take nuwasiñ carronacapampi, arumjaru sartasisinjja nuwasiñ carronacan capitananacapampiw sarapjjäna nuwantañataqui, muyuntapcäna uca edomitanacaru, ucatsti jaltayapjjänwa.

22Uqhamawa Edom marcajj Judá marcata khespiyat sarnakañapa jicjjatäna jichhürcama. Uqhamaraquiw qhä urunacanjja Libna marcajj khespita sarnakasiñjja jicjjataraquïna.

23Ucat ucjjaru Joram reyin sarnakäwipasa, uqhamarac take luratanacapasa kellkatäna Judá ucanquir reyinacan crónicas sat libropana.

24Cunapachatï Joram reyejj jiwjjäna ucqhajja, imt'jjapjjänwa Davidan Marcapana awquinacapamp chica. Ucjjarusti jupa lantejj reyëjjänwa Ocozías sat yokapa.

Judá marcan Ocozías chachan reyïtapa(2 Cr 22.1-6)

25Israel marcana Acab chachan Joram yokapajj tunca payan maranaca apnakcäna, ucqhawa Joram chachan Ocozías yokapajj Judá marcana reyïña kalltäna.

26Reyïña kalltcäna ucqhasti pä tunca payani maranïnwa, ucatsti Jerusalenanjja mä marawa apnakäna. Taycapasti Atalía satänwa, jupasti Israel marcan Omri sat reyit jutirïnwa.

27Ocozías reyisti Acab reyin sarnakäwipwa arcäna, uqhamarac mayni reyinacapjamaraqui, ucatjja Acab reyin familiapampi sumancatap laycusti, jupan luräwinacapajja jan walinacänwa Tatitun nayrakatapana.

28Ocozías reyisti Acab chachan Joram sat yokapampiwa mayachasïna Galaadanquir Ramot chekana Siria marcanquir Hazael sat reyimpi nuwasiñataqui. Ucampis sirio jakenacajja Joram reyirojj usuchjapjjänwa.

29Ucatsti Joram reyejj Jezreel chekaruwa cutt'jjäna. Jupasti cutt'anïnwa Ramotanquiri sirio jakenacajj nuwasïwin usuchjapcäna ucanac kollt'asiñataqui, uca nuwasïwisti Siria marcanquir Hazael reyimpïnwa. Ucatsti Ocozías reyejj Jezreel chekaruw saräna Joram chacharu uñjiri jupan usutätap laycu.