2 Reyes 17 - Qullan Arunaca

Samaria marcan aynacht'atapamp, Israel jakenacan preso apatapampi

1Cunapachatï Judänquir Acaz reyejj tunca payan mara apnakascäna ucqhawa Ela chachan Oseas yokapajj apnakaña kalltäna Israeljjaru, ucatsti Samaria marcanjja llätunca maraw apnakäna.

2Ucampis luratanacapajj jan walinacänwa Tatitun nayrakatapana, janisa sintïcchïna jupat nayra reyinacajj utjcäna Israel marcana uqhamajja.

3Ucatjja Oseas reyirojj Asirianquir Salmanasar sat reyiw jutasina nuwantäna; Oseasasti jupar jaysasajj impuestonacwa jupar pagäna.

4Ucampis Salmanasar reyejj catjänwa Oseas reyin jupataqui jan wali amtatapa, mä kawkha yatiyiri jakenaca Egiptonquir So sat reyin ucar qhitatapa, uqhamarus janiraquiw marpachata impuestonaca pagcaraquitaynati. Ucatsti Salmanasar reyejj sänwa: —Oseas reyiru catuntasina carcelaru uchapjjam —sasa.

5Ucatjja Salmanasar reyejj Judá orakpacharu mantasinwa Samaria marcar nuwantäna, uqhamsti quimsa maraw jan sayt'asa luräna.

6Ucjjarusti Oseas reyejj llätunca mara apnakascäna ucqhasti, Asirianquir reyiw Samaria marca catuntasïna, Israelit jakenacarusti preswa Asiria marcar apäna, ucatjja utjnokayänwa Habor orakenquiri Gozán sat jawira Halah sat chekaru, uqhamarac medonacan marcanacaparuraqui.

7Acasti lurasïnwa Israelit jakenacan Tatit Diosap contra jucha lurapjjatap laycu, qhititejj Egiptota apsuncäna faraón sat egiptonquir reyin amparapata khespiyasa. Jupanacasti yakha diosanacaruw yupaychapjjäna.

8Uqhamaraquiw lurapjjaraquïna cawquïr marcanacarutejj Tatitojj jakonuccäna jupanacan nayrakatapata ucanacan luräwinacapa, cunjämarutejj Israel reyinacan utt'ayatäcäna uqhamaruraquiw sarnakapjjaraquïna.

9Ucampisa israelit jakenacajj jan wali arunacwa arsupjjäna Tatit Diosapataqui, uqhamarus alto chekan yakha diosanacan santuarionacapwa take marcanacapan lurapjjäna, uqhamarac uñch'uquiña torrenacansa, nuwasiñatac lurat marcanacansa.

10Uqhamaraquiw sayt'ayapjjaraquïna ajjsarata kalanaca, Asera sat diosan lantinacapa take alto cheka kollunacana, uqhamarac walja laphini kokanacan cayunacaparuraqui.

11Ucsti jupanacajj lurapjjänwa cunjämatï yakha marcanacajj lurapjjerïqui uqhamaru; Tatitusti ucanacaruraquiw jupanacan nayrakatanacapatjja jakonucutayna. Israel jakenacasti inciensonacwa naqhayapjjäna, ñankha luräwinacwa lurapjjaraquïna, uqhamata Tatitur colerayasina.

12Jupanacasti yakha diosanacaruw yupaychapjjäna, uqham lurañatjja Tatitojj jupanacarojj sänwa: “Jumanacasti janiw yakha diosanacar yupaychapjjätati” sasa.

13Tatitusti Israelit jakenacarojj ewjjänwa take profetanaca qhitatanacap toke jan wali thaquinacapata cutjtanjjapjjañapataqui, cuntejj Tatitojj churcäna uca phokhapjjañapataqui camachi arunacaparu, uqhamarac take yatichäwinacata leyinaca churcäna nayra awquinacaparu sirvir profetanacap toke.

14Ucampis jupanacajj janiw ist'añ munapcänti, jan ucasti kala chuymaniw tucupjjäna nayra awquinacapjama, jupanacasti janiw Tatit Diosapar iyawsapcänti.

15Uqhamarac jupanacajj jisc'achapjjaraquïnwa leyinacaparu, uqhamarac nayra awquinacapampi suma parlt'äwiru mantapcäna ucanacsa, camachi arunaca jupanacar churatäcäna ucanacsa. Ucjjarusti inamaya yakha diosanacan khepapwa arcapjjäna. Ucatsti jupanacpachawa inamayaru puripjjäna, jupanacar muytqui uca maya marcanacar uñtata, Tatitojj ucanacatracwa ewjjawayäna: “Janiw jupanacjamajj lurätati” sasa.

16Tatit Diosapan camachi arunacapa apanucusasti, bronceta pä vaca kallu lurasipjjäna, mayasti Asera sat diosan lantipänwa, ucarusti yupaychapjjaraquïnwa, uqhamarac alajjpacha take warawaranacarusa, Baal diosarus yupaychapjjaraquïnwa.

17Uqhamaraquiw yokall, imill wawanacaparusa naqhantayapjjäna, ucatsti jupanacajj yatirinacaru, laykanacaruw jisct'asipjjäna, ucatjja Tatitun nayrakatapanjja jan wali lurañanacaruwa catuyasipjjäna, uqhamata jupar colerayasina.

18Ucatwa Tatitojj colerasïna Israel marcataquejja, ucatsti jupan nayrakatapatjja jakonucünwa, Judá tribu sapacwa jilt'ayäna.

19Ucampis Judá tribusa janiraquiquiwa Tatit Diosapana camachi arunacapjja phokcaraquiquïnti, jan ucasti israelitanacajj uñstayapcäna uca luräwinacaparuwa arcapjjaraquiquïna.

20Ucatsti Tatitojj jakonucünwa israelitanacata sarakeri take familianacaparu, jisc'ar tucuyañcama, lunthatanacan amparanacaparu catuyasina, jupan nayrakatapata jakonucuñcama.

21Israelarojj jaljtayänwa Davidan familiapata, ucatjja israelitanacajj Nabat chachan Jeroboam yokaparuwa reyit utt'ayasipjjäna, jupasti israelitanacarojj Tatitutjja saraktayänwa, sinti jucha lurañanacaru puriyasa.

22Uqhamawa israelitanacajj Jeroboam chachajj cawquïr juchanactï lurcäna uca pachpa juchanaca lurapjjaraquïna, ucatsti janiw uca juchanacjja apanucupcänti.

23Tucuyarusti Tatitojja jupan nayrakatapatjja apakänwa Israel marcaru, cunjämatï Tatitojj yatiycäna sirviri take profetanacap toke, ucatsti Israel marcajj Asiria marcaruwa preso apayatäna, ucanracwa jichhürcama jicjjatasisqui.

Samaria marcajj wasitat jakenëjje

24Asirianquiri reyisti jakenacwa apanïna israelitanac lanti Babiloniata, Cuta, Ava, Hamat, Sefarvaim uca marcanacata, ucatsti uchänwa Samaria marcaru. Uqhamatwa Samaria marca catuntasisina ucanacan jacapjjäna.

25Ucampis uca jakenacana jan Tatitur yupaychapjjatap laycojja, Tatitojj leonanacwa qhitanïna cunapachatï jupanacajj utjnoktapcäna ucqha, ucatjja leonanacajj mä yakhep jakenacarusti jiwayänwa.

26Ucatsti sarapjjänwa Asirianquiri reyiru yatiyiri aqham sasa: “Cawquïri jakenactejj Samaria marcanacaru apcta ucan jacapjjañapataqui ucanacajja, janiw yatipquiti uca orakenquir Diosan leyipa. Uqham jan yatipjjatap laycojja uca Diosajja leonanacwa qhitani, ucatsti jichhajj jiwarayasquiwa” sasa.

27Uqhamasti Asirianquir reyejja sänwa: “Preso apanitäqui ucanacat mä yakhep sacerdotenacaru qhitapjjam, jupanacajj sarasina yatichanipjjañapataqui uca orakenquir Diosan leyinacapa” sasa.

28Ucapachaw jupanacajj preso apanipcäna, ucat maynïri sacerdotewa sarasina Betel chekana utjnokäna, ucatjja Tatituru yupaychañwa yatichäna.

29Ucampis sapakat marcaw jupanacan pachpa diosapa lurasïna, cawqhantejj jacapcäna ucqhana, ucanacsti uchapjjänwa alto kollu patanacan santuarionacaparu, samaritano jakenacajj lurapcäna ucanacaru.

30Babilonianquir jakenacasti lurasipjjänwa Sucot-benot sat diosa; Cuta ucanquiri jakenacasti lurasipjjänwa Nergal sat yakha diosa, Hamat ucanquiristi Asima sat yakha diosaraqui.

31Ava ucanquiristi lurasipjjänwa Nibhaz, sat yakha diosa; uqhamarac Tartac sat yakha diosa, ucatsti Sefarvaim ucanquirinacasti wawanacapwa ninar naqhantayapjjäna Adramelec, uqhamarac Anamelec uca diosanacapar sacrificiona loktasina.

32Ucjjarusti Tatituruwa yupaychapjjäna, ucampis jupanac pachpatwa sacerdotenac utt'ayasipjjäna alto chekan diosanacan santuarionacapan sirvipjjañapataqui.

33Uqhamasti jupanacajj Tatiturus yupaychapcchïna ucasa, jupanacan yakha diosanacaparojj yupaychasipcaquïnwa, cawqha marcanacattï apanitäpcäna uca jupanacan luräwinacaparjama lurasina.

34Jichhürunsa lurasipcaquiwa cunjämtï nayrajj lurapcäna uqhama. Jupanacasti janiw Tatiturojj yupaychapquiti, leyinacaparjamasa ewjja arunacaparjamasa sarnakapquiti, yatichäwiparjamasa, camachi arunacaparjamasa phokhapquiti, ucanacsti Tatitojj churänwa Jacobon familiapana phokhapjjañapataqui, qhitirutejj Israel sasa sutichcäna ucaru.

35Cunapachatï Tatitojj jupanacampi suma parlt'äwiru mantcäna ucqhajja sänwa: “Janiw yakha diosanacar yupaychapjjätati, sirvipjjätasa sacrificionaca loktasina.

36Jan ucasti naya Tatit Diosamaruwa yupaychapjjetäta, qhititejj Egipto marcata apsunipctam wali jach'a ch'amampi. Naya saparuquiwa yupaychapjjetäta sacrificionaca loktasina.

37Ucjjarusti jan armt'asisa phokhapjjam leyinacajja, ewjja arunacajja, yatichäwinacajja, uqhamarac kellkata churapcsma uca camachi arunacajjsa, jan yakha diosanacarojj yupaychapjjamti.

38Janiraqui armasipjjamti jumanacampi suma parlt'äwiru mantatajja, janirac yakha diosanacarus yupaychapjjamti,

39jan ucasti naya Tatit Diosamaruqui yupaychapjjeta, nayasti ucatjja uñisirinacaman amparapatjja khespiyapjjämawa” sasa.

40Ucampis jupanacajj janiw ist'añ munapcänti, jan ucasti lurasipcaquïnwa nayra luräwinacapjama.

41Uqhamawa uca marcanacajj Tatitur yupaychapjjäna, uca pachpa horasanwa yakha diosanacarus yupaychasipcaquiraquïnwa. Uca jakenacat saraker wawanacapasti nayra awquinacapjamaraquiwa uca pachpa luräwinaca lurapjjaraquïna, jichhürcamasa uqhamjja lurasipcaquiwa.