Salmos 95 - Qullan Arunaca

Tatiturojj cusisiñamp k'ochupjjañäni

1Jutapjjam, Tatitur k'ochupjjañäni,

arjjatir khespiyirisar cusisit jayllipjjañäni;

2yuspagarañ chuymamp nayrakatapar mantapjjañäni,

phust'añanacamp chic jupar jallallapjjañäni.

3Tatitojj jach'a ch'aman Diosawa,

c'ari diosanacat sipan munañaniwa.

4Acapach mic'ay kollunacajj amparapanquiwa,

kollunacan ch'utunacapas jupanquiwa.

5Jach'a lamar kotajj jupanquiwa,

jupaw lamar kotarojj utjayi,

amparapampiw waña orak utjayaraqui.

6Jutapjjam, orakcam konkort'asipjjañäni;

Tatitun nayrakatapar quillt'asipjjañäni,

jupaw jiwasanacarojj irnokestu.

7Jupaw Diosasajja,

jiwasanacasti jupan awatit marcapäpjjtanwa,

jupan irpat ovej tamapäpjjaractanwa.

Tatitun arup jichhür ist'apjjam:

8“Meriba orakenjam chuymanacam jan kalarayasipjjamti,

Masah wasaranjam chuymanacam jan ch'ollkheptayapjjamti:

9nayra awquinacamajj luräwinacajj uñjcasasa,

nayarojj yant'apjjetänwa.

10Pusi tunc maraw qhä jakenacataquejj k'apisïyäta,

ucat säyäta: Aca marcajj wali pantjataw sarnake; ¡janiw arsutanacajjar jaysapquiti!, sasa.

11Ucat k'apisiñajjan juramento lurta:

Janiw samarañajjar mantapcaniti” sasa.