Proverbios 14 - Qullan Arunaca

1Yatiñan warmejj utapjja sumwa uñjasi,

ucampis jan amuyt'an warmejja pachpa amparapampiwa utaparojj tucji.

2Cheka sarnaker jakejj Tatituruw ajjsarti,

ucampis jan wali sarnaker jakejja jisc'achiwa.

3Jan amuyt'an jakejja jach'a jach'a tucuñampiwa parli;

yatiñan jaken arunacapasti arjjatañataquiwa.

4Yuntajj jan utjqui ucqhasti, trigojj pist'iwa;

yunta vacan ch'amapampiwa cosechajj juc'amp jiljjati.

5Cheka testigojj janiw c'arisquiti,

ucampis c'ari testigojja c'arinaca arsu.

6Ñankha lurir jakejj yatiñ thakasinjja janiw jicjjatquiti,

ucampis ch'iqhi jakejja janc'aquiwa yatiñ cancaña jicjjati.

7Jan amuyt'asiri jaketjja jithektam;

jupan arunacapanjja janiw yatiñ cancaña jicjjatcätati.

8Yatiñ cancañajja yatiñan jakerojj amuyt'ayiwa sarnakañapanjja,

ucampis jan amuyt'an jakerojj pachpa jan wali luratanacapaw sallkji.

9Jan amuyt'an jakenacajj juchapatjja janis cunäcaspa uqhamwa jan yäkapquiti,

ucampis cheka lurir jakenac taypinjja suma jacañawa utji.

10Chuymawa jupan pachpa llaquisitapjja yatisi;

cusisiñapsa janiraquiw jan uñt'atanacarojj yatiyquiti.

11Ñankha jakenacan utapajj tucjatäniwa,

ucampis asqui lurir jakenacan utapajja janiw tucjatäcaniti.

12Jaken amuyatapatjja sarnakäwinacapajja walicjamaquiwa,

ucampis tucuyapajja jiwañaquiwa.

13Larusiñansa chuymajj ususcaquispawa,

cusisiñasa llaquisiñaruquiw tucuyaspa.

14Jan amuyt'an jakejja sarnakatapampejja cusisitaquiwa,

ucampis asqui jakejja suma luratapampiwa cusisi.

15Jan amuyt'asiri jakejj take cuntejj sapqui ucarojja iyawsaquiwa,

ucampis ch'iqhi jakejja amuyt'asiwa cawquinjamas sarasqui uca.

16Yatiñan jakejj jan walirojja ajjsariwa, ucatsti jithektaraquiwa,

ucampis jan yatiñan jakejj ch'amaparuquiw alcati.

17Qhititejj mäqui cunatsa colerasqui ucajja, mäquiraquiwa jan walinacjja lurjjaraqui,

ucampis jan mäqui colerasqui ucajja, c'achatacwa luri.

18Pisi chuyman jakenacasti jan amuyt'an jakenacat catokerïpjjewa,

ucampis ch'iqhi jakenacajja yatiñ cancañampi muyuntatäpjjewa.

19Ñankha jakenacajj suma jakenacataquiwa alt'asipjjani,

uqhamarac asqui jakenacan puncunacapanwa achict'asipjjani.

20Pobrenacasti jake masipansa uñisitawa, ucampis kamirejj wali munataraquiwa.

21Qhititejj jake masipar jisc'achqui ucajja, juchwa luri,

ucampis, ¡cusisiñaniwa qhititejj pobre jaketa qhuyapayasqui ucajja!

22Qhitinacatejj ñankha luraña thakasipqui ucanacajja, thaquitjja maysaruwa saranucupjje;

asqui luraña thakapqui ucanacasti qhuyapayasirïpjjewa, suma phokherïpjjaraquiwa.

23Take ch'ama tucutat jilpacha catokañajj utji,

ucampis wali parlatatjja pobrernucstañaquiw utji.

24Yatiñan jaken coronapasti yatiñ cancañapawa,

ucampis jan yatiñan jakensti, pisi amuyt'aparaqui.

25Cheka testigojj mayninacarojja khespiyiwa jacañanacapjja,

ucampis c'ari testigojja jiwañaruwa puriyi.

26Tatituru jach'añchiri jakensti take chuyma jupar suyt'añaw utji,

uqhamarac wawanacapas Tatitun imatäniwa.

27Tatitur jach'añchas sarnakañanjja jacañawa utji;

jupaw khespiyi jiwañan amparapatsa.

28Reyitaquejja walja jakenacar apnakañajja, jach'ar aptatäñawa;

juc'a jakenacar apnakañasti, aynacht'añawa.

29Wali llamp'u chuymanïñajj wali ch'iqhi cancañ uñacht'ayi;

jan paciencianïñasti t'ajjmarätapwa uñacht'ayaraqui.

30Samarañ chuymanïñajj cuerporojj jacañwa churi,

ucampis envidiasiñajj ch'aqhatpachwa jakerojj tucji.

31Pobreru t'akhesiyirirojj Diosaruwa jisc'achasqui,

ucampis pobrer qhuyapayirejja Tatituruw jach'ar aptasqui.

32Ñankha jakerojj jupa pachpan ñankha luratapawa tucjasqui,

ucampis cheka lurir jakerojja cheka luratapawa arjjati.

33Yatiñ cancañajj amuyt'asiri jakenacanwa utji;

jan amuyt'an jakensti janiw yatiñajj uñt'atäquiti.

34Cheka cancañajj mä marcarojj jach'aptayiwa,

ucampis juchajj p'enkachayiwa.

35Ch'iqhi uywatajj reyirojj cusisiyiwa,

ucampis jan cuns lurir uywatajja reyin colerapacwa catokani.