Números 31 - Qullan Arunaca

Madián marcan t'unjäwipa

1Tatitusti Moisesarojj sänwa:

2“Phoksusim madianitanacatjja israelitanacan sutipjjaru, uca pasatatwa jiwjjäta” sasa.

3Ucatsti Moisesajj marcaruwa parläna aqham sasa:

—Jumanacatjja mä kawkhanejj armantasipjjam, waquichrantasipjjam, ucatsti nuwantapjjam madianaru, jupanacar phoksusiñataqui, Tatitu Diosan sutipjjaru.

4Sapakat tribuw nuwasiñataquejj waranka jakenaca qhitañapa.

5Uqhamaw sapakat tributjja waranka jakenac ajllipjjäna, junturusti tunca payan waranka jakenacaw nuwasiñatac sarthapipjjäna.

6Moisesasti qhitänwa nuwasiñataquejj Finees sat Eleazar sacerdoten yokapampi chica, cawquïritejj kollana yänaca, uqhamarac trompetanaca apcäna nuwantañ kalltapjjañapataqui.

7Ucatsti madianitanacampejj nuwasipjjänwa takeniru jiwarayasa, cunjämatejj Tatitojj Moisesaru siscatayna uqhama.

8Uqhamaw jiwarayapjjäna, Evi, Requem, Zur, Hur, Reba, uca madianitanacan pheska reyinacaparojja, uqhamarac Balaam sat Beor chachan yokaparusa.

9Israelitanacajj madianita warminacaru, jisc'a wawanacaparuw catuntasin apanipjjäna, uqhamaraquiw aparanipjjäna animalanacapa, uywanacapa take jila alani yänacapsa.

10Ucat sipansa take marcanacapwa, campamentonacapa phichhantanipjjäna.

11Take cunanactejj aparanipcäna, jakenacsa, uywanacsa,

12ucanacsti Moisesan ucaruw apapjjäna, uqhamarac Eleazar sacerdoten ucaru, takpach Israel marca nayrakataru, cawquïrinacatejj Moab orake pampana sayt'asipcäna, Jordán jawira thiyana, Jericó marca uñcatasina.

13Moisesampi, Eleazar sacerdotempi, uqhamarac marcan take jilïrinacapampejj campamentotjja ankaruw mistuwayapjjäna catokañataquejja.

14Ucampisa Moisesajj colerasïnwa, cawquïri jilïrinacatejj waranka, uqhamarac pataca soldadonacan nayrakatap jutapcäna nuwasïwit cuttanisa ucanacataquejja.

15Ucatsti aqham sänwa:

—¿Cunatsa jumanacajj warminacarojj jan jiwarayanipjjta?

16Jupanacapï israelitanacarojj Tatitu contra sartayapjjänjja, Balaaman arunacapatjja, uqhamarac Baal-peor diosarus yupaychayapjjänjja. Ucatwa Tatitojj marcaparojj plaganacampi mutuyänjja.

17Jichhpach jiwarayapjjam take yokall wawanacaru, uqhamarac take cawquïri warminacatejj chachanïpqui ucanacarusa.

18Ucampisa jan chacha uñt'ir warminacarojj jan jiwarayapjjamti, ucatsti jupanacampi kheparapjjam.

19Cawquïritejj jake masipar jiwaychi, uqhamarac jiwat jaken janchipsa llamct'aracchi, ucanacajj campamentot ankäjjan pakallko uru kheparapjjpan. Jumanacasa prisionero catut jakenacasa, quimsïri, uqhamarac pakallköri urunacaw k'omachasipjjäta.

20Uqhamaraquiw k'omachapjjäta take isinaca, take lip'ichit lurata yänaca, cabriton t'arwapata lurat yänaca, lawat luratanaca.

21Eleazar sacerdotejj aqham sasaw parläna, cawquïri soldadonacatejj nuwasiri sarapcatayna ucanacarojja:

—Cuntejj Tatitojj Moisesaru churcän uca leyirjamajja.

22Take korita, kollketa, bronceta, hierrota, estañota, plomota lurat yänaca,

23take cawquïrinacatejj ninataqui ch'ollkhëqui ucanacsti ninaru apantasinwa k'omachapjjäta, ucatsti k'omachir umampiw jarekjjapjjäta. Ucampisa cawquïrinacatejj jan ninatac ch'ollkhëqui ucanacjja k'omachir umampiw jarekapjjäta.

24Pakallko urusti isinacam t'ajjsusipjjäta, ucatsti k'omachatäjjapjjätawa. Ucat campamentorojj mantjjapjjaraquïtawa.

Uñisirit aparat yänaca laquisiñjjata

25Tatitusti Moisesarojj sänwa:

26“Eleazar sacerdoten yanapapampi, uqhamarac marcan jilïrinacapan yanapapampejj jacthapipjjam; jakenacsa uqhamarac uywanacsa madianitanacata aparanitäqui take ucanacsa,

27ucsti payaruw jaljäta. Mä chicatjja nuwasir saririnacaruw laquintäta, chicatsti marcan kheparir jakenacaruraqui.

28Uqhamaraquiw nayataquejj jilt'ayaraquïta, cawquïri soldadonacarutejj wact'qui ucanacata, jakenacatsa vacanacatsa, asnonacatsa, ovejanacatsa maya jilt'ayäta sapa pheska patacata.

29Ucatsti Eleazar sacerdoteruw churäta, nayarus churquitasma uqhama.

30Israelitanacarusa churañäqui uca chicatatjja, jakenacata, vacanacata, asnonacata, uqhamarac ovejanacatjja take uywanacatjja levitanacaruw churäta, sapa pheska tuncatjja, kollana chekan servitanacapata” sasa.

31Moisesampi, Eleazar sacerdotempejj cunjämatejj Tatitojj siscatayna Moisesarojj uqhamarjamawa lurapjjäna.

32Take cunanactejj uñisirinacapat aparanipcäna, jan soldadonacas aparanipcatayna ucanacasa jact'ata takpachasti sojjta pataca pakallko tunca pheskan waranka ovejanacänwa,

33pakallko tunca payani waranka vacanaca,

34sojjta tunca mayan waranka asnonaca,

35uqhamarac quimsa tunca payan waranka jan chacha uñt'iri tawakonaca.

36Ucat sipansa, soldadonacarusa chicatajj wact'qui ucanacajj quimsa patac quimsa tunca pakallkoni waranka pheska patacani ovejanacänwa,

37ucatsti sojjta pataca pakallko tunca pheskani ovejanacaw Tatitutaquejj jilt'ayatäna.

38Quimsa tunca sojjtani waranka vacanacatjja, pakallko tunca payani vacanacaw Tatiturojj churatäjjäna,

39quimsa tunca waranka pheska patacani asnonacatjja, sojjta tunca mayani asnonacaw Tatiturojj churatäjjäna.

40Ucatsti tunca sojjtan waranka tawakonacatjja, quimsa tunca payani tawakonacaw Tatiturojj churatäjjäna.

41Moisesasti Eleazar sacerdoteruw churjjäna cawquïrinacatejj Tatitu Diosaru churatäcän ucanacjja, cunjämatejj Tatitojj Moisesaru siscatayna uqhamarjama.

42Ucatsti cawquïri chicatatejj israelitanacaru wact'cäna, uqhamarac Moisesas jilt'aycatayna soldadonacar churatatjja,

43ucanacajj maya partjam uqhamaraquiquïnwa: Quimsa pataca quimsa tunca pakallkoni waranka ovejanaca,

44quimsa tunca sojjtan waranka vacanaca,

45quimsa tunca waranka pheska patacani asnonaca,

46uqhamarac tunca sojjtan waranka tawakonaca.

47Acnïri chicatatjja, Moisesajj maya apsüna sapakat pheska tuncatjja, uca quipcaraquiw, jakenacatsa, uywanacatsa lurasïna, ucatsti ucanacajj levitanacaru churatänwa, Tatitun Kollan Carpapan sirvitanacap laycu, cunjämatejj Tatitojj siscatayna uqhama.

48Ucatsti cawquïri jilïrinacatejj waranka, uqhamarac pataca soldadonacan nayrakatapa sarapcäna ucanacajj Moisesar jicjjatiriw sarapjjäna,

49Moisesarojj sapjjänwa: “Nanacasti, juman sirvirinacamajj jacthapipjjtwa cawquïri soldadonacatejj nanacan amparanacajjar catuyatäna ucanacatjja, janiraquiw maynis faltquiti.

50Acajjay nanacajj apanipjjtwa cawquïri kori yänactejj sapa maynisa jicjjatanipcta ucanacjja: brazaletenaca, pulseranaca, sortijanaca, aretenaca, yakha c'achachasiñanac cuna Tatituru mä ofrendjama loktañataqui, uqhamat khespiyasiñataqui” sasa.

51Moisesampi, Eleazar sacerdotempejj catokapjjänwa jupanacatjja take korit lurat yänaca.

52Cawquïri jilïrinacatejj waranka, uqhamarac pataca soldadonacan nayrakatapa sarapcäna ucanacasti Tatiturojj pataca quimsakallko tunca pusini kilot sipansa juc'ampi jilwa korjja churapjjäna.

53Sapa mayni soldadow mä juc'a kori apanïna enemigot aparanitapatjja.

54Uqhamaw Moisesampi Eleazar sacerdotempejj jilïrinacat kori catokapjjäna, ucatsti Jiquisiñ Carparuw apapjjäna uqhamat Tatitojj israelitanacat amtasiñapataqui.