1 Samuel 24 - Qullan Arunaca

1Cunapachatejj Saúl reyejj filisteonacaru arctäwita cuttanjjän ucqhasti, yatiyapjjaraquïnwa, Davidan En-gadi wasarancascatapa.

2Uqhamasti Saúl reyejj quimsa waranka jakenacwa take Israel marcata ajlliräna, ucatwa uca jakenacampi jach'a karka kollu tokenacaru Davidar thakeri saräna.

3Sarcasinsti mä oveja uyunacaruw purïna. Uca jac'ansti mä putuw utjaraquïna. Ucanwa Davidampi jakenacapampejj imantatäsipcaraquïna. Saúl reyisti uca puturuw mantaraquïna samart'añataqui.

4Ucat Davidan jakenacapajj uñjasin sapjjäna:

—Cuntejj Tatitojj arsctam ucajj jichhüruw phokhasi. ‘Uñisirimjja amparamaruw catuyäma’ sasa. Cuntejj jichhajj muncta uca jupampejj luram —sasa.

Uqhamasti Davidajj wali amuyumpi, c'achhata sartasinsti, Saúl reyin capapat mä jisc'a punta qhuchhokaraqui;

5ucampisa uca qhuchhokatatsti wali amtaraquïna chuymapanjja.

6Ucat jakenacaparojj saraquïna:

—¡Tatitojj jan aytayquitpati amparajja nayan reyejj contra! ¡Jïsa, jupajj reyiwa. Tatituw juparojj ajllisiraqui reyïñapataqui! —sasa.

7Uqhamatwa Davidajj jakenacaparojj jarct'äna, janiraquiw Saúl reyirojj llamct'aycänti, ucatsti reyejj putut mistuwayjjasinjja sarawayjjänwa.

8Ucampisa Davidajj pututjja khepapat mistuniraquïnwa, ucat art'araquïna:

—¡Jach'a rey, jach'a rey! —sasa.

Saúl reyisti cutiquipstanisin khepa uñtasiniraqui, ucatsti Davidajj wali ajjsartañ chuymampiw orakcama alt'asiraquïna,

9saraquïnwa:

—Jach'a reyisti, ¿cunataraqui qhitinacatejj nayjjat jan walinac parlapqui ucanacaru ist'isti, nayajj juma contra cunsa thakquirista uqhama?

10Juma jach'a reyejj jichhajj jumapachaw amuytajja; Tatitojj jach'a reyjja amparajjaru catuycchitu ucasa, qhaya putunjja, ucampisa janiw nayajj jiwayañ muncäyätti jach'a reyirojja, jan ucasti juparojj perdontwa, ucatsti saraquïyätwa: ‘Jupajj jach'a reyiwa, Tatituw juparojj ajllisiraqui’ sasa.

11“Wali sum uñtanim, jach'a rey, cuna apt'atäctejj uca. Acasti capaman puntapawa, qhitirutejj nayajj chekpachansa jiwayquiriscäyäta ucana. Ucampisa jichhajj jumajj, jach'a rey, amuyasimaya, nayajj chekpachapuni jan cuna ñankha lurañsa, ni jamasat lurañsa, uqhamarac reyir jan ist'añsa nayan janipuni amtatajja. Ucampisa jach'a reyejj nayarojj jiwayañataquiw arcanakascaquitu.

12¡Tatituy jichhajj jiwasa paniniru uñjistpan, ucatsti juchañcharaquitpan juma contra juchajj utjchitu ucapachajja! Ucampisa nayajj janipuniw amparajj aytcäti jach'a rey contrajja.

13Nayra tiempo mä säwisti saraquiwa: ‘Ñankha lurañajj ñankha jakenacatwa juti’ sasa. Uca laycu nayajj janipuniw jach'a reyi contrajj amparajj aytcäti.

14Uqhamarusa, ¿qhitin khepapsa Israelan reyipajj mistunejja? ¿Qhitirus arcnakasquejja? ¡Nayaru, qhititejj mä anu jiwatjamäcta, mä c'utiru uñtataquiraquïtwa!

15Uca laycu, Tatituqui jiwasa paninirojj uñj-jjestpan. ¡Juparaqui naya toketjja uñjitpan, jach'a reyitsa arjjataraquitpan!”

16Cunapachatejj Davidajj parlañ tucuyjjän ucqhasti, Saúl reyejj jach'at art'asiraquïna:

—¡Jumätawa, David, nayan wawajjajja, jumaw parlasquista! —sasa.

Ucatsti jacht'asisaw,

17Davidarojj säna:

—Chekpachansa jumajj amuyunïtawa. Nayarusti asquimpiw cuttayistajja, juma contra ñankha luratajjatjja.

18Jichhajj jumajj uñacht'ayistawa, chekpachapuni nayan asquejja munascatama. Tatitojj juman amparamaru nayarojj catuycchitu ucasa, janiw jiwayquistati.

19Chekpachansa, janiw qhitis uñisiripar jicjjatasajj aqhamaqui jan cuna lurasajj qhitanuccaspati. Uca laycu, Tatituy jumarojj asquimpi cuttaypan, cuntejj jichhajj jumajj nayampi lurcta take ucanacata.

20Jichhasti nayajj amuytwa, chekpachansa jumaw Israelan reyipäyätajja, juman irpatasti Israel marcajj nayraruw sartaraquini.

21Jichhajj Tatitun sutipjjaru juramento lurarapita, wawanacajjaru jan jiwarayañamataqui, uqhamarac familiajjan sutipsa jan chhaktayañamataqui.

22Davidasti Saúl reyitaquejj juramento lurarapïna, ucatsti reyejj palacioparuw cuttanjjäna. Davidasti jakenacapampejja cawqhanccäntejj uca jach'a imantasiñaruw cuttawayjjäna.