1 Crónicas 21 - Qullan Arunaca

Davidajj marcaruw jacthapi(2 S 24.1-17)

1Supayajj israelitanacataquiw sayt'äna, ucatsti Davidarojj amtayänwa Israel marcar mä jacthapiña aptatäñapataqui.

2Ucatsti Davidajj Joab chacharu, uqhamarac marcan jilïrinacaparojj sänwa:

—Sarapjjam, ucatsti Israel marcar jacthapinipjjam, Beerseba chekata kalltasina Dan chekacama, ucatjja yatiyapjjeta kawkhas utji ucana, uqhamat nayan yatiñajjataqui —sasa.

3Ucatsti Joab chachajj sänwa:

—Tatitojj marcaparojj juc'ampi jiljjataypan pataca cuti ucqhampi, kawkhatejj utjctan ucjjaru, ucampis ¿janitisti take jupanacajj juma reyin sirvirimäpquisti? ¿Cunatsa juma reyejj jacthapiña muntajja? ¿Cunatsa Israel marcajj juchañchasinejja?

4Ucampis reyejja ist'ayasïnwa Joab chachampi, ucatsti Joab chachasti sarasinjja take Israel marcpachwa muytäna, ucatjja cutt'jjänwa Jerusalén marcaru.

5Joab chachasti Davidarojja catuyänwa Israel marcajj jacthapitätapa, ucatsti yatisïnwa take Israelpachana mä millona pataca waranka jakenaca nuwasiñataqui utjatapa, ucatsti Judá orakenjja utjänwa pusi pataca pakallk tunca waranka jakenacaraqui.

6Ucampis janiw ucampi chicajja aptatacänti Leví, uqhamarac Benjamín uca tribunacarojja, Joab chacharojj reyin uqham aptayatapajja janiw jupataqui sumäcänti uca laycu.

7Diosataquejja take ucanacajja jan walïnwa, ucatsti Israel marcarojja mä mutuyäwi apayanïna.

8Ucampis Davidajj Diosarojj takwa arsjjäna:

—Nayajj jach'a juchwa uqham lurasinjja lurta. Ucatwa jichhajj achict'assma aca sirvirimana juchapa perdonañamataqui, nayajj mä jan wali amuyt'an jakjamawa lurta.

9Ucatsti Tatitojj Gad uñjirirojj sänwa, qhitirutejj Davidajj jisct'ascäna ucaru aqham sasa:

10“Davidan ucar saram, ucatsti naya toketjja yatiyanim, quimsa amtäwi jupampi lurañ munatajjata, ucatsti jupajj ajllispan cuntï jupajj munqui nayan lurañajja uca” sasa.

11Gad chachasti Davidan ucar sarasinjja yatiyanïnwa:

“Aqham siw Tatitojja sasa:

12‘Ajllisim, quimsa mara mach'äñapa, quimsa phajjsi uñisirinacaman espadampi jumar arcnakatäñapa, jan ucajj quimsa uru marcan jach'a usumpi usuntapjjañapa Tatitun espadapampi, uqhamaraqui Tatitun angelapampi Israel orakpachana jan walt'añanaca utjayasa.’ Jichhajj jumajj ajllisim, qhititï qhitanquitu ucar yatiyjjañajjataqui” sasa.

13Davidajj ucjjarojj sänwa:

—Jichhajj jan walt'añan jicjjatasta. Uqhamasti waliquiwa, asquïspawa Tatitun amparaparu catuyasjjañajja, jupan qhuyapayasiñapasti jach'awa, ucampis janiw jakenacan amparaparu puriñ muncti —sasa.

14Ucatsti Tatitojj Israel marcjjarojja mä jach'a uswa apayanïna, ucatsti pakallk tunc waranka israelit jakenacaw jiwarapjjäna.

15Diosajj mä angelaruw qhitanïna Jerusalén marca tucjañapataqui. Ucampis cunapachatï tucjañampïscäna ucqhawa Tatitojj uñjasinjja, chuymapan amtaraquïna uca jan wali lurata, ucatsti tucjiri angelarojj sänwa: “¡Ucqhacamaqui, jan juc'ampi lurcjjamti!” sasa.

Uca horasansti Tatitun angelapajj jicjjatasïnwa jebuseo Ornán chachajj trigo jawk'ascäna ucqhana.

16Davidasti Tatitun angelaparu uñtasinjja uñjänwa sayt'atäsquiri alajjpachampi, aca orakempi taypina amparaparusti espadapa apt'atäsquiri, uqhamaraqui Jerusalén toker ayt'asquiriraqui. Ucatsti Davidampi chuyman awquinacampejja luto isimpi isthapitcamaquïpjjänwa, orakeru ajanupsa puriyañcamaw liwirtapjjäna,

17ucat Davidajj Diosarojj sänwa

—¡Nayaw aca marcarojj jacthapiña aptaytjja! ¡Nayaw juch lurta, uqhamarac jan walsa luraracta! Ucampis ¿cuns aca jan juchani jakenacajj lurapjjejja? Dios Tatitojja, nayajj achict'assmawa mutuyäwimajj nayjjar jutañapataqui, uqhamarac familiajjarusa, ucampis marcamarojj jan jiwarayjjamti.

Davidajj mä altar sayt'ayi(2 S 24.18-25)

18Ucatsti Tatitun angelapajj Gad chacharuw yatiyäna Davidajj Tatitutaqui mä altar sayt'ayañapataqui, jebuseo Ornán chachajj trigo jawk'cäna ucawjaru.

19Ucatjja Davidajj saränwa cuntï Gad chachajj siscäna uc luriri Tatitun sutiparu.

20Ornán chachasti trigo jawk'casina khepäjjar uñtanisawa angelaru uñjäna. Ucampis pusi wawanacapajj jupampïcäna ucanacasti sarjjapjjänwa imantasiñataqui.

21Cunapachatï Davidajj Ornán chacharu jac'achasïna cawqhanccäntejj ucqharu, jupajj Davidar uñjasinjja mistuwayänwa trigo jawk'cäna ucqhata Davidar catokañataqui, ucat Davidan nayrakataparu p'ekepa alt'asïna;

22ucatsti Davidajj Ornán chacharojj sänwa:

—Trigo jawk'aña orakem aljita, ucawjaru mä altar Tatitutaqui sayt'ayañajjataqui. Uqhamata jach'a usojja marcat saracjjañapataqui —sasa.

23Ornán chachajj saraquïnwa:

—Juma reyinquiwa, lurascaquim cunjämatï waquisqui uqhamaru. Nayasti churaraquïmawa nact'ayañ ofrendataquisa orko vacanaca, uqhamarac trigo jawk'aña lawanacsa, trigsa ofrendataqui. ¡Take acanacwa juma reyirojj churäma! —sasa.

24Ucampis David reyejj sänwa:

—Janipuniw uqhamäcaspati. Jan ucasti nayajj cunatejj alapäqui ucampiw alañajjajja, nayasti janiw jumat aparcämati cunatejj jumäncqui uc Tatitur churañataquejja, nact'ayat ofrendanaca loktasina cunatejj jan nayancqui ucjja —sasa.

25Uqhamaw Davidajj Ornán chacharojj alapa churjjäna qhaya oraketjja sojjta pataca sencillo korinaca.

26Ucatsti uqhamaw Tatitutac mä altar lurayäna, ucatjja loktänwa sumancäwi nact'at ofrendanaca, sacrificionacsa. Ucjjarusti Tatituruw art'äna, ucatsti Tatitojj juparojj ist'änwa alajjpachata nina sarakayanisina altarjjaru, nact'at loktäwinac patjjaru.

27Ucatsti Tatitojj espadapa imjjañapataquiw angelaru parläna.

Templo utachañatac orake utjatapa

28Qhä horasanjja Tatitojj Davidan ist'atapatjja, cawqhantejj Ornán chachajj trigo jawk'ascäna ucqharuwa sacrificionac loktäna.

29Moisesajj wasarana apnakaña carpsa lurcchïna Tatitutaqui ucasa, uqhamarac nact'ayañ ofrendanac altarasa Gabaón chekana santuariojj jicjjatascchïna ucasa,

30Davidajj janiw qhayar sarañ muncänti Diosar jisct'asiri, jupajj wal ajjsarayasïna Tatitun angelapan espadapa uñjatap laycu.