Jeremías 23 - Qullan Arunaca

Khepa urunacataqui suyt'äwinaca

1Tatitusti siwa: “¡Ay, cunaquïcani awatirinacatjja, cawquïrinacatejj ovejanacajj-jja chhakhayapjje, uqhamaraqui ananucupjje ucanacataquejja!”

2Israelan Dios Tatitupasti siwa; cawquïri awatirinacatejj marcapa apnakapqui ucanacarojja: “Jumanacajj ovejanacajj-jja ananucupjjtawa, jaltayapjjtawa, janiraquiw sum awatipctati. Jichhajj waliquiwa, nayajj take jan wali luräwinacamatjja walpunracwa mutuyapjjäma. Naya Tatituw ucjja arsta.

3Naya quipcaraquiw ovejanacajj-jja anthapisinjja cawquïri marcanacarutejj chhuqhunucuycta ucata, tantacht'asinsti pastonacaparuw cuttayanjjä, uqhamata walja kallunacanïpjjañapataqui.

4Awatirinacwa jupanacaru awatiñapataqui uscurapï, jan cunsa ajjsarapjjañapataqui, ni maynisa chhakhañapataqui. Naya Tatituw ucjja arsta.”

5Tatitojj siwa:

“Mä uruw purinini cunürutejj Davidajj wawanïcani uca urojja,

mä reyi, wali amuyt'ampi apnakañapataqui.

Aca marcansti chekaparu, asquiruraqui uñjañapataqui.

6Uca reyin apnakañapcamasti Judá orakejj khespiyatäniwa,

Israelas take jan walit jarc'akataw jacasini.

Aca sutimpiw sutichapjjaraquini:

‘Tatituw jiwasan atipjirisajja’ ” sasa.

7Tatitusti siwa: “Juramentonac jan lurañ urusti purininiwa, aqham sasa: ‘Egipto marcat israelitanacaru apsunir Tatitojj jacasquiwa’ sasa,

8jan ucasti aqham sasaw juramento lurapjjani: ‘Israelitanacaru amsta tokenquir marcanacata, cawqui marcanacarutejj ananuccatayna ucanacat cuttayanjjiri Tatitojj jacasquiwa’ sasa. Ucatsti pachpa utanacapan jacasipjjaraquini.”

Profetanac toketa arunaca

9Profetanac toketa arunaca:

Chuymajjanjja mayjt'atapunïtwa,

janchejjasti wal qhathatiraqui,

machata jaker uñtatätwa,

vinompi k'ala atipjatäquiristsa uqhama,

Tatitun arunacap laycu, uqhamarac Tatitu laycu.

10Aca marcasti wachoka jucha lurir jakenacan phokhantatawa,

ñankha lurañaru jalir jakenacana phokhantatawa,

ch'amanacapsti jan walinac lurañataquiquiw apnakapjje.

Ucatwa Tatitojj aca orakjja maldecïnjja,

aca orakesti wañsuwayjjaraquiwa,

wasara tokenquir pastonacasa k'alaw pharsuwayjjaraqui.

11Tatitusti siwa:

“Profetanacasa, sacerdotenacasa juchararcamaquïpjjewa,

Pachpa templojjanwa jan walinac lurasipquiri jicjjataracta.

12Ucatpï jichhajj sarnakäwinacapajja ch'amaca, llust'araquïnejja:

Nayaw jupanacarojj nuct'ayäjja.

Cunapachatejj jupanacaru luratanacapa wayt'cä ucapachasti,

jach'a t'akhesiñanacwa jupanacjjarojj apayanëjja.

Naya Tatituw ucjja arsta.

13“Samarianquir profetanacarusti nayaw uñjta,

cunanacatejj nayaru ñankhachquitu ucanac lurasquiri;

Baal diosan sutipjjaruw parlapjje,

Israel marcajjarusti thaquipatjja maysaruw saranucuyapjje.

14Jerusalenanquir profetanacarusti nayaw uñjta,

ajjtascañ luräwinaca lurasipquiri:

Wachok juchanac lurapjje, lunthatapjjaraqui,

janiraquiw maynis ñankha lurañanacapjja apanucquiti.

Jupanacasa, marcan jaquirinacasa,

nayataquejj Sodoma, Gomorra marcanacjamäpjjewa.

15Ucatwa, naya, take ch'amani Tatitojj, uca profetanaca tokejj aca arunaca arstjja:

Jumanacarojj mä c'allc'u mank'a mank'ayapjjäma;

venenot umwa umayapjjaraquïma,

Jerusalenanquir profetanacata ñankha lurañajj take marcpacharu akantatap laycu.”

16Take ch'amani Tatitusti siwa:

“Israelitanaca, cuntejj profetanacajj parlapjje ucanacarojja jan ist'apjjamti;

parlatanacapasti c'ari arunacaquiwa.

Jupanacan amtata arunacacwa parlapjje,

janiraquiw nayajj jupanacaru cuna arunacsa churcti.

17Arunacajjaru jisc'achirinacarusti sapjjaraquiwa:

‘Take cunas waliquïscaniwa’ sasa.

Qhitinacatejj chuymanacapan jan wali amtatanacaparuqui arcapjje ucanacarusti sapjjaraquiwa:

‘Janiw cuna jan walis jutcätamti’ ” sasa.

Jeremiasan jach'at arsutapa

18Ucampisa, ¿qhitis Tatitun amtäwinacapjja yati?

¿Qhitis arunacapjja ist'araqui uqhamaraqui juparusa uñjaraqui?

¿Qhitis arsutaparojj ist'araqui?

19Tatitun colerasiñapajj mä jach'a jawir umar uñtatawa,

jach'a tutuca thayar uñtatawa, ucatsti

ñankha jakenacjjaruw muytaraqui.

20Tatitun colerasiñapajja janiw tucuscaniti,

jupan amtäwinacapa phokhasiñapcamajja.

Mä uruwa puriniraquini cunapachatejj jumanacajj take acanacata amuythapisipjjäta ucajja.

Tatitun arunacapa c'ari profetanac toke

21“Janiw nayajj uca profetanacarojj qhitancti,

janiraquiw jupanacarojj cuna arunacsa siscti,

ucampisa jupanacajj nayan sutejjaru parlañataquejj jalacamaquiw jalsuwayapjjaraqui.

22Jupanacatejj nayan amtatanacajja yatipjjasapän ucajja,

nayan arunacajjwa marcajjarojj yatiyapjjasapänjja;

jan wali thaquinacapatsa cuttayanipjjasapänwa,

ñankha lurañanacapsa apanucuyapjjaraquisapänwa.”

23Tatitusti siwa:

“Jayansa, jac'ansa, nayätwa Diosajja.

24¿Qhitis nayan nayräjjatjja imantasispajja?

Alajjpachasa, acapachasa nayampi phokhantatawa.

Naya Tatituw ucjja sista.

25“Uca c'ari profetanacan parlatanacapjja nayajj ist'twa, jupanacajj nayan sutejjaruw parlañ munapjje, samcanacap toksa nayampis parlapcaspa uqhamwa parlapjje.

26¿Cunapachcamasa uca profetanacajj c'ari arunaca yatiyasipcaquini, jupanacan pachpa amtatanacapjja?

27Cuna samcanactejj jupanacajj maynit mayniru parlaquipasipjje ucanacampejj marcajjarojj nayatwa armasiyañ munapjje, cunjämatejj nayra awquinacapajj nayat armasisin Baal diosan khepapa sarjjapjjänjja uqhama.

28-29¡Mä profetatejj mä samca samcaschi ucapachajja khana sispan mä samcaquïtapa, ucampisa arunacajjtejj catokchejja, ucapachasti khana, chekaparu yatiyapjjpan! Janiw trigo jipimpi trigompejj mayaquïcaspati. Arunacajjajj ninjamawa, karkanac ch'iyjiri martilljamawa. Naya Tatituw ucjja arsta.

30“Ucatwa nayajj uca c'ari profetanacataquejj sayt'tjja, cawquïrinacatejj jupanaccama nayan arunacajja lunthatasipjje ucanac toke. Naya Tatituw ucjja arsta.

31Nayajj cawquïri profetanacatejj jupanacan waquichata arunacapa nayan arunacajjäcaspas uqhama parlapjje ucanac tokew sayt'ta.

32Nayajj cawquïri profetanacatejj uca c'ari samcanacapa parlasajj marcajjaru maysaru saranucuyapjje ucanac tokew sayt'ta. Janiw nayajj jupanacaru qhitancti, janiraquiw cuna casta arunacsa churcaractti, uqhamasti jupanacajj janiw marcajjarojj yanapt'apcaspati. Naya Tatituw ucjja arsta.

Cunjämasa Tatitun arunacapatjja parlasiñapa

33“Jeremías, mä jaketejja, jan ucajj mä profetasa, mä sacerdotesa jisct'ätam ucapachajja: ‘¿Cawquïrisa Tatitun ewjjapajja?’ sasa. Ucapachasti jupanacarojj saraquim: ‘Tatitojj siwa: Jumanacäpjjtawa nayan ewjjanacajjajja, ucampisa nayajj antutt'äwa’ sasa.

34Mä profetatejja, mä sacerdotesa, jan ucajj mä jakesa aca arunaca parlanejja: ‘Tatitun ewjjanacapaw’ sasa, juparusa uqhamaraqui familiaparusa nayaw mutuyaraquëjja.

35Cunapachatejj maynejj mä amigoparu, jan ucajj mä familiarusa jisct'anejja, ucapachasti sascaraquiniwa: ‘¿Camsisa Tatitojja? ¿Cunsa jupajj arsu?’ sasa.

36Ucampisa jani mayampsa ‘Tatitun ewjjapaw’ sasajj parlapjjamti, ucampisa qhititejj parlani ucarojj, nayaw juparojj cuttayä uca pachpa arunacapajj mä carga tucuñapataqui. Jumanacajj jacquiri Diosana, Tatitu Diosamana arunacapjja jan waliruw tucuyapjjtajja, maysaruw k'ewipjjtajja.

37“Jeremías, profetanacaru jisct'am: ‘¿Camsisa Tatitojja? ¿Cunsa jupajj arsu?’ sasa.

38Ucarutejj sapjjätamjja: ‘Tatitun ewjjapaw’ sasajja, jupanacarusti saraquim: ‘Tatitojj siwa: Jumanacajj cuntejj janiw parlapjjätati sapcsma uca arunacjja parlasipcactawa,

39uca laycuw jichhajj mä cargäpcasmas uqhama aptapjjäma, jumanacaru cawquïri marctejj jumanacarusa, nayra awquinacamarusa churcta uca marcamppacha, ucatsti nayat jayaruw liwt'apjjäma.

40Jumanacjjarojj jisc'achjatäñwa apanëjja, uqhamaraqui wiñaya p'enkachjatäñampi, uca p'enkachatäñasti janipuniw cunapachas armatäcaniti.’ ”