2 Reyes 13 - Qullan Arunaca

Israel marcana Joacaz chachan reyïtapa

1Ocozías chachan Joás yokapajj Judá marcana pä tunca quimsani maranaca apnakcäna ucqhawa Jehú chachan Joacaz yokapajj Israel marcana reyïña kalltäna, ucatsti Samaria marcanjja tunca pakallkoni maranacawa apnakäna.

2Ucampis luratanacapajj Tatitun nayrakatapanjja jan walinacänwa. Jupasti luränwa cawquïr juchampitejj Nabat chachan Jeroboam yokapajj Israel marcar juch luraycäna uca pachpa juchanaca, ucatsti ucanacatjja janiraquiw saraktcaraquïnti.

3Uca laycuw Tatitojj Israel marcataqui colerasïnjja, ucatjja walja maranacawa Siria marcanquiri Hazael reyin amparaparu catuyäna, uqhamarac Ben-adad sat yokapan amparaparusa.

4Ucatjja Joacaz reyejj Tatituruw oracionan mayïna, Tatitusti oracionaparojj ist'änwa, uñjaraquïnwa cunjäm jan waltejj Siria marcanquir reyejj israelitanacaru t'akhesiycäna ucanaca.

5Ucat Tatitojj mä khespiyirwa churäna, uqhamatwa israelitanacajj khespiyasipjjäna Siria marcanquir reyita, ucatsti samarataquiw utanacapana jacjjapjjäna, cunjämtejj nayrajj jacapjjerïcäna uqhama.

6Ucampis janiw sarakapcänti Jeroboam chachajj Israel marcar juch luraycäna uca familiapana jucha luräwinacapata, jan ucasti juchjja lurasipcaquïnwa, uqhamarac Asera sat diosan lantipasa Samaria marcancascaquïnwa.

7Joacaz reyin ejercitopajja janiw waljäcjjänti, jan ucasti pheska tunca caballería soldadonacaquiw utj-jjäna, tunca nuwasiñ carronacampi, uqhamarac tunca waranka infantería soldadonacampiquiraqui, Siria marcanquir reyiw k'al tucjatayna, lak'ar tucuyañcama tucjasina.

8Ucat ucjjar Joacaz reyin sarnakäwipasa, take cun luratanacapasa, uqhamarac ch'amapatsa kellkatawa Israelan reyinacapan crónicas sat libropana.

9Cunapachatï jiwjjäna ucqhasti Samaria marcanwa imt'jjapjjäna. Ucatjja jupa lantejja Joás yokapaw reyëjjäna.

Joás reyin Israelan apnakatapa

10Cunapachatï Judá marcanquiri Joás reyejj quimsa tunca pakallkoni mara apnakcäna ucqhawa Joacaz chachan Joás yokapajj Israelana reyïña kalltäna, ucatsti Samaria marcanjja apnakänwa tunca sojjtani maranaca.

11Ucampis jupan luratanacapajja jan walinacänwa Tatitun nayrakatapana, jupasti janiw saraktcänti cawquïr juchampitejj Nabat chachan Jeroboam yokapajj Israel marcar juch luraycäna uca juchanacatjja, jan ucasti ucanacjja lurascaquïnwa.

12Ucat ucjjar Joás reyin sarnakäwipasa, take luratanacapatsa, ch'amapatsa, uqhamarac cunjämsa jupajj nuwasïna Judá marcanquir Amasías reyimpi ucanacatsa kellkatawa Israelana reyinacapan crónicas sat libropana.

13Cunapachatï Joás reyejj jiwjjäna ucqhajja, Samaria marcanwa imt'jjapjjäna Israelan reyinacapamp chica. Ucatsti tronorojja Jeroboam chachaw maqhatjjäna.

Khepa profecía arunacampi, Eliseon jiwatapampi

14Eliseojj wali usuntata jiwañampïnwa, ucatsti jupan ucarojj Israelan reyipaw uñjir jutäna, jacht'asisaw khomantäna, aqham sasa:

—¡Awquejja, awquejja, jumasti Israel marcataquejja wali ch'aman ejercitjamäyätawa! —sasa.

15Eliseosti juparojj sänwa:

—Arcompi, mä kawkha flechanacampi catum —sasa.

Reyisti arcompi mä kawkha flechanacampwa catjjarüna.

16Ucatsti Eliseojj sänwa:

—Waquicht'asim mä flecha flecht'añataqui —sasa.

Reyejj uqham waquichasquipanjja, Eliseojj amparapampejj reyin amparaparuw lokjjatäna,

17aqham sasa:

—Inti jalsu toke ventana jist'aram —sasa.

Reyisti jist'aränwa, ucatsti Eliseojj sänwa:

—Jichhasti, ¡flecht'am! —sasa.

Ucatsti reyejj flecht'änwa, ucatjja Eliseojj art'änwa:

—¡Tatitun khespiyiri flechapawa! ¡Siria jakenacat khespiyir flechawa! ¡Jumawa Afec chekana Siria jakenacaru atipjäta, ucatsti jupanacjja tucjätawa! —sasa.

18Ucatsti reyirojj sänwa:

—Flechanac catjjarum —sasa.

Reyejj uqham catjjarusquipanjja, Eliseojj sänwa:

—Jichhasti orakeru lek'jjam —sasa.

Reyisti quimsa cuti lek'jjasinwa pachpar jan lek'cjjänti.

19Ucatsti profetajj jupataquiw colerasïna, aqham sasa:

—Jumatejj oraker lek'jjasamäna pheska, jan ucajj sojjta cutisa ucqhajja, jumajja atipjasamänwa Siria jakenacarojja tucjañcama; ucampis jichhajj atipjätawa quimsa cutiqui.

20Eliseojj jiwjjänwa, ucatsti imt'jjapjjänwa. Cunjämtejj sapa marasa lunthata moabita jakenacaw tam, tama Israel orakerojj jutapjjäna.

21Mä cutiwa mä kawkha israelita jakenacajj mä jiwat chacharu imt'asipcäna, ucatsti moabitanacata mä tama jakenac jutir uñjasinjja, uca jiwatarojj Eliseon imäwip mankheru liwintawayasinwa sarjjapjjäna. Ucatjja uca jiwatajj Eliseon jiwat janchipar mä juc'a wact'atap laycojja, uca jiwatajj jactjjänwa, ucatsti cayupatwa sayt'asjjäna.

22Siria marcanquir Hazael reyejj Israel marcaruw t'akhesiyäna, Joacaz reyejj jacascäna ucqhajja.

23Ucampis Tatitojj jupanacatjja qhuyapayasïnwa, uqhamarac Abraham, Isaac, Jacob jupanacampi suma parlt'äwiru mantatapatwa amtasïna, ucatsti janiw tucjañsa, ni jakonucuñsa muncänti jupan nayrakatapatjja. Jichhacamasa janiw uqhamjja lurquiti.

24Cunapachatï Siria marcanquir Hazael reyejj jiwjjäna ucqhajja, Ben-adad sat yokapaw jupa lantejj reyëjjäna.

25Ucatsti Joacaz reyin Joás yokapaw cutirayjjäna Ben-adad uca reyin amparapata, cawquïr marcanactejj jupajj guerran aparcäna Joacaz awquipata ucanaca. Ucatsti Joás reyejj Ben-adad reyirojj quimsa cutiwa atipjäna, ucatjja cutirayasjjänwa Israelan marcanacapa.