1-2Uca phajjsina, tunca uru sarakatarusti, cuna urutejj machak mara urüqui, uca uruw Tatitojj amparapa nayjjaru lokjjatitu, ucatsti mä unañchäwi toke Israel orakeruw irparaquitu. Cunapachatejj Babilonia orakeru apatäcayätan, ucatsti niya pä tunca pheskani maraw pasjjaraquitayna, uqhamaraqui Jerusalén marcajj catuntatäcän ucqhatsti tunca pusin maraw pasjjaraquitayna. Israel orakensti Tatitojj mä alto kollu pataruw irpnoketu, ucatpachwa aynach tokenjja walja jach'a utanaca uñjta, ucajj mä marcäcaspas uqhamänwa.
3Tatitusti ucaruw irpitu, ucansti mä jakeruw uñjaracta, broncet luratäcaspas uqhama. Puncun sayt'atäscänwa, amparaparusti linot lurat thuru hilo apt'ataraquïnwa, uqhamaraqui mä reglampi cawkhäquitejj uc tupt'añataqui.
4Uca jakesti saraquituwa: “Jichhajj wal wali uñtam, suma ist'araquim; cunanactejj uñacht'aycäm ucanacsti suma amuyaraquim, Diosaw jumarojj acar irpantam nayan jumaru take acanaca uñacht'ayañajjataqui, ucatsti janc'aqui Israel marcaru yatiyaraquim cunanactejj uñjcta ucanacjja” sasa.
Inti jalsu tokenquir puncu5Templo ankäjjansti mä perkaraquiw muyuntäna. Uca jaken amparapan reglajj utjcän ucasti quimsa metroniraquïnwa. Uqhamasti uca perka tupt'araquïna, uca perkajj anchorojj quimsa metronïnwa, alayarusti quimsa metroniraqui.
6Ucatsti janc'aquiw sararaquïna, cawquïri puncutejj inti jalsu tokenccäna ucaru, gradanacanjam maqhatawayasinsti ucanquir puncu umbralanac tupt'araquïna, ucatsti anchorojj quimsa metroraquïtaynawa.
7Mantañawjansti puraparojj utanacaw utjaraquïna, ucanacasti anchorusa uqhamaraqui largorusa quimsa metroncamaraquïnwa, ucata sapa utata mä utacamasti pä metro chicataniw utjaraquïna. Ucjjarusti cawquïri puncutejj mantañawjanccän ucaraquiw templo tokeru uñtata ucancascaraquïna. Uca puncun umbralapasti quimsa metroniraquiquïnwa.
8-9Uca jakesti uca puncur mantañäquis uc tupt'araqui, cawquïritejj templor mantqui uca, mantañasti pusi metroniraquïnwa. Ucjjarusti utjaraquïnwa paya pilaranaca, ucanacasti mä metroniraquïnwa thururojja.
10Inti jalsu tokenquir mantañawjansti purapäjjanjja quimsa utanacaw utjaraquïna, ucan utjcän purap tokena uca pilaranacasti paypachajj ucch'a puraquiraquïnwa.
11Ucatsti uca jakejj mantaña puncwa tupt'araqui; anchorojj pheska metronïnwa, mantaña tokerusti sojjta metro chicataniraqui.
12Uca utanac uñcatasinsti mä jisc'a perkaraquiw utjäna, ucasti anchorojj chicat metroraquïnwa take toketjja. Sapa utasti anchorusa, largorusa quimsa metroncamaraquïnwa.
13Ucatsti uca mantaña puncu anchoru tupt'araquïna, maya uta mankhatpacha, uñcatasincqui uca uta mankhacamajja suma tupt'ataraquïnwa, mä puncu tokenjama pasawayasa, uñcatasi puncuncqui ucacama, take ucanacasti tunca payani chicatani metroniraquïnwa.
14Ucjjarusti mantañäquisa ucwa tupt'araquïna, ucasti tunca metroraquïnwa. Mantaña tokenccäna uca utasti ankäjjarojj take toketwa muyuntaraquïna.
15Uca mantañasti ankäjjata mankhacamajj pä tunca pheskani metroraquïnwa.
16Ucanquiri utanacasa, uca pilaranacasa mankhatjja, rejanacani ventananacampi muytataraquïnwa. Uqhamaraquiwa uca mantañäqui ucasa mankha toketjja ventananacampi muytataraquïnwa. Uca pilaranacansti palmeranaca dibujataw utjaraquïna.
Ankäjja uta mantaña17Ucatsti uca jakejj ankäjja uta mantañaruw irparaquitu. Uca ankäjja uta mantañasti kalanacampi suc'sutänwa, quimsa tunca utanacaw ucaru muytata utjaraquïna.
18Kalanacampi suc'sutasti cawquïritejj mä juc'a aynachanccäna uca mantaña tokencqui ucacamaraquïnwa, anchorusti uca utanaca ucch'araquïnwa.
19Uca jakesti uca puncjja tupt'araquiwa uca uñcatasi mankhatpacha, puncu ankäjjcama, cawquïri puncutejj mankhancqui ucacama, take ucanacasti pheska tunca metroniraquïnwa.
Amstäjjanquir puncu20Ankäjjanquir pationsti mä puncuw utjaraquïna, ucasti amsta tokencänwa. Ucat uca jakesti anchoru uqhamaraqui largoruw uca puncjja tupt'araquïna.
21Puraparusti quimsa utanacaniraquïnwa, pilaranacan cuna, uca quipcaraqui yakha utanacapasa inti jalsu toket mantaniñäquisa ucsanquir utanacjamaraquiquïnwa ucch'anacaraqui, pä tunca pheskani metroniraquïnwa largorojja, anchorusti tunca payani chicatani metroniraqui.
22Ucanquiri utanacasa, ventananacasa, palmeranacasa, inti jalsu tokenquiri puncu tokencquejja ucch'acamaquiraquiquïnwa. Aca cheksti mä gradanjama maqhatañaraquïnwa, uca gradanacasti pakallkoraquïnwa, ucat ucanquiri utasti mankha tokencaraquïnwa.
23Inti jalsu toketsa uqhamaraqui amsta toketsa, ankäjja toket mantaniñawjarusti, mä yakha mantañaw utjaraquïna, ucasti mankhanquiri uta ankäjja tokeruw sararaquïna, uca pä mantaña taypi tupt'araqui, ucat mä mantañata mä mantañcamasti pheska tunca metroraquïnwa.
Aynach tokenquir puncu24Ucatsti uca jakejj janc'aquiw aynach tokeru irparaquitu, cawqhantejj mä mantañajj utjcän uca chekaru, ucansti pilaranaca, uqhamaraqui ucanquir uta tupt'araquïna, ucanacasti mayanacjama ucch'anacaraquiquïnwa.
25Mantaña tokenquir jach'a utasti, ventananacampi muytataraquïnwa mayanacjamaraqui. Takpachasti largorojj pä tunca pheskani metronïnwa, anchorusti tunca payani chicatani metroniraqui.
26Ucansti utjaraquïnwa mä grada, pakallko gradanacani, utasti mankha tokencaraquïnwa. Ucanquir pilaranacansti palmera alinaca dibujataw utjaraquïna, maya purapäjjana.
27Mankhanquir uta ankäjjasti aynach tokerojj mä puncuniraquïnwa. Ucat uca jakesti aynach tokenquiri pä puncunacatjja mä puncut mä punccamajj kawkhas tupt'asïna uca aptaraquïna, ucasti pheska tunca metroniraquïnwa.
Mankha tokenquir uta ankäjja, aynach tokenquir puncumpi28Ucatsti janc'aquiw irparaquitu aynach tokenquir mantañäquis ucawjaru, mankha tokencquis uca uta ankäjjaru. Ucatsti jupajj aynach tokenquir puncwa tupt'äna, uca puncusti maya puncunaca ucch'araquiquïnwa.
29-30Celda sata utanacasa, uqhamaraqui yakha utanacasa, pilaranacapasa, mayanaca ucch'araquiquïnwa. Mantaña tokenquir jach'a utasti, yakha utanacanïnwa, muytata ventananacaniraqui, takpachasti largorojja pä tunca pheskani metrow tupt'asïna, anchorusti tunca payani chicatani metroraquïnwa.
31Ucanquiri utasti ankäjja tokeru uñtatänwa. Pilaranacasa palmera alinacani dibujataraquïnwa. Uca puncurusti mä gradanacanjamaw maqhataraquïna, ucatsti quimsakallko gradanacaniraquïnwa.
Mankha tokenquir uta ankäjja, inti jalsu tokenquir puncumpi32Ucatsti janc'aquiw mankha tokenquir uta ankäjja tokeru irparaquitu, inti jalsu tokenjam irparaquitu, ucatsti uca mantaña tupt'araquïna, ucasti maynïrinacjama ucch'araquiquïnwa.
33Celda sata utanacapasa, uqhamaraqui pilaranacapasa, ucanquir utanacapasa, mayanacjam ucch'araquiquïnwa. Mantaña tokenquiri jach'a utasti ucanquir utamppachajja, ventananacampi muytataraquïnwa, largorusti pä tunca pheskani metrönwa, anchorusti tunca payani chicatani metroraqui.
34Ucanquiri utasti ankäjja tokeru uñtataraquïnwa. Pilaranacapasti palmera alinaca dibujataraqui take toketa. Aca puncurusti mä gradanjama maqhatañaraqui, ucasti quimsakallko gradanacaniraquïnwa.
Mankha tokenquir uta ankäjjapa, amsta tokenquir puncumpi35Ucatsti uca jakejj janc'aquiw irparaquitu, amsta toket mantaniña puncüquis ucsaru, uca mantaña tupt'araqui, ucasti mayanaca ucch'araquiquïnwa
36uqhamaraqui celda sata utanacani, pilaranacani, yakha utanacani, take toketa ventananacani cunaraquïnwa. Mantaña tokenquir jach'a utasti largorojj pä tunca pheskani metronïnwa, anchorusti tunca payani chicata metroraqui.
37Ucanquir utasti ankäjja tokenquir patio toker uñtataraquïnwa, pilaranacasti sapa maynisa take toket palmera sat alinacani dibujataraqui. Uca puncurusti mä gradanjama maqhatataraquïnwa, ucasti quimsakallko gradanacaniraquïnwa.
Amsta tokenquir puncu jac'an yakha jach'a utanaca38Mä utaw utjaraquïna, cawquïri utatejj mantaniña tokencqui ucampejja mayaquiraquïnwa. Uca utanwa cawquïri animalanacatejj sacrificiot loktatäcän ucanacarojj jarekapjjerïna.
39Mantaña tokenquir utansti pusi mesanacaw utjaraquïna, paya purapäjjaru uca mesanacjjanwa cawquïri uywanacatejj sacrificiot naqhantayatäcani uca uywanacjja qharinucupjjerïna, jan ucajj juchata, pantjasitatsa sacrificionac loktapjjerïcän uca uywanacjja.
40Amsta tokenquiri utansti, purap tokenjja pä mesanacaw utjaraquïna,
41uqhamasti ankäjjansa, mankhäjjansa pusi mesanacaw utjäna, mantaña tokenquiri jach'a utanacat sipana, takpachasti quimsakallko mesanacaw utjäna. Uca mesanac patjjanwa sacrificiot loktañ uywanacarojj qharinucupjjerïna.
42-43Uca pusi mesanacasti, cawqhantejj uywanacajj naqhantayañataqui qharinucutäpcän uca mesanacasti, suma kalanacat luratänwa, largorusa, uqhamaraqui anchorusa pakallko tunca pheskani centimetroncamaraquïnwa, altorusti medio metroraqui, uca mesanacjjaruw cuna aychatejj ofrendat loktatäcän ucanac uscupjjerïnjja. Uca utan mankha tokensti take muytata, mä chekaw jilt'ayata utjaraquïna, ucasti niya sojjta centimetronjamänwa anchorojja, ucjjaruw jac'uta sacrificio loktañajj uscusïna, uqhamaraqui cuna cuchillonacampitejj uywanacajj sacrificio loktañataqui qharinucuscän ucanacasa.
44Mankha tokenquir uta ankäjjata, mankha tokenquir puncunacatsti yakhajja, pä utanacaw utjaraquïna, mayajja amsta tokenquiri mankha puncunsti aynach toker uñtata, mayasti aynach tokenquiri mankha tokenquir puncumpi chica, amsta toke uñtataraqui.
45Ucat uca jakesti saraquituwa: “Cawquïri utatejj aynach toke uñtatäqui ucajj sacerdotenacataquiwa, templon sirvipqui jupanacataqui,
46uqhamaraqui cawquïri utatejj amsta toke uñtatäqui ucasti cawquïri sacerdotenacatejj altaran sirvipqui ucanacataquiraquiwa. Jupanacasti Sadoc sat chachan wawanacapäpjjewa, levitanacatsti jupanac sapaquiraquiw, Tatitun altarapan sirviñataqui jac'achasipjjaspajja” sasa.
Mankhanquir uta ankäjjampi, templompi47Uca jakesti mankha tokenquir uta ankäjjaruw tupt'araqui, uca uta ankäjjasti suma cajonaraquïnwa, take toketa pheska tunca metroncama, altarasti templo nayräjjancaraquïnwa.
48Ucat uca jakesti templonquir utanacwa tupt'araquïna, ucar irpasinsti uca utanacan pilaranacapa tupt'araquïna, sapa pilarasti pä metro chicataniraquïnwa lanqhurojja. Puncusti anchorojj pakallko metroniraqui, ucanquiri utan pilaranacapasti anchorojj mä metro chicataniraqui.
49Ucanquiri utasti anchorojj tunca metroniraqui, mankharusti sojjta metroraqui, ucarusti mä gradanjama maqhatañaraquïnwa, ucansti tunca gradanacaw utjaraquïna. Sapa pilarampi chicasti mä jach'a thuru pilaraw utjaraquïna.
Who We AreWhat We EelieveWhat We Do
2025 by iamachristian.org,Inc All rights reserved.
