UJoweli 1 - IsiZulu 2020

Ukuhlasela Kwesikhonyane Sishaye Siqothule Ezweni

1Izwi likaSimakade elafika kuJoweli

indodana kaPhethuweli.

2Yizwani lokhu nina malunga,

nibeke indlebe nonke nina zakhamuzi zezwe.

Kwake kwenzeka yini lokhu emihleni yenu

noma ezinsukwini zokhokho benu na?

3Kutsheleni abantwana benu,

nabantwana benu bakutshele abantwana babo,

nabantwana babo bakutshele esinye isizukulwane.

4Okushiywe yisikhonyane kudliwe ngamaqhwagi,

nokushiywe amaqhwagi kwadliwa yisibotho,

kwathi okushiywe yisibotho kwadliwa yinkasa.

5Phaphamani, zidakwa,

nikhale, nilile zinkolotshe zewayini,

phela iwayini elimnandi

selisusiwe emlonyeni wenu.

6Ngokuba isizwe esinamandla

nesingenakubalwa sikhuphukele ezweni lami,

amazinyo aso ngamazinyo ebhubesi,

namazinyo aso emihlathi angawebhubesi lensikazi.

7Sicekele phansi umvini wami,

nomkhiwane wami sawuphundla

kwasala isiphunzi.

Saxebula amagxolo awo sawalahla,

amagatsha awo aba mhlophe qwa.

8Khala njengentombi embethe indwangu eyisaka

ililela umyeni wobusha bayo.

9Iminikelo yokusanhlamvu nokuphuzwayo

ayisalethwa endlini kaSimakade;

abaphristi, izinceku zikaSimakade bayalila.

10Amasimu onakele,

umhlabathi womile,

ngoba okusanhlamvu kushaziwe;

iwayini elisha lihwamukile,

namafutha amasha ashabalele.

11Jabhani balimi,

nikhale nina enilima izimvini

ngenxa kakolo nebhali,

ngokuba isivuno sensimu sishabalele.

12Umvini ubunile,

nomkhiwane womile;

amahananadi, amasundu,

izihlahla zamahhabhula

nemithi yonke yasendle kubunile,

impela intokozo iphelile kubantwana babantu.

13Mbathani indwangu eyisaka

nina baphristi, nilile,

nikhihle isililo nina zikhonzi ze-althare.

Wozani nilale ubusuku bonke

nembethe indwangu eyisaka

nina zinceku zikaNkulunkulu wami.

Ngokuba umnikelo wokusanhlamvu nowokuphuzwayo

akusalethwa endlini kaNkulunkulu wenu.

14Memezelani usuku olungcwele lokuzila ukudla,

nibize umhlangano,

niqoqele amalunga nazo zonke

izakhamuzi zezwe endlini kaSimakade

uNkulunkulu wenu,

nikhale kuSimakade.

15Maye ngalolo lusuku!

Ngokuba usuku lukaSimakade lusondele.

Luyakufika luyimbubhiso evela kuSomandla.

16Akuqothulwanga yini ukudla

phambi kwamehlo ethu,

kwaphela intokozo nenjabulo

endlini kaNkulunkulu wethu, na?

17Imbewu ibolile phansi kwamagade ayo;

izangobo zibhidliziwe,

izinqolobane zadilizwa,

ngokuba okusanhlamvu kushazile.

18Maye, sekububula nemfuyo!

Imihlambi yezinkomo yehla

yenyuka ikhungathekile,

ngokuba ayinamadlelo,

nemihlambi yezimvu ithwele kanzima.

19Ngikhala kuwe Simakade,

ngokuba amadlelo asendle

angqongqiswe ngumlilo,

nelangabi lizishise zonke izihlahla zasendle.

20Ngisho nezilwane zasendle zilangazelela Wena,

ngokuba imifula yamanzi ishile,

nomlilo uqothule amadlelo asendle.