ISihlabelelo Sezihlabelelo 2 - IsiZulu 2020

Intombi:

1 Ngiyimbali yaseSharoni,

nomnduze wezimfunda.

Insizwa:

2 Njengomnduze phakathi kwameva,

sinjalo isithandwa sami

phakathi kwezintokazi.

3 Njengesihlahla samahhabhula

phakathi kwezihlahla ehlathini,

unjalo othandiweyo wami

phakathi kwezinsizwa.

Emthunzini wakhe,

ngahlala phansi ngokwenama,

isithelo sakhe sasimnandi

emlonyeni wami.

4 Ungingenise endlini yewayini,

ibhanela lakhe,

phezu kwami, wuthando.

5 Ngondle ngamakhekhe anamagilebhisi omisiwe,

ungivuselele ngamahhabhula,

ngokuba ngiyafa wuthando.

6 Umkhono wakho wakwesokhohlo

ungumqamelo wekhanda lami

kuthi owangakwesokunene

ungigone ngawo.

7 Ngiyaniyala madodakazi

aseJerusalema

ngezimpala nemigakla;

ningaluvusi uthando kungakabi yisikhathi,

Luyekeni luziqubukele lona.

Isihlabelelo Sothando Sentombi (2)Intombi:

8Yizwi lothandiweyo wami lelo!

Bheka, weqa izintaba,

ugxuma phezu kwamagquma.

9 Othandiweyo wami

ufana nensephe

noma isixhumo sendluzele.

Bheka, lona omi ngemuva

kodonga lwakwethu;

ugqolozele emafasiteleni,

upopola ngamakhethini.

10Othandiweyo wami

waphendula wathi kimi:

“Vuka sithandwa sami,

simomondiya sami,

woza sihambe.

11Ngokuba ubusika sebudlulile,

nemvula ayisekho, alisani;

12 umhlaba usuhlobe ngezimbali,

isikhathi sokuthena imivini sesifikile,

sekuzwakala nomsindo wokulilizela kwamajuba

ezweni lakithi.

13 Umkhiwane usuthelile,

amakhiwane aseluhlaza,

nemivini iyaqhakaza,

kuthaphuka iphunga layo.

Vuka sithandwa sami,

muhlekazi wami,

woza sihambe.”

Insizwa:

14 Juba lami elisemifantwini yedwala

elisekusithekeni endaweni eyehlelayo,

mangikubone siqu sakho.

Mangizwe izwi lakho,

ngokuba izwi lakho limnandi,

nesiqu sakho siyabukeka.

15 Sibambeleni izimpungushe,

amazinyane azo

angazoni izivini,

ngokuba izivini zethu zisaqhakaza.

Intombi:

16 Othandiweyo wami ungowami,

nami ngingowakhe;

welusela phakathi kweminduze.

17 Kuze kuphole ilanga,

namathunzi abaleke,

phenduka wena

othandiweyo wami,

ufane nensephe

noma nesixhumo sendluzele

ezintabeni ezimakhelekehle.