ISililo 2 - IsiZulu 2020

Ukubhujiswa KweJerusalema

1 Maye!

INkosi yembese indodakazi iZiyoni

ngamafu entukuthelo yayo!

Ibulahle phansi ubukhazikhazi

buka-Israyeli,

yabubeka emhlabeni,

busuka ezulwini.

Ngosuku lwentukuthelo yayo,

ayilikhumbulanga ithempeli

eliyisenabelo sezinyawo zayo.

2 INkosi izibhubhise ngokungenaluzwelo,

zonke izindawo okuhlala kuzo uJakobe.

Ngentukuthelo yayo,

izibhidlizile izigqaba zendodakazi uJuda,

yaqumba phansi emhlabathini

umbuso, nababusi

yabathela ngehlazo.

3 Ngokuvutha kolaka lwayo

inqume zonke izimpondo zika-Israyeli,

yagodla isandla sayo sokunene,

ayamvikela ezitheni zakhe.

Ulaka lwayo lwamvuthela uJakobe,

lwashisa konke nxazonke.

4 Yansala umnsalo wayo njengesitha,

isandla sayo sokunene

samelana nathi,

yabulala konke okwakuthandeka emehlweni ethu;

ethendeni lendodakazi iZiyoni,

intukuthelo yayo yayikhafulisa okomlilo.

5 INkosi yaphenduka yanjengesitha,

yambhubhisa u-Israyeli,

yachitha zonke izigodlo zakhe,

yabhidliza izinqaba zakhe,

yandisa ukukhala nokulila

endodakazini uJuda.

6 Yachithachitha indlu yayo,

njengedlangala ensimini,

yabhubhisa indawo yayo yokuhlanganela.

USimakade wenza imikhosi emisiweyo

namaSabatha,

akwabe kusakhunjulwa eZiyoni;

ngokufutheka kolaka lwakhe,

waziqhelelanisa nenkosi nabaphristi.

7 INkosi yalilahla i-althare layo,

yashiya indawo yayo engcwele;

izindonga zezigodlo zamakhosi ayo yazinikela esitheni.

Sabanga umsindo omkhulu endlini kaSimakade

kwangathi kungosuku lomkhosi.

8 USimakade wayekuhlosile ukubhubhisa udonga

lwendodakazi iZiyoni;

welula intambo yokulinganisa,

akasibambanga isandla sakhe ekubhubhiseni;

washiya imigoqo nezindonga kukhala;

kuyincithakalo.

9 Amasango alo abishe emhlabathini;

usakaze, waphoqoza imigoqo yalo.

Inkosi nababusi sebephakathi kwezizwe,

akasekho ofundisa umthetho,

nabaphrofethi abasaboni mbono

ovela kuSimakade.

10 Izimpunga zendodakazi iZiyoni

zihleli phansi emhlabathini,

zithule du;

zizithele ngothuli emakhanda,

zibhince namasaka.

Izintombi zaseJerusalema

zigebisele amakhanda emhlabathini.

11 Amehlo ami akhathele ukukhala,

kuphethuka izibilini zami;

ngiphelelwe yithemba

ngenxa yokubhujiswa kwabantu bakithi,

nokuquleka kwezingane nabancelayo

emigwaqweni yomuzi.

12 Zikhalela onina,

zifuna isinkwa newayini,

lapho ziquleka njengabalimele kakhulu,

emigwaqweni yomuzi;

imiphefumulo yazo

iphumela ezifubeni zonina.

13 Ngingafakaza ngithini ngawe Jerusalema na?

Ngingakuqhathanisa nani na?

Ngingathini kuwe

ukuze ngikududuze,

ntombi eyindodakazi iZiyoni na?

Ngokuba incithakalo yakho

ibanzi njengolwandle;

ngubani ongakwelapha na?

14 Abaphrofethi bakho bakutshele imibono

engamanga newubuwula,

abakuvezanga obala ukuphambuka kwakho

ukuze uphenduke,

ungayi ekuthunjweni.

Bakutshele imibono engamanga neyinkohliso.

15 Bonke abedlula ngakuwe,

bashaya izandla, bethi:

“Ashila!”

Bayakunximfela, benikina amakhanda,

ndodakazi Jerusalema, bathi:

“Ngabe yiwo yini lo muzi

ababewubiza ngokuthi

ungubuhle obupheleleyo,

nentokozo yomhlaba wonke na?”

16 Zonke izitha zakho

ziyakuhleka, ziyakubhuqa;

zikugedlela amazinyo, zithi:

“Siligwinyile,

impela yilona lolu suku

obekukade silulindele,

manje silutholile, silubonile.”

17 USimakade wenze abekusophile,

ufeze izwi lakhe ayelishilo kwasemandulo;

ubhidlizile ngokungenaluzwelo,

isitha wasenza sathokoza phezu kwethu,

waphakamisa uphondo lwezitha zethu.

18 Izinhliziyo zabo mazikhale eNkosini;

wena ludonga lwendodakazi iZiyoni,

izinyembezi mazigelezise okwemifula,

mawungaphumuli imini nobusuku,

inhlamvu yeso lakho

ingakutholi ukuphumula.

19 Vuka umpongoloze ezinzulwini zobusuku,

inhliziyo yakho uyithulule njengamanzi

phambi kobuso beNkosi.

Phakamisela izandla zakho kuyo,

ukhulekele izingane zakho,

ezibulawa yindlala emajikeni

ayo yonke imigwaqo.

20 “Bheka, Simakade,

ngubani omunye osuwake wamphatha

ngalolu hlobo na?

Kuyikho yini ukuba onina badle

abantwana babo,

izingane zabo abazikhulisayo na?

Kuyikho yini ukuba abaphristi nabaphrofethi

babulawelwe e-althare leNkosi na?

21 “Abancane nabadala badindilize emigwaqweni;

izintombi nezinsizwa zami ziwe ngenkemba.

Uzibulale ngosuku lwentukuthelo yakho;

wazibulala ngokungenaluzwelo.

22 “Ubabize nxazonke abangesabisayo,

kwaba njengasosukwini owawulumisile;

akubanga bikho namunye

owaphunyula nowasindayo,

ngosuku lwentukuthelo kaSimakade.

Labo engabazala ngabakhulisa,

isitha sami sibaqothulile.”