Susana 1 - Cebuano Meaning-Based Bible

Ang Kaanyag ni Susana Nakadani sa Duha ka Maghuhukom

1Didto sa Babilonia may nagpuyo nga usa ka tawo nga ginganlag Joaquin

2nga naminyo kang Susana, anak ni Hilkias. Si Susana usa ka maanyag nga babaye ug mahadlokon sa Dios.

3Ang iyang mga ginikanan mga matinud-anon nga mga Judio nga nagmatuto sa ilang anak aron magkinabuhi subay sa Balaod ni Moises.

4Ang iyang bana nga si Joaquin dato kaayo. Ang iyang balay gilibotan sa anindot nga mga tanaman ug ang ubang mga Judio sagad nga magtapok didto alang sa mga tigom tungod kay tinamod man nilang tanan si Joaquin.

5Niadtong tuiga adunay duha ka pangulo sa katawhang Judio nga gitudlo ingon nga mga maghuhukom. Sila ang gipasabot sa dihang ang Ginoo miingon, “Adunay kahiwian diha sa Babilonia; ang mga maghuhukom wala maggiya sa katawhan.”

6Kining duha ka maghuhukom mag-adtoan sa balay ni Joaquin ug ang tanan nga may kaso mahitungod sa balaod moadto kanila didto.

7Matag udto, sa dihang manglakaw na ang tanang mga tawo aron sa pagpaniudto, nabatasan ni Susana ang pagsuroysuroy didto sa mga tanaman.

8Ang duha ka maghuhukom naibog kaayo kaniya busa maghulat sila sa duol aron makalantaw kaniya.

9Nabuang sila sa ilang tinguha kaniya busa wala na sila magtagad sa pag-ampo o sa ilang mga katungdanan sa pagkamaghuhukom.

10Matag usa kanila naninguha kang Susana apan wala sila magtug-anay sa ilang gibati

11kay matag usa kanila naulaw man sa pag-angkon sa iyang kaulag.

12Busa matag adlaw nagbantay sila nga maikagon aron makakita kaniya.

13Usa ka udto niana nag-ingnanay sila, “Tingpaniudto na! Tana, mamauli na kita.”

14Busa silang duha mitalikod ug mipauli sa ila apan wala madugay ang matag usa kanila mibalik aron pagtan-aw kang Susana ug sa wala damha nagkita silang duha. Sa sinugdan ang matag usa kanila misulay sa pagpasumangil sa iyang gibuhat didto apan sa kataposan silang duha nagtug-anay sa ilang kahidlaw kang Susana. Mihukom sila sa pagpaabot sa usa ka panahon nga ila siyang maabtan nga mag-inusara.

15-17Busa nagpunay sila ug paabot alang sa tukma nga higayon.

Ang mga Maghuhukom Misulay Paglugos kang Susana

Usa ka adlaw niana si Susana misulod sa tanaman ingon sa naandan uban sa iyang duha ka sulugoon nga babaye. Walay lain nga didto gawas sa duha ka maghuhukom nga nanago ug nangukoy kang Susana. Niadtong higayona init kaayo ug mihukom si Susana pagkaligo. Busa miingon siya sa iyang mga sulugoon, “Dad-i ako ug lana alang sa pagkaligo ug pahumot ug trangkahi ang mga ganghaan aron walay makabalda kanako.”

18Gitrangkahan sa mga sulugoon ang kinadak-ang ganghaan ug nanggula sila sa kilid sa ganghaan aron pagkuha sa gisugo kanila ni Susana. Wala sila makamatngon sa duha ka lalaki.

19Sa migula na ang mga sulugoon, ang duha ka maghuhukom nanggula gikan sa ilang gitagoan, nanagan ngadto kang Susana

20ug miingon kaniya, “Ang mga ganghaan gitrangkahan ug walay makakita kanato. Dugay na kaming nangandoy sa pagpakighilawas kanimo busa tumani kami sa among gusto.

21Kon dili ka, moadto kami sa hukmanan ug panumpaan namo nga hikit-an ka namo nga nagpagula sa imong mga sulugoon aron mag-inusara ikaw uban sa usa ka batan-on nga lalaki.”

22“WalaLev. 20:10; Deut. 22:22. na akoy kapaingnan,” nanghupaw si Susana. “Kon mosugot ako kaninyo, pahamtangan ako sa kamatayon tungod sa panapaw. Kon magdumili ako, malit-ag pa gayod ako ninyo.

23Apan palabihon ko nga butangbutangan ninyo ug sala kay sa magpakasala ako batok sa Ginoo.”

24Busa misinggit si Susana sa labing kusog nga tingog ug ang duha ka maghuhukom misugod usab pagsinggit ug mga pasangil

25samtang ang usa kanila midagan ug miabli sa ganghaan.

26Sa dihang ang mga sulugoon nga didto sa gawas nakadungog sa tanan nga kabanha, nanagan sila ngadto sa tanaman agi sa ganghaan sa kilid, aron pagsuta unsa ang nahitabo kang Susana.

27Ang mga maghuhukom miasoy sa ilang sugilanon ug ang mga sulugoon nahingangha ug nangaulaw. Wala pa gayoy sama niini nga gikasulti mahitungod kang Susana.

Ang mga Maghuhukom Misaksi batok kang Susana

28Pagkasunod adlaw, sa diha nga ang mga tawo nagkatigom didto sa balay ni Joaquin, miabot ang duha ka maghuhukom, puno sa tinguha sa pagtuman sa ilang daotan nga laraw sa pagpahamtang sa kamatayon ngadto kang Susana.

29Atubangan sa tibuok nga katawhan miingon sila, “Ipakuha ang asawa ni Joaquin nga si Susana, ang anak ni Hilkias.” Sa diha nga gitawag na siya,

30miabot siya uban sa iyang mga ginikanan, mga anak, ug sa tanan niyang kaparyentihan.

31Si Susana hilabihan kaanyag ug katahom

32mao nga ang duha ka daotan nga maghuhukom misugo kaniya nga kuhaon ang salimbong sa iyang nawong aron makapahimulos sila sa pagsud-ong kaniya.

33Ang iyang banay ug ang uban nga mga tawo didto nanghilak.

34Unya mibarog ang duha ka maghuhukom atubangan sa mga tawo, gibutang nila ang ilang mga kamot ibabaw sa ulo ni Susana ug misugod sila sa paghimo sa ilang mga pasangil batok kaniya.

35Naghilak si Susana apan mihangad siya ngadto sa langit tungod kay misalig man siya sa Ginoo.

36Ang duha ka lalaki mihatag sa mosunod nga pamasangil: “Naglakaw kami didto sa tanaman sa dihang kining babayhana miabot uban sa iyang duha ka sulugoon nga dalagita. Gitrangkahan niya ang ganghaan ug gipalakaw niya ang mga sulugoon.

37Unya usa ka batan-ong lalaki nga nagtago didto sa tanaman miduol kaniya ug nagdulog sila.

38Didto kami sa usa ka suok sa tanaman ug sa pagkakita namo sa nanghitabo, nanagan kami

39ug nasakpan namo sila diha sa ilang buhat. Gisulayan namo ang pagdakop sa lalaki apan kusgan ra siya kaayo alang kanamo. Midagan siya ug giablihan niya ang ganghaan ug miipsot.

40Apan nakahimo kami sa pagdakop sa babaye. Gipangutana namo siya kinsa kadtong lalaki apan midumili siya pagtug-an kanamo. Among panumpaan nga ang among gisaysay tinuod gayod.”

41Tungod kay ang duha ka lalaki dili lamang mga pangulo sa katilingban kondili maghuhukom pa gayod, ang mga tawo mituo sa ilang gisugilon ug gipahamtangan si Susana sa silot nga kamatayon.

Si Susana Giluwas ni Daniel

42Unya si Susana misinggit sa kusog, “O Dios nga walay kataposan, walay butang nga matago gikan kanimo. Nahibalo ikaw sa tanan sa wala pa kini mahitabo.

43Ania ako dinhi nga hapit na patyon apan nahibalo ikaw nga ako walay sala ug nga kining mga tawhana namakak. Nganong kinahanglan mang patyon ako?”

44Ang iyang pag-ampo gidungog sa Ginoo

45kinsa nagpadala ug usa ka batan-ong lalaki nga ginganlag Daniel. Sa diha nga gidala na si Susana aron pahamtangan sa kamatayon,

46misinggit si Daniel, “Dili ako buot nga ilhong usa sa mga magpahamtang kaniya sa kamatayon!”

47Ang tanan milingi aron pagtan-aw kaniya ug nangutana, “Unsay buot nimong ipasabot?”

48Mibarog si Daniel atubangan kanila ug miingon, “Katawhan sa Israel, pagkabuang ba ninyo! Inyo bang silotan sa kamatayon ang usa ka babaye nga Israelita tungod niining matanga sa mga saksi? Wala gani kamo mosulay sa pagpangita sa kamatuoran.

49Abliha pag-usab ang kaso. Ang pagmatuod nga gihatag niining mga tawhana usa ka dakong bakak.”

50Busa ang tanang mga tawo midali pagbalik ngadto sa husayanan ug ang mga opisyal miingon kang Daniel, “Ang Dios naghatag kanimo ug kaalam labaw sa imong panuigon busa dali diri ug pasabta kami unsa ang imong buot ipasabot.”

51Si Daniel miingon kanila, “Bulaga ang duha ka maghuhukom ug tugoti ako sa pagsukitsukit kanila sa tinagsa.”

52Unya gitawag ni Daniel ang unang maghuhukom ug giingnan, “Ikaw daotan nga tigulang, karon kinahanglan tubagon nimo ang mahitungod sa tanang mga sala nga imong nahimo.

53NaghatagExo. 23:7. ikaw ug dili matarong nga mga hukom. Gisilotan nimo ang walay sala ug nakalingkawas ang sad-an bisan kon ang Ginoo nag-ingon, ‘Ayaw pagsiloti sa kamatayon ang tawo nga walay sala.’

54Karon kon tinuod man gayod nga hikit-an nimo silang duha nga naghilawasay, tug-ani ako: ubos sa unsang kahoya man sila naghimo niini?”

“Ubos sa usa ka gamayng kahoy nga goma,” mitubag siya.

55Si Daniel miingon kaniya, “Maayo! Kanang bakaka bayran mo sa imong kinabuhi. Ang anghel sa Dios gisugo aron pikason ka.”

56Unya ang unang maghuhukom gipalakaw ug gikuha ang ikaduha ug gipaatubang kang Daniel. Miingon si Daniel kaniya, “Ikaw mas nahisama sa usa ka taga-Canaan kay sa taga-Juda. Ang katahom niining babayhana nagpasalimoang sa imong panghukom ug ang kaulag nakadunot sa imong panghunahuna.

57Naanad ikaw sa pagtuman sa imong gusto uban sa mga kababayen-an sa Israel tungod kay nahadlok man sila kanimo apan ania karon ang usa ka babaye nga Judio ug dili siya mohatag kanimo sa imong gusto.

58Karon tug-ani ako, ubos sa unsang kahoya nimo sila nakita?”

Mitubag siya, “Ubos sa usa ka dakong kahoy nga roble.”

59Miingon si Daniel, “Maayo! Kanang bakaka pagabayran mo sa imong kinabuhi. Ang anghel sa Dios naghulat dala ang iyang espada, andam sa pagpikas kanimo aron kamong duha pagalaglagon.”

60Unya ang tanang mga tawo naninggit ug nagdayeg sa Dios nga nagluwas kanilang mga nagsalig kaniya.

61Misumbalik sila batok sa duha ka maghuhukom tungod kay gimatuod ni Daniel nga sila namakak ubos sa panumpa.

62AngDeut. 19:16-21. Balaod ni Moises nagsaysay nga ang mga tawo nga maghatag ug bakak nga pagmatuod makadawat sa samang silot nga dawaton unta sa gipasanginlan nga tawo. Busa ang duha ka maghuhukom gipahamtangan sa kamatayon ug ang kinabuhi sa usa ka babaye nga walay sala naluwas.

63Ang mga ginikanan ni Susana, ang iyang bana ug ang tanan niyang mga paryenti nagdayeg sa Dios tungod kay namatud-an si Susana nga dili sad-an sa gipasangil kaniya.

64Sukad niadtong adlawa, si Daniel gipasidunggan pag-ayo.