Judit 15 - Cebuano Meaning-Based Bible

Ang Kadaogan sa Israel

1Sa pagkasayod sa mga sundalo sa nahitabo, nangalisang sila

2ug nangurog sa kahadlok. Nagkatibulaag silang tanan sa nagkalainlaing dapit sa kampo. Nag-iyahay silag panagan sa ilang pagsulay sa pag-ikyas subay sa mga agianan sa mga bukid ug mga walog.

3Ang mga kasundalohan nga nagkampo didto sa kabukiran nga naglibot sa Betulia misibog usab. Unya ang tanang mga sundalo nga Israelita miabot sa pagsulong kanila.

4Si Uzias nagpadalag mga mensahero ngadto sa mga lungsod sa Betomestaim, Bebai, Coba ug Cola ug sa tibuok kayutaan sa Israel aron pagpahibalo sa tanan unsa ang nahitabo ug pag-awhag kanila sa pag-uban sa paggukod ug paglaglag sa mga kaaway.

5Sa pagkadawat nila sa mensahe, silang tanan miataki sa mga taga-Asiria ug gipanggukod nila sila hangtod sa Coba ug gipanigbas sila sa ilang pagpanagan. Bisan ang katawhan sa Jerusalem ug ang uban nga nagpuyo sa mga bukid miapil sa pag-ataki sa diha nga ang mga mensahero nagsugilon kanila unsa ang nahitabo didto sa kampo sa mga taga-Asiria. Ang katawhan sa kayutaan sa Gilead ug Galilea mibabag sa mga agianan sa mga nanibog nga taga-Asiria ug gipahiagom nila sila sa dagkong kapildihan. Gipanggukod sila hangtod sa kayutaan nga naglibot sa Damasco.

6Ang nahibilin nga mga tawo sa Betulia nanglugsong ngadto sa kampo sa taga-Asiria. Gipangsakmitan kini ug gipangdala ang igong mga sinakmit nga nakapahimo nilang mga dato kaayo.

7Sa paghiuli sa mga sundalo nga Israelita gikan sa pagpamatay, gipanguha nila alang sa ilang kaugalingon ang nahibilin. Hilabihan kini ka daghan nga ang mga tawo sa kalungsoran ug kabalangayan didto sa mga bungtod nakabahin usab sa mga sinakmit.

Ang mga Israelita Nagsaulog sa Kadaogan

8Ang Pangulong Pari nga si Joaquim ug ang Konseho sa Israel nangabot gikan sa Jerusalem aron sila mismo makakita sa dagkong mga butang nga gihimo sa Ginoo alang sa iyang katawhan ug aron makigkita kang Judit ug pagpahalipay kaniya.

9Sa paghiabot nila, silang tanan midayeg kang Judit sa pag-ingon, “Ikaw ang himaya sa Jerusalem, ang bayani sa Israel, ang garbo ug kalipay sa atong lungsod!

10Nahimo mo kining dakong kadaogan alang sa Israel pinaagi sa imong kaugalingon. Ang Dios nga Makagagahom sa tanan nahimuot sa imong nahimo. Manalangin unta siya kanimo sa tibuok nimong kinabuhi.”

Ang tanang mga tawo mitubag, “Amen.”

11Ang mga tawo nanakmit sa kampo sa mga taga-Asiria sulod sa 30 ka adlaw. Gihatag kang Judit ang tolda ni Holofernes, ang tanan niyang mga galamiton, mga pinggan, ang iyang mga higdaanan ug ang tanan niyang kahimanan sa panimalay. Gidawat kini ni Judit ug gikarga sa iyang mula kutob sa iyang mahimo. Unya gidala usab niya ang iyang mga karomata ug gipuno usab niya kini.

12Ang tanang mga babaye nga Israelita miabot aron pagpakigkita kaniya ug nag-awit silag mga pagdayeg kaniya ug nagsayaw aron pagpasidungog kaniya. Niining masadya nga higayon si Judit ug ang ubang mga babaye nagwarawara ug mga sanga sa kahoy

13ug nagpurong silag mga korona nga dahon sa mga olibo. Si Judit nagpahimutang sa unahan sa pasunding aron mag-una sa mga babaye sa ilang pagsayaw. Ang tanang mga lalaki sa Israel misunod nga nagpurong ug mga korona sa mga bulak. Nagdala sila sa ilang mga hinagiban ug nag-awit sa mga awit sa pagdayeg.