1Adunay panahon nga dili maayo ang pagbadlong ug tingalig mas maayo ang pagpakahilom.
2Apan mas maayo pa nga mamadlong kay sa pagluom sa imong kasuko.
3Angkona kon ikaw masayop ug malikayan nimo ang kaulaw.
4Ang paggamit ug kusog aron pagpalutaw sa usa ka butang nahisama sa usa ka tawo nga kinapon nga buot molugos sa usa ka dalaga.
5May mga tawo nga giila nga makinaadmanon tungod sa ilang pagpakahilom; ang uban wala magustohi tungod kay hilabihan ra sila nga mosulti.
6Ang ubang mga tawo magpakahilom tungod kay wala silay ikasulti. Ang uban magpakahilom tungod kay nahibalo sila sa husto nga panahon sa pagsulti.
7Ang usa ka tawo nga makinaadmanon dili mosulti hangtod sa husto nga panahon apan ang usa ka hambugiro ug buangbuang wala mahibalo kanus-a kanang panahona.
8Walay makaagwanta sa usa ka tawo nga tag-as kaayo ug mga sulti ug dili mohatag sa uban ug higayon sa pagsulti.
Ang Kalit nga mga Kausaban sa Kapalaran9Ang daotang kapalaran makadala usahay ngadto sa kalamposan ug ang maayong kapalaran usahay magdala ngadto sa kapildihan.
10Ang pagkamanggihatagon usahay dili magpulos kanimo apan usahay usab bayran ikaw niini sa duha ka pilo.
11Ang dungog mahimo nga mosangpot sa kaulawan apan adunay mga tawo nga kaniadto wala hiilhi apan karon dungganan na.
12Usahay ang gipakaingon ug barato nga pagkapalit mahal diay kaayo.
13Ang maalamon makadani ug mga higala pinaagi sa iyang mga pulong. Apan ang buangbuang walay maani gikan sa iyang pagpang-ulog-ulog.
14Ang gasa sa buangbuang dili maisip nga panalangin kay magpaabot siyag dakong balos niini.
15Dili siya manggihatagon; hilabihan siya ka hinawayon ug sabaan pa gayod. Kon magpahulam siya kanimo ug usa ka butang karon, buot siya nga mahibalik kini ugma. (Makalagot kaayo ang tawo nga sama niini.)
16Unya ang buangbuang moingon, “Walay nakagusto kanako. Walay nalipay sa akong gibuhat alang kanila. Dawaton nila ang akong ihatag apan inigtalikod nako daoton nila ako.”
17Wala gayod siya masayop. Kanunay ug daghan gayod ang manghimaraot kaniya.
Ang Dili Mao nga Pagsulti18Ang pagkadalin-as sa dila mas daotan pa kay sa pagkadalin-as diha sa aseras. Ang daotan mahulog ngadto sa kadaotan ingon ka kalit sa usa ka tawo nga madalin-as ug masukamod.
19Ang usa ka tawo nga walay pamatasan nahisama niadtong ngil-ad nga mga sugilanon nga kanunayng ipanugilon sa mga tawo nga walay hibangkaagan.
20Walay motuo sa usa ka sanglitanan kon isulti kini sa usa ka buangbuang sa dili hustong panahon.
21Kon ang usa ka tawo hilabihan ka pobre nga dili siya makagasto sa pagpakasala, makapahulay siya diha sa usa ka hinlo nga konsensya.
22Ang usa ka tawo mahimong makaluluoy tungod lamang sa walay hinungdan nga kaulaw.
23Kon saaran mo ang usa ka higala ug usa ka butang tungod kay maikugon ka sa pagbalibad, ikaw naghimog usa ka kaaway sa walay igong hinungdan.
24Ang pagpamakak maoy usa ka mangil-ad nga buling diha sa kinaiya sa usa ka tawo apan ang mga ignorante naghimo niini sa tanang panahon.
25Ang usa ka kawatan mas maayo kay sa usa ka tawo nga naanad sa pamakak apan silang duha nagpadulong ngadto sa kadaotan.
26Ang usa ka bakakon walay dungog. Kanunay gayod siyang maulawan.
Ang Pagkatinugyanan sa Kaalam27Pagsulti nga maalamon ug magmalampuson ka. Ang but-an nga tawo makapahimuot sa gamhanang mga tawo.
28Busa paninguha nga mahimuot sila kanimo aron pasayloon nila ang imong mga sayop sama nga ang tawo nga nagtikad sa yuta makaani gayod.
29Ang mga gasa ug mga suborno makabuta bisan sa mga tawong maalamon ug magpugong kanila sa pagkamaligdong diha sa ilang pagsaway.
30Ang kaalam nga dili ibungat nahisama sa usa ka bahandi nga gitagoan—ang duha walay kapuslanan.
31Apan ang usa ka tawo nga nagtabon sa iyang pagkabuangbuang mas maayo pa kay sa usa ka tawo nga nagtago sa iyang kaalam alang lamang sa iyang kaugalingon.
Who We AreWhat We EelieveWhat We Do
2025 by iamachristian.org,Inc All rights reserved.
