1Sa pagkadungog ni Demetrio nga si Nicanor ug ang iyang kasundalohan nangaparot, gipadala niya pag-usab si Baquides ug si Alcimo ngadto sa Judea, niining higayona uban sa pundok sa kasundalohan nga taga-Siria.
2Milihok sila subay sa Dalan sa Gilgal, gilibotan nila pag-asdang ang Mesalot didto sa Arbela, nakuha nila kini, ug gipatay nila ang daghang mga tawo.
3Sa unang bulan sa tuig 152, nagkampo sila atbang sa Jerusalem.
4Gikan didto nanggula sila ngadto sa Berea uban sa 26,000 ka sundalong naglakaw ug 20,000 ang nagkabayo.
5Nagkampo si Judas didto sa Elasa uban sa 3,000 ka batid nga sundalo
6apan sa pagkakita nila sa dako kaayong pundok sa kasundalohan sa kaaway, nangalisang sila. Busa daghan ang mga sundalo nga mibiya ug 800 na lang ka sundalo nga Judio ang nahibilin.
7Sa pagkakita ni Judas nga ang iyang kasundalohan nagkadiyotay ug nga ang gubat hapit na mosugod, naguol siya tungod kay wala nay igong panahon sa pagtigom sa iyang kasundalohan.
8Nawad-an siya sa kadasig apan miingon siya kanila nga nagpabilin pa uban kaniya, “Mangandam kita alang sa pagsulong. Basin ug makabuntog pa kita kanila.”
9Ang iyang mga tawo misulay sa pagbugnaw kaniya aron dili siya mopadayon. Miingon sila, “Wala kitay igong kusog. Mosibog kita karon ug luwason ta ang atong kinabuhi. Unya makahimo kita pagbalik uban sa dugang nga kasundalohan ug makaharong kita sa kaaway. Wala kitay igong gidaghanon sa mga tawo karon.”
10Si Judas mitubag, “Dili ako motugot nga ingnon nga ako midagan gikan sa usa ka gubat. Kon ang atong panahon miabot na, magpakamatay kita nga maisogon alang sa atong kaubang mga Judio ug dili kita magbilin ug bisan unsang buling sa atong dungog.”
11Ang kasundalohan sa Siria nanggula sa kampo ug nagpahimutang sila aron sa pagpakigsangka batok sa mga Judio. Ang mga nagkabayo gibahin sa duha. Ang mga igsusulong nga tropa didto sa atubangan nga laray apan ang mga tigpana ug sila nga nagamit sa mga saplong miuna sa kinadak-an nga bahin.
12Si Baquides nagpahimutang sa tuo. Midis-og ang mga sundalong naglakaw nga gisalipdan sa duha ka kilid sa mga nagkabayo ug gihuyop ang mga trumpeta sa gubat. Ang mga sundalo ni Judas mipatingog usab sa ilang mga trumpeta.
13Ang yuta mikurog sa kagahob sa diha nga nagkasangka ang duha ka pundok sa kasundalohan ug nag-away sila sukad sa buntag hangtod sa pagka gabii.
14Sa pagkakita ni Judas nga si Baquides ug ang kinadak-an sa gahom sa kasundalohan nga taga-Siria didto sa tuo, ang tanan sa iyang labing maisog nga mga tawo mitipon kaniya
15ug gipulpog nila ang tuong bahin sa taga-Siria. Gigukod sila nila ni Judas hangtod sa tiilan sa kabungtoran.
16Apan sa pagkakita sa mga taga-Siria nga didto sa wala nga ang ilang tuong bahin gipulpog, mibalos sila pag-ataki kang Judas ug sa iyang mga tawo gikan sa layo.
17Ang panag-away nahimong mapintas kaayo ug daghang nangamatay sa duha sa pundok.
18Sa kataposan si Judas mismo napatay. Unya ang tanan niyang mga tawo nanagan.
19Gikuha ni Jonatan ug ni Simon ang lawas sa ilang igsoon ug gilubong kini didto sa lubnganan sa ilang banay didto sa Modin
20ug didto sa lubnganan ila siyang gihilakan. Ang tibuok Israel nagbangotan tungod kaniya uban sa dakong kasakit sulod sa daghang mga adlaw. Miingon sila,
21“Naunsa ba nga ang gamhanang bayani ug manluluwas sa Israel namatay man!”
22Ang ubang mga binuhatan ni Judas, ang iyang mga sangka, ang iyang maisog nga mga buhat ug ang iyang dagkong mga nahimo daghan ra kaayo kon sulaton.
Si Jonatan Mipuli kang Judas23Human sa kamatayon ni Judas, ang mga mabudhion nga walay giilang balaod misugod pagtungha sa bisan diin didto sa Judea ug mibalik ang tanang mga tawo nga daotan.
24Niadtong panahona usab, may usa ka dakong gutom ug ang tibuok nasod mibali ngadto sa pundok sa mga mabudhion.
25Gitudlo pagtuyo ni Baquides ang pipila ka mga Judio nga mabudhion aron mahimong magmamando sa nasod.
26Kining mga tawhana nangita sa mga higala ni Judas ug gidala silang tanan atubangan ni Baquides ug gipahamtangan sila niya sa mga pagsakit ug mga pagpakaulaw.
27Panahon kadto sa dakong kagubot alang sa Israel ug kini mas daotan pa kay sa bisan unsa nga nahitabo kanila sukad sa panahon nga wala na silay mga propeta.
28Unya ang tanang mga higala ni Judas nagtigom ug miingon kang Jonatan,
29“Sukad mamatay ang imong igsoon nga si Judas, wala nay sama kaniya nga nakapangulo kanamo batok sa atong mga kaaway, batok kang Baquides ug kanila nga nagsupak kanato gikan sa atong kaugalingong katawhan.
30Busa karong adlawa gipili ka namo aron maoy mopuli kaniya sa pagkapangulo ug magmamando namo aron pagpadayon sa atong gubat.”
31Gidawat ni Jonatan ang pagkapangulo niadtong adlawa ug mipuli siya sa iyang igsoon nga si Judas.
Ang mga Pagpakiggubat ni Jonatan32Sa pagkasayod ni Baquides niini, nahugot ang iyang hunahuna sa pagpatay kang Jonatan.
33Apan sa paghiabot niining balita ngadto kang Jonatan, mikagiw siya uban sa iyang igsoon nga si Simon ug sa ilang mga tawo ngadto sa kamingawan sa Tecoa ug nagkampo sila didto sa linaw sa Aspar. (
34Nasayod niini si Baquides sa Adlawng Igpapahulay ug mitabok siya sa Jordan kuyog sa tibuok niyang kasundalohan.)
35Gipadala ni Jonatan ang iyang igsoon nga si Juan nga maoy nag-atiman sa mga banay sa mga sundalo aron paghangyo sa mga taga-Nabatos nga mga higala nila aron tugotan sila pagbutang didto sa ilang karga.
36Apan ang mga Jambrihanon sa Medeba miataki kang Juan, midakop kaniya ug gisakmit ang tanan nga mga karga.
37Unya human niini si Jonatan ug ang iyang igsoon nga si Simon nasayod nga ang mga Jambrihanon hapit na magsaulog ug usa ka importante nga kasal ug nga adunay usa ka pasunding sa kalaslon gikan sa lungsod sa Nadabat. Ang pangasaw-onon anak sa usa sa mga bantogang prinsipe sa Canaan.
38Si Jonatan ug si Simon gusto nga manimalos tungod sa kamatayon sa ilang igsoon nga si Juan busa sila ug ang ilang mga tawo nanungas sa usa sa mga bukid ug nanago didto.
39Nagbantay sila ug nakita nila ang usa ka masaba nga pundok sa katawhan nga daghan kaayog karga. Ang pamanhonon, ang iyang mga higala ug ang iyang mga paryenti nagpadulong sa pagsugat sa mga kauban sa pangasaw-onon. Maayo silang pagkasangkap sa mga hinagiban ug nagtugtog sila ug mga instrumento sa musika ug mga tambol.
40Gibanhigan sila sa mga Judio ug gipatay ang daghan kanila ug ang nahibilin miikyas ngadto sa kabukiran samtang gisakmit sa mga Judio ang tanan nilang mga kabtangan.
41Busa ang kasal nahimong usa ka pagbangotan ug ang ilang masadya nga honi nahimong mga awit sa lubong.
42Si Jonatan ug si Simon nakapanimalos sa hingpit tungod sa kamatayon sa ilang igsoon ug namauli sila ngadto sa mga kadaplinan sa Jordan.
43Nakadungog mahitungod niini si Baquides ug miabot siya sa Adlaw nga Igpapahulay didto sa mga tampi sa Suba sa Jordan uban sa usa ka dakong pundok sa kasundalohan.
44Si Jonatan miingon ngadto sa iyang mga tawo, “Karon kinahanglan nga makig-away kita alang sa atong kinabuhi. Ania kita sa mas malisod nga kahimtang kay sa nahimutangan nato kaniadto.
45Ang kaaway anaa sa atong atubangan, ang suba anaa sa atong luyo ug ang mga kalapokan ug kalibonan anaa sa duha nato ka kilid ug wala na kitay kalutsan.
46Busa pag-ampo kamo karon sa Ginoo aron luwason kita gikan sa atong mga kaaway.”
47Gisugdan ang gubat ug si Jonatan ug ang iyang mga tawo hapit na makapatay kang Baquides, sa diha nga milighot siya ngadto sa luyo sa kasundalohan.
48Busa si Jonatan ug ang iyang mga tawo nangambak ngadto sa Jordan ug nanglangoy sa pikas tampi aron makalingkawas sila ug ang kasundalohan nga taga-Siria wala motabok sa Suba aron paggukod kanila.
49Niadtong adlawa si Baquides napildihan ug mga 1,000 ka tawo.
50Human mahibalik si Baquides ngadto sa Jerusalem, ang mga taga-Siria nagtukod ug mga kota nga adunay tag-as nga mga paril ug mga pultahan nga tinarangkahan alang sa pipila ka mga lungsod sa Judea: sa Emmaus, sa Bet Horon, sa Betel, sa Timnat, sa Peraton, sa Tefon ug sa kota sa Jerico.
51Kining tanang mga dapit iyang gibutangan ug mga tropa aron pagsamok sa mga Judio.
52Gilig-on usab niya ang mga kota sa mga lungsod sa Betzur ug sa Geser ug sa kota sa Jerusalem. Gibutangan usab niya ug mga bahin sa kasundalohan didto ug gipundok didto ang mga pagkaon ug kinahanglanon.
53Unya gikuha niya ang mga anak nga lalaki sa mga dagkong tawo sa nasod aron mahimong mga patinga ug gipapriso sila didto sa kota.
54Sa ikaduha nga bulan sa tuig 153, ang Pangulong Pari nga si Alcimo misugo nga ang paril sa patyo sa sulod sa Templo lumpagon. Makaguba unta kini sa nahimo sa mga propeta; apan igo nga nasugdan ang buhat
55giataki sa sakit si Alcimo ug ang buhat nahunong. Wala na siya makalihok ug wala makabuka sa iyang baba, wala na siya makasulti o bisan gani makahimo ug testamento alang sa iyang banay.
56Namatay siya sa dakong kasakit.
57Sa pagkasayod ni Baquides nga si Alcimo namatay na, mibalik siya ngadto kang Hari Demetrio ug ang yuta sa Judea nakabaton ug kalinaw sulod sa duha ka tuig.
58Unya ang tanan nga mga mabudhion nagtigom ug miingon, “Tan-awa ra, si Jonatan ug ang iyang mga tawo nagpuyo nga malinawon ug kawalay kabilinggan. Kon pabalikon nato nganhi karon si Baquides, madakpan silang tanan sa usa lamang ka gabii.”
59Nangadto sila aron pagpakigsabot kang Baquides mahitungod niini
60ug migula si Baquides uban sa usa ka dakong pundok sa kasundalohan. Nagpadala siya ug tinago nga mga sulat ngadto sa tanan niyang mga kaabin didto sa Judea nga naghangyo kanila nga sikupon si Jonatan ug ang iyang mga tawo. Apan wala sila makahimo niini tungod kay ang laraw nga daotan nahibaloan man.
61Si Jonatan ug ang iyang mga tawo midakop sa 50 sa mga pangulo nga mabudhion nga may labot niadtong laraw ug gipamatay sila.
62Unya si Jonatan, si Simon ug ang ilang kasundalohan misibog ngadto sa Betbasi didto sa kamingawan. Gitukod nila pag-usab ang nangaguba nga mga kota ug gilig-on nila ang mga panalipod sa lungsod.
63Sa pagkasayod ni Baquides mahitungod niining tanan, gitigom niya ang iyang tibuok kasundalohan ug gipaandam niya ang iyang mga kaabin didto sa Judea.
64Giataki niya ang Betbasi gikan sa tanang kilid ug nagtukod siya ug mga kahimanan sa pag-ataki. Human molungtad ang gubat sa taas nga panahon,
65si Jonatan miipsot ngadto sa kabukiran uban sa gamay nga pundok sa mga tawo ug gibilin ang iyang igsoon nga si Simon nga maoy magdumala sa lungsod.
66Gibuntog ni Jonatan si Odomera ug ang iyang katawhan ug unya giataki niya ug gilaglag ang kampo sa mga Pasirihanon. Sa nabuntog na nila sila, mitipon sila kang Jonatan ug midasdas uban kaniya sa iyang pag-ataki batok kang Baquides.
67Dungan niini, si Simon ug ang iyang mga tawo midali pagpanggula gikan sa lungsod ug gisunog nila ang mga plataporma nga gamitonon alang sa pag-ataki.
68Si Baquides naapiki pag-ayo diha sa panagsangka ug tungod niini wala matuman ang tanan niyang mga laraw ug napildi siya.
69Hilabihan niyang pungota sa mabudhion nga mga Judio nga nag-aghat kaniya sa pag-adto sa Judea busa gipamatay niya ang daghan kanila.
Unya mihukom si Baquides sa pagbalik ngadto sa iyang kaugalingong yuta,
70apan sa pagkasayod ni Jonatan niini, nagpadala siya ug mga embahador ngadto kang Baquides aron paghikay ug mga kasabotan sa kalinaw ug sa pagpapauli sa mga binilanggo nga Judio.
71Miuyon si Baquides sa paghimo niini sumala sa gipangayo ni Jonatan ug nanumpa siya nga tugotan niya nga magpuyo si Jonatan nga malinawon tibuok niyang kinabuhi.
72Gitugyan ni Baquides ang mga binilanggo ug mipauli siya ngadto sa iyang kaugalingong yuta. Wala na gayod siya moadto sa kayutaan sa mga Judio.
73Natapos ang gubat didto sa Israel. Mipuyo si Jonatan sa Micmas ug misugod pagdumala sa katawhan ug sa pagpuo sa mga mabudhion nga mga Judio nga gikan sa Israel.
Who We AreWhat We EelieveWhat We Do
2025 by iamachristian.org,Inc All rights reserved.
