1Ayaw hagita ang usa ka tawo nga gamhanan kay tingali unyag mahulog ka sa iyang kamot.
2Ayaw pakig-away sa usa ka tawo nga dato kay tingali unyag subornohan niya ang mga tawo aron mosaksi sila batok kanimo. Ang bulawan nakalaglag sa daghang mga tawo ug nakadaot sa mga hari.
3Ayaw pakiglalis sa tawo nga kusog mosulti kay igo lang unya ikaw nga magdugang ug sugnod sa iyang kalayo.
4Ayaw kataw-i ang usa ka tawo nga walay batasan kay tingali unyag iyang pakaulawan ang imong mga katigulangan.
5Ayaw sawaya ang tawo nga mibiya na sa pagpakasala. Hinumdomi nga kitang tanan makasasala.
6Ayaw sawaya ang usa ka tawo tungod lamang kay siya tigulang; pipila kanato nagkatigulang na usab.
7Ayaw kalipay tungod sa kamatayon sa usa ka tawo; hinumdomi nga kitang tanan mamatay usab.
8Ayaw ibaliwala ang gisulti sa maalam nga mga tawo. Tun-i ang ilang mga sanglitanan kay gikan kanila makabaton kag kaalam ug makakat-on sa pag-alagad sa mga bantogang tawo.
9Matngoni ang isulti sa mga tigulang kay sila mismo nakakat-on usab gikan sa mga nag-una kanila. Makakat-on ikaw gikan kanila ug makatudlo sila kanimo unsaon pagtubag sa dihang gikinahanglan kini.
10Ayaw gayod hatagi ang usa ka makasasala ug dugang nga higayon sa pagpakasala kay tingali unyag ikaw mismo ang madaot.
11Dili maayo nga motindog ka ug mobiya sa usa ka tawo nga walay ulaw. Tingali unyag tuison niya ang imong mga pulong ug gamiton kini batok kanimo.
12Dili maayo nga magpahulam ikaw ngadto sa usa ka tawo nga mas gamhanan kay kanimo. Kon imo kining buhaton, maayo pag isipon mo na lang kini nga nawala.
13Ayaw garantiyahi ang hulam sa usa ka tawo kay basig ikaw unya ang makabayad niini. Kon himoon mo kini, kinahanglang andam ka sa pagbayad sa maong hulam.
14Ayaw pagkiha batok sa usa ka maghuhukom. Makadaog gayod siya tungod sa iyang katungdanan.
15Ayaw pagbiyahe uban sa usa ka tawo nga danghag. Wala kay makuha niini gawas sa kasamok. Buhaton niya ang bisan unsang binuang nga iyang higustohan ug mamatay ikaw uban kaniya.
16Ayaw pakiglalis sa usa ka tawo nga init ug ulo ug ayaw pag-adto sa usa ka dapit nga awaaw nga kamo rang duha. Dili siya magpanuko sa paggamit sa iyang kusog ug hasmagan ikaw niya sa diha nga walay makatabang kanimo.
17Ayaw pagpangayo ug tambag gikan sa usa ka tawo nga buangbuang. Dili siya makahimo pagtago sa imong itug-an kaniya.
18Ayaw pagbuhat ug bisan unsa atubangan sa usa ka laing tawo sa mga butang nga kinahanglang imong tagoon kay wala ka masayod kon unsay iyang ibutyag.
19Ayaw ipadayag ang imong tinagoang mga hunahuna kang bisan kinsa. Kon imo kining himoon, sama rag imong giusikan ang tanang maayong kahigayonan.
Who We AreWhat We EelieveWhat We Do
2025 by iamachristian.org,Inc All rights reserved.
