Tobit 8 - Cebuano Meaning-Based Bible

Gipalayas ang Demonyo

1Sa pagkahuman na sa pagpangaon ug panahon na sa pagpangatulog, si Tobias gidala sa mga ginikanan ni Sara ngadto sa lawak nga higdaanan.

2Nahinumdom si Tobias sa mga tugon ni Rafael. Busa gikuha niya ang atay ug kasingkasing sa isda sulod sa iyang puntil diin iya kining gitagoan. Unya iya kining gibutang sa insenso nga nag-aso.

3AngMat. 12:43. baho nakapalayas sa demonyo ug mikagiw kini ngadto sa Ehipto. Gigukod siya ni Rafael ug hiapsan didto. Gigapos dayon siya sa kamot ug tiil.

Ang Pag-ampo ni Tobias

4Sa dihang si Tobias ug si Sara na lang ang didto sa sulod sa tinakpan nga lawak, mibangon si Tobias sa higdaanan ug gisultihan niya ang iyang asawa, “Bangon, Inday. Mag-ampo kita sa Ginoo aron kaluy-an kita ug iya kitang panalipdan.”

5MibangonAwit. si Sara aron mag-ampo silang duha ug mangayo sa Dios sa iyang panalipod. Unya nag-ampo si Tobias:

“O Dios sa among mga katigulangan,

takos ikaw sa among mga pagdayeg.

Dayegon ang imong ngalan hangtod sa kahangtoran

sa tanan nga imong binuhat sa langit ug sa yuta.

6GibuhatGen. 2:18. mo si Adan

ug gihatag mo kaniya si Eva nga iyang asawa

aron mahimong katabang niya.

Nahimo sila nga mga ginikanan sa tanang katawhan.

Miingon ikaw, ‘Dili maayo nga mag-inusara pagpuyo ang tawo.

Himoan ko siyag kauban ug katabang nga sama kaniya nga tawo.’

7Ginoo, gipili ko si Sara dili tungod sa kaulag,

kondili tungod kay kini usa ka buhat nga matarong.

Kaluy-i kami

ug itugot nga moabot kaming duha sa pagkatigulang.”

8Unya silang duha miingon, “Amen.”

9Ug nanghigda sila.

Nahingawa ang mga Ginikanan ni Sara

Unya niadtong gabhiona, gitawag ni Raguel ang iyang mga sulugoon ug nanggula sila aron pagkalot ug lubnganan

10tungod kay naghunahuna si Raguel, “Tingali namatay usab si Tobias ug kataw-an kami ug bugalbugalan sa mga tawo.”

11Sa nahuman na silag kalot sa lubnganan, mibalik si Raguel sa balay ug miingon sa iyang asawa,

12“Sugoa ang usa sa mga sulugoong babaye aron susihon kon buhi pa ba si Tobias. Kon patay na, ato siyang ilubong sa dili pa hibaw-an ni bisan kinsa.”

13Busa gipadala nilag suga ang usa ka sulugoong babaye aron pagsusi kon buhi pa ba si Tobias. Sa pag-abli niya sa pultahan, nakita niya nga silang duha maayong paghikatulog.

14Busa mibalik siya ug gitug-anan si Raguel ug si Edna nga buhi si Tobias ug wala maunsa.

15Unya gidayeg ni Raguel ang Dios sa langit. Miingon siya:

Ang Pag-ampo ni Raguel

“Takos gayod ikaw sa among pagdayeg, O Dios.

Dayegon ka unta sa imong katawhan hangtod sa kahangtoran;

magdayeg unta sila kanimo sa putli nga kasingkasing.

16Nagdayeg ako kanimo tungod kay imo akong gilipay;

naluoy ka kanamo,

ug ang dako nakong gikahadlokan wala mahitabo.

17Takos ikaw sa among pagdayeg, O Ginoo;

nagmaluloy-on ka niining batan-on nga magtiayon,

ang bugtong mga anak sa ilang mga ginikanan.

Busa karon, itugot kanila ang imong kaluoy ug panalipod.

Itugot nga magpuyo sila sa ilang kinabuhi

diha sa kalipay ug sa gugma.”

18Unya misugo si Raguel sa iyang mga sulugoon nga tabonan ang lubnganan sa dili pa mobanagbanag.

Ang Hikay sa Kasal

19Giingnan ni Raguel ang iyang asawa nga maglutog daghang pan alang sa usa ka dakong kombira. Unya miadto siya sa ilang kahayopan ug nagkuhag duha ka baka ug upat ka karnero ug iyang gisugo nga ipaihaw sa ilang mga sulugoon aron maandam ang kombira sa kasal.

20GitawagGen. 24:55. niya si Tobias ug giingnan niya nga dili siya motugot nga manglakaw sila hangtod nga mahuman ang duha ka semana nga kombira. Miingon siya, “Ayaw paglakaw kay mangaon kita ug mag-inom. Makaayo kini sa akong anak human sa iyang makalilisang nga mga giantos.

21Unya dad-on nimo ang katunga sa akong mga kabtangan ug mobalik ka nga maayog lawas ug walay kabilinggan ngadto sa imong amahan. Masunod nimo ang laing katunga inigkamatay namo ni Edna. Ayaw pagduhaduha mahitungod sa among gugma kanimo. Sukad karon ikaw giila namo nga among kaugalingong anak sama nga si Sara among anak. Makasalig ka niana, anak ko.”