Judit 6 - Cebuano Meaning-Based Bible

Ang Pakigpulong ni Holofernes

1Sa nahilom na ang pundok nga naglibot sa konseho, misulti si Holofernes kang Aquior atubangan sa tibuok pundok sa mga tawo nga gikan sa kabaybayonan sa Mediteraneo, sa taga-Moab ug sa mga sinuholang kasundalohan nga mga taga-Amon.

2“Aquior, kinsa ka man? Naghunahuna ka ba nga magbuhat ka sama sa usa ka propeta? Kinsa ka man nga magsulti kanamo sa dili pagpakiggubat batok sa mga Israelita tungod kay adunay Dios nga manalipod kanila? Si Nabucodonosor mao ang atong dios ug mao ra kanay importante. Ipadala niya ang iyang kasundalohan ug papason niya kining mga Israelita gikan sa nawong sa yuta. Ang ilang dios dili makatabang kanila.

3Apan kita nag-alagad kang Nabucodonosor ug buntogon ta sila sa kasayon ug ang ilang kasundalohan sama lamang sa usa ka tawo. Dili sila makahimo sa pagsukol batok sa atong kasundalohang nagkabayo.

4Buntogon sila niini. Ang kabukiran matina sa ilang dugo ug ang mga walog mapuno sa mga patay nilang lawas. Human sa atong pag-ataki, mapapas gayod sila sa hingpit ug walay mahabilin kanila bisan anino. Mao kini ang sugo ni Nabucodonosor, ang ginoo sa tibuok kalibotan ug dili gayod makawang ang iyang mga pulong.

5Aquior, wala kay bili kondili usa lamang ka sundalo nga sinuholan nga taga-Amon ug nagsulti ka sama sa usa ka mabudhion. Dili ka na makakita kanako pag-usab hangtod moabot ako aron pagsilot niining kaliwat sa mga kagiw nga mga ulipon.

6Ug inigbalik na nako, patyon ka sa akong mga sundalo. Mamatay ka usab uban kanila.

7“Karon dad-on ka sa akong mga tawo ngadto sa kabukiran ug biyaan ikaw didto sa usa sa mga lungsod sa mga Israelita

8ug mamatay ikaw uban sa mga tawo didto.

9Nganong naguol ka man pag-ayo, Aquior? Naghunahuna ka ba nga ang lungsod makabarog batok kanako? Tumanon ko ang tanan kong mga hulga ug siguro gayod kana!”

Si Aquior Gidala ngadto sa Betulia

10Unya misugo si Holofernes sa iyang mga tawo nga naghulat kaniya didto sa iyang tolda nga dakpon si Aquior, dad-on ngadto sa Betulia ug itugyan siya ngadto sa mga Israelita.

11Busa gidakop si Aquior sa mga tawo ug gidala siya sa gawas sa kampo ngadto sa walog. Gikan didto gidala siya ngadto sa kabukiran hangtod sa tubod nga diha sa ubos sa Betulia.

12Sa dihang ang mga tawo niadtong lungsora nakakita kanila nga nagpadulong, gikuha nila ang ilang mga hinagiban ug nanagan sila ngadto sa tumoy sa bungtod. Ang tanang mga tawo nga naggamit ug hinagiban nga saplong mipaulan ug mga bato ngadto sa mga sundalo ni Holofernes ug kini nakapahunong kanila sa pagtungas ngadto sa bukid.

13Ang mga taga-Asiria napugos sa pagpasalipod sa mga kilid sa bukid diin ilang gigaid si Aquior ug gibilin didto nga naghigda sa tiilan sa bukid. Unya namalik sila ngadto kang Holofernes.

14Unya sa paghiabot sa mga Israelita gikan sa Betulia, ilang gibadbaran si Aquior, gidala siya ngadto sa lungsod ug gipaatubang siya sa mga kadagkoan sa lungsod

15nga niadtong panahona mao sila si Uzias nga anak ni Miqueas sa tribo ni Simeon, si Cabris nga anak ni Gotoniel ug si Carmis nga anak ni Malquiel.

16Ang mga kadagkoan mitawag ug tigom sa mga tigulang sa lungsod ug ang tanang mga babaye ug batan-ong lalaki midugok usab ngadto sa tigom. Gidala si Aquior atubangan sa katawhan ug gisukitsukit siya ni Uzias.

17Gitug-anan sila ni Aquior sa nabatbat niya didto sa konseho sa gubat ni Holofernes mahitungod sa iyang buhaton ngadto sa mga Israelita.

18Sa pagkadungog niini sa katawhan, nanghapa sila ug nagsimba sa Dios. Nag-ampo sila sa pag-ingon,

19“O Ginoong Dios sa langit, tan-awa giunsa pagdaugdaog ang imong katawhan sa hambugiro namong mga kaaway. Kaluy-i ug tabangi intawon kami.”

20Unya ilang gipasaligan si Aquior ug gidayeg siya tungod sa iyang gihimo.

21Human sa tigom, si Aquior gidala ni Uzias ngadto sa ilaha ug gihikayan ug kombira didto alang sa mga tigulang. Niadtong tibuok gabii nag-ampo sila sa Dios sa Israel aron sila tabangan.