2 Macabeo 1 - Cebuano Meaning-Based Bible

Usa ka Sulat ngadto sa mga Judio sa Ehipto

1“Gikan sa mga Judio sa Jerusalem ug sa Judea ngadto sa ilang mga igsoon sa Ehipto: Mainiton nga mga pangomusta ug panghinaot sa kalinaw.

2“Hinaot unta nga ang Dios manalangin kaninyo ug mag-amping sa kasabotan nga iyang gihimo uban kang Abraham, kang Isaac ug kang Jacob, ang matinumanon niyang mga sulugoon.

3Hinaot unta nga pun-on niya ang matag usa kaninyo sa tinguha sa pagsimba kaniya ug sa mainiton nga pagtuman sa iyang kabubut-on uban sa tibuok ninyong kasingkasing ug kalag.

4Hinaot unta nga himoon niya nga makasabot kamo sa iyang Balaod ug sa iyang mga sugo. Hinaot unta nga hatagan kamo niya sa kalinaw,

5tubagon ang inyong mga pag-ampo, pasayloon ang inyong mga sala ug nga dili gayod niya kamo biyaan sa panahon sa kalisdanan.

6Diri sa Juda nag-ampo kami alang kaninyo.

7“Sa tuig 169, samtang si Demetrio II maoy hari sa Siria, nagsulat kami aron pagsugilon kaninyo mahitungod sa pagpanglutos ug sa malisod nga mga panahon nga miabot kanamo sa mga tuig human sa pagsukol ni Jason batok sa awtoridad sa Balaang Yuta.

8Gisunog ni Jason ug sa iyang mga tawo ang mga ganghaan sa Templo ug gipamatay ang mga tawo nga walay sala. Unya nag-ampo kami sa Ginoo ug gitubag niya ang among mga pag-ampo. Busa naghalad kami ug mga mananap, naghatag ug mga halad nga uhay, nagdagkot sa mga suga didto sa Templo ug nagbutang ug mga balaang pan.

9Mao kini ang hinungdan ngano nga giawhag kamo namo sa paghimog kasaulogan nga sama sa Kasaulogan sa Balongbalong sa bulan sa Kisleb. Gisulat sa tuig 188.”USA KA SULAT NGADTO KANG ARISTOBULOAng Kamatayon ni Hari Antioco

10“Gikan sa mga Judio sa Jerusalem ug Judea, sa senado sa mga Judio ug ni Judas ngadto kang Aristobulo nga usa ka kaliwat sa mga pari ug magtutudlo ni Hari Tolomeo ug ngadto sa mga Judio sa Ehipto: Mga pangomusta ug mga panghinaot nga ang tanan anaa sa maayong panglawas.

11“Nagpasalamat kami sa Dios tungod kay giluwas kami niya gikan sa dagko nga katalagman ug gitabangan kami niya batok sa hari.

12Ang Dios nag-abog sa mga kaaway gikan sa among balaan nga siyudad.

13Sa1 Mac. 6:1-4; 2 Mac. 9:1-10. pag-abot ni Hari Antioco didto sa Persia, ang iyang kasundalohan daw lisod nga pildihon apan gitagodtagod sila didto sa templo sa diosa nga si Nanea tungod sa pagbudhi nga gihimo sa iyang mga pari.

14Si Hari Antioco miadto sa templo uban sa pipila sa iyang labing sinaligan nga mga magtatambag aron kunohay pagpangasawa sa diosa aron sa ingon maangkon niya ang kadaghanan sa mga bahandi sa templo ingon nga gasa sa kasal.

15Human ipasundayag sa mga pari ang mga bahandi, si Antioco ug ang pipila sa iyang mga tawo misulod sa templo aron paghipos niini. Apan ang mga pari mitak-op sa mga pultahan sa iyang luyo

16ug gibato nila si Antioco ug ang iyang mga tawo gikan sa mga tagong pultahan sa kisami. Unya gitagodtagod nila ang mga lawas ug gisalibay ang mga ulo ngadto sa mga tawo sa gawas.

17Dayga ang Dios tungod sa pagsilot niya niadtong daotan nga mga tawo!

Ang Halad ni Nehemias Naugdaw sa Kalayo

18“Sa ika-25 nga adlaw sa bulan sa Kisleb himoon namo ang Kasaulogan sa Pagbag-o sa Paghalad ingon nga gihimo namo ang Kasaulogan sa mga Balongbalong. Gihunahuna namo nga mahinungdanon ang pagpahinumdom kaninyo mahitungod niini aron kamo maghimo usab niining maong kasaulogan. Niining paagiha mahinumdoman ninyo ang kalayo nga mitungha sa dihang naghimo si Nehemias ug mga paghalad human niya mapatukod pag-usab ang Templo ug ang altar.

19Sa panahon nga ang atong mga katigulangan gibihag ngadto sa Persia, pipila ka mga diosnon nga mga pari nagdala ug kalayo gikan sa altar ug gitagoan kini sa hilom didto sa kinahiladman sa usa ka uga nga pundohanan sa tubig. Maayo kaayo ang pagkatago nila sa kalayo busa walay nakasusi niini.

20Human manglabay ang mga tuig, sa panahon nga gikahimuot sa Dios, ang emperador nga taga-Persia mipadala kang Nehemias balik sa Jerusalem ug si Nehemias nagsugo sa mga kaliwat niadtong mga pari nga pangitaon nila ang kalayo. Mitaho sila kanamo nga dili kalayo kondili espiso nga tinubig ang ilang nakit-an. Giingnan sila ni Nehemias nga magkabo ug diotay niini ug dad-on kini ngadto kaniya.

21Sa diha nga gibutang na didto sa altar ang tanan alang sa paghalad, giingnan niya ang mga pari nga ibubo kadtong tinubig ibabaw sa sugnod ug sa halad.

22Sa pagkataudtaod mipakita ang adlaw luyo sa mga panganod ug sa kalit ang tanan didto sa altar misilaob. Ang tanan mitan-aw sa dakong kahibulong.

23Unya samtang ang kalayo nag-ut-ot sa halad, si Jonatan, ang Pangulong Pari, nangulo sa mga tawo diha sa pag-ampo ug si Nehemias ug ang tanang mga tawo mitubag.

Ang Pag-ampo ni Nehemias

24“Ang pag-ampo ni Nehemias ingon niini, ‘Ginoong Dios, Magbubuhat sa tanang mga butang, ikaw makalilisang ug malig-on apan maluluy-on ug matarong. Ikaw lamang ang hari ug walay lain gawas kanimo nga maayo,

25walay lain gawas kanimo nga mahigugmaon ug matarong. Ikaw makagagahom sa tanan ug walay kinutoban; hangtod sa kahangtoran andam ikaw sa pagluwas sa Israel gikan sa iyang mga kalisdanan. Gipili nimo ang among nga katigulangan aron mahimong imong kaugalingon nga katawhan.

26Dawata kining halad nga among gihimo alang sa tibuok Israel. Panalipdi ang imong pinili nga katawhan ug himoa kaming balaan.

27Luwasa sila nga naulipon didto sa mga yuta nga langyaw ug pundoka ang among nagkatibulaag nga katawhan. Kaluy-i ang among katawhan nga gidaugdaog ug gitamay aron ang ubang mga nasod makaila nga ikaw mao ang among Dios.

28Siloti ang bangis ug mapahitas-on nga mga tawo nga nagdaugdaog kanamo

29ug unya ibutang ang imong katawhan didto sa balaan nga yuta sumala sa giingon ni Moises nga maoy imong buhaton.’

Ang Emperador nga taga-Persia Nakadungog mahitungod sa Kalayo

30“Unya ang mga pari nag-awit ug alawiton.

31Human maugdaw ang mga sakripisyo, nagsugo si Nehemias nga ang salin sa espiso nga tinubig ibubo ngadto sa pipila ka dagkong mga bato.

32Dihadiha misilaob ang kalayo apan napalong kini sa usa ka siga nga gikan sa kalayo nga didto sa altar.

33“Ang balita mahitungod sa nahitabo mikaylap sa tanang dapit. Ang emperador nga taga-Persia nakadungog nga usa ka espiso nga tinubig ang hikaplagan didto sa dapit diin gitagoan sa mga pari ang kalayo sa altar sa dayon na nilang pagkabihag. Nakadungog usab siya nga si Nehemias ug ang iyang mga higala migamit niining maong tinubig aron pagsunog sa halad didto sa altar.

34Gipasusi sa emperador kining butanga ug nakaplagan niya nga kini tinuod busa gipakoral niya ang maong dapit ug gihimo nga usa ka alampoanan.

35Kini nahimong usa ka dakong tinubdan sa salapi alang kaniya ug gigamit niya ang salapi alang sa mga gasa nga gihatag niya kang bisan kinsa nga iyang higustohan.

36Si Nehemias ug ang iyang mga higala nagngalan sa tubig ug Neptar, sa ato pa ‘paghinlo,’ apan gitawag kini sa kadaghanan ug ‘Napta’.