Sirac 47 - Cebuano Meaning-Based Bible

Si Natan

1Human2 Sam. 7:2-3; 12:1. ni Samuel, miabot si Natan nga maoy usa ka propeta sa panahon ni David.

Si David

2Sama1 Sam. 17:34–18:7; 2 Sam. 5:7; 8:1; 12:13. nga ang piniling tambok nga bahin sa halad sa panaghiusa gilain alang sa Ginoo, si David gipili usab gikan sa mga Israelita.

3Nakigdula siya sa mga liyon ug sa mga oso sama nga kini mga nati nga karnero ug gagmayng mga kanding.

4Sa bata pa siya, nakapatay siya ug usa ka higante aron pagluwas sa iyang katawhan gikan sa kaulawan. Nagbutang siyag bato diha sa iyang saplong ug gitumong niya kang Goliat, ug gitapos niya ang pagpanghambog niini.

5Nag-ampo siya sa Ginoo, ang Labing Halangdon, ug gihatagan siyag kusog aron makapatay niadtong bantogan nga sundalo aron ang mga nasod magbaton ug pagtahod alang sa gahom sa iyang katawhan.

6Ang katawhan nagpasidungog kaniya tungod sa pagpatay niya sa linibo ug sa gipurongpurongan na siya nga hari, gidayeg siya nila tungod kay pinili man siya sa Ginoo.

7Gipuo niya ang tanan niyang mga kaaway ug gilaglag niya sa dayon ang mga Filistihanon aron dili na gayod sila mahimo nga usa ka hulga.

8Sa tanang mga butang nga gihimo ni David, nagpasalamat siya ug nagdayeg sa Balaan nga Ginoo, ang Labing Halangdon. Gihigugma niya ang iyang Magbubuhat ug nag-awit siyag mga pagdayeg ngadto kaniya sa tibuok niyang kasingkasing.

9Nagbutang siyag mga mag-aawit diha sa altar aron maghatag ug matahom nga honi.

10Gihikay niya ang mga panahon sa kasaulogan sa tibuok tuig ug naghimo niini nga mga dagkong higayon. Ang Templo milanog sa mga pagdayeg alang sa Ginoo sa tibuok adlaw.

11Ang Ginoo mipasaylo sa sala ni David ug naghatag kaniya ug gahom nga molungtad hangtod sa kahangtoran. Naghimo siyag usa ka kasabotan uban kaniya nga siya ug ang iyang mga kaliwat maghari nga mahimayaon sa tibuok nga Israel.

Si Solomon

12Si David nag-andam pag-ayo alang sa iyang anak nga usa ka maalamon nga tawo aron maoy maghari sunod kaniya.

13Walay1 Hari 4:21-32. gubat samtang si Solomon pa ang hari kay ang Dios naghatag kaniya sa kalinaw diha sa tanan niyang mga utlanan aron makahimo siya pagtukod ug usa ka Templo nga mobarog hangtod sa kahangtoran alang sa Ginoo.

14Pagkamaalamon nimo, Solomon, sa batan-on ka pa! Ang imong kahibalo nahisama sa suba nga nag-awas.

15Ang imong gahom milukop sa tibuok kalibotan. Ang imong mga sanglitanan ug mga tigmo nahibaloan sa tanang dapit.

16Nabantog ikaw sa bisan diing dapit ug ang mga tawo nahigugma kanimo tungod kay nagdala ka man sa kalinaw.

17Ang mga nasod sa tibuok kalibotan nagdayeg kanimo tungod sa imong mga awit, mga sanglitanan, mga pasumbingay ug mga maundanong panultihon.

18Nagtigom1 Hari 10:21, 27. ikawg plata ug bulawan sama sa pagtigom ug tingga, ang tanan diha sa ngalan sa Ginoong Dios sa Israel.

19Apan1 Hari 11:1. ang imong kaulag sa mga babaye maoy nakapukan kanimo.

20Gibulingan mo ang imong kabantog ug ang imong mga kaliwat. Nag-antos sila sa silot tungod sa imong kabuang nga maoy hinungdan sa hilabihang nilang kasakit.

21Nakabahin1 Hari 12:15-20. kini sa nasod ug ang usa ka kaatbang nga gingharian natukod didto sa amihanan sa Israel.

22Apan2 Sam. 7:15. ang Ginoo nagmaluloy-on sa kanunay ug nagtuman sa tanan niyang mga saad. Dili gayod niya laglagon ang mga kaliwat ni David nga iyang gipili ug naghigugma kaniya. Busa tungod sa Israel iyang gitugotan nga magpadayon ang banay ni David.

Si Rehoboam ug si Jeroboam

23Si1 Hari 11:43; 12:10-30; 2 Hari 17:6, 18. Solomon misunod sa iyang mga katigulangan sa pagkamatay ug nagbilin siya ug usa sa iyang mga anak aron maoy maghari sunod kaniya. Kini mao si Rehoboam, usa ka tawo nga diyutayg kahibalo ug daghag kabuang. Ang iyang mga pagbuot maoy hinungdan sa usa ka rebolusyon.

Diha usab ang dili angayng hisgotan nga si Jeroboam nga maoy nakaingon sa pagpakasala sa amihanang Israel.

24Ang iyang katawhan nahimong hilabihan ka makasasala nga gihinginlan sila gikan sa ilang yuta.

25Gisulayan nila ang tanang matang sa kadaotan hangtod ang Ginoo nanimalos kanila.