Sirac 2 - Cebuano Meaning-Based Bible

Ang Pagkamatinumanon ngadto sa Dios

1Anak, kon mag-alagad ikaw sa Ginoo, pangandam alang sa mga higayon nga pagasulayan ka.

2Pagbuhat sa kinasingkasing ug sa tininuod. Pagbaton sa kabugnaw kon moabot ang mga kasamok.

3Pabilin diha sa Ginoo; ayaw gayod pagbiya kaniya ug pasidunggan ka sa kataposan sa imong mga adlaw.

4Dawata bisan unsa ang mahitabo kanimo. Bisan kon pakaulawan ka, pagpailob.

5AngKlm. Sol. 3:5-6; 1 Ped. 1:7. bulawan sulayan pinaagi sa kalayo ug ang kinaiya sa tawo sulayan diha sa hudno sa mga kaulawan.

6Salig sa Ginoo ug tabangan ikaw niya. Pagkinabuhi nga matarong diha sa iyang dalan ug ibutang ang imong paglaom diha kaniya.

7Kamong tanan nga mahadlokon sa Ginoo, paabota ang iyang kaluoy. Ayaw kamo pagtalikod kaniya kay masukamod kamo.

8Kamong tanan nga mahadlokon sa Ginoo, salig kaniya ug sa walay duhaduha gantihan kamo.

9Kamong tanan nga mahadlokon sa Ginoo, pagpaabot sa iyang mga panalangin sa kaluoy ug sa kalipay nga walay kataposan.

10Hunahunaa ang mga katigulangan ug palandonga kini: aduna bay gibiyaan sa Ginoo kanila nga naglaom kaniya? Aduna bay gitalikdan sa Ginoo kanila nga sa kanunay nagtahod kaniya? Aduna bay wala tagda sa Ginoo kanila nga nag-ampo kaniya?

11Ang Ginoo maayo ug maluluy-on; nagpasaylo siya sa atong mga sala ug nag-amping siya kanato sa panahon sa mga kalisdanan.

12Apan sila nga nawad-an sa pagsalig nagpadulong sa kapildihan—kamong tanan nga makasasala nga buot maglakaw sa duha ka dalan!

13Ang kapakyasan sa walay duhaduha moabot kanila nga nawad-an sa ilang kaisog; wala silay pagtuo busa wala silay panalipod.

14Ang katalagman sa walay duhaduha moabot gayod kanila nga wala na molahutay. Unsa may ilang buhaton kon ang Ginoo moabot na aron paghukom kanila?

15SilaKlm. Sol. 6:18; Juan 14:15, 21, 23. nga mahadlokon sa Ginoo dili magsupak sa iyang mga kasugoan; sila nga nahigugma kaniya magkinabuhi sumala sa iyang gusto.

16Sila nga mahadlokon ug mahigugmaon sa Ginoo maningkamot sa pagpahimuot kaniya ug magmatngon sa pagtuman sa balaod.

17Sila nga mahadlokon sa Ginoo sa kanunay andam sa pag-alagad kaniya. Magpaubos sila atubangan kaniya ug moingon,

18“Among isalig ang among kaugmaon diha sa mga kamot sa Ginoo, dili diha sa mga kamot sa mga tawo kay ang kaluoy sa Ginoo sama kadako sa iyang kahalangdon.”