Zacarias 7 - Cebuano Meaning-Based Bible

Gisaway ang Pagpuasa nga Dili Kinasingkasing

1Sa ikaupat nga adlaw sa ikasiyam nga bulan (ang bulan sa Kisleb) sa ikaupat nga tuig sa paghari ni Dario, nakigsulti ang Ginoo kang Zacarias.

2Niadtong higayona ang mga lumolupyo sa Betel nagpadala kang Sarasar ug kang Regemelec ug sa ilang mga sakop ngadto sa Templo sa Ginoo nga Labing Gamhanan aron mangamuyo sa kaluoy sa Ginoo,

3ug mangutana sa mga pari ingon man sa mga propeta kon kinahanglan pa bang magbangotan ug magpuasa sila sa matag ikalima nga bulan sama sa ilang gihimo sulod sa daghang katuigan.

4Ug giingnan ako sa Ginoo nga Labing Gamhanan,

5“Sultihi ang tanang katawhan sa nasod lakip ang kaparian nga sa matag higayon nga nagpuasa ug nagbangotan kamo sa ikalima ug ikapito nga bulan sulod niining 70 ka tuig, wala ninyo kini buhata alang kanako.

6Ang inyong pagkaon ug pag-inom gibuhat ninyo alang sa inyong kaugalingon.”

7Mao usab kini ang gisulti sa Ginoo ngadto kanila pinaagi sa unang mga propeta sa dihang may namuyo pa sa Jerusalem ug nagmauswagon pa kini lakip ang mga kasikbit niyang mga siyudad ug sa dihang may namuyo sa mga dapit sa habagatan ug kapatagan.

Nabihag Sila Tungod sa Ilang Pagkamasupilon

8Giingnan sa Ginoo si Zacarias,

9“Sultihi ang katawhan nga ako, ang Ginoo nga Labing Gamhanan, nag-ingon, ‘Hatagig hustisya ang imong isigkatawo ug ipakita ang kaluoy ngadto kanila.

10Ayaw daugdaoga ang mga biyuda, ang mga ilo, ang mga dumuduong ug ang mga kabos. Ayaw paglaraw ug daotan batok sa imong isigkatawo.’”

11Miingon ang Ginoo kanako, “Apan wala gayod sila mamati. Nagpagahi sila sa ilang kasingkasing ug gisap-ongan nila ang ilang mga dalunggan aron dili sila makadungog.

12Gipagahi nila ang ilang kasingkasing ingon sa bato ug gisalikway nila ang mga balaod ug mga pulong nga akong gihatag pinaagi sa akong espiritu ngadto sa unang mga propeta. Busa nasuko ako pag-ayo.

13Tungod kay wala man sila mamati kanako sa akong pagtawag kanila, wala ko usab pamatia ang ilang pag-ampo.

14Sama sa usa ka alimpulos gipatibulaag ko sila ngadto sa ubang mga nasod busa nagmingaw na ug wala nay tawong nagtikawtikaw dinhi niining nasod nga matahom.”