Sirac 23 - Cebuano Meaning-Based Bible

1O Ginoo, akong Amahan ug Agalon sa akong kinabuhi, ayaw ako pasagdi nga maulipon sa akong kaugalingong mga pulong; ayaw itugot nga kini ang hinungdan sa akong paghisukamod.

2Unta latoson ako tungod sa akong mga hunahuna aron ang kaalam makapanton sa akong mga hunahuna. Dili ako buot nga pasagdan lamang kon masayop ako; dili ako buot nga hikalimtan bisan ang usa sa akong mga sala.

3Unya dili na ako magpadayon sa pagpakasala o magpatuyang sa kasaypanan. Dili na unya ako mahulog sa gahom sa akong mga kaaway ug dili na ako pakaulawan nila.

4O Ginoo, akong Amahan ug Dios sa akong kinabuhi, ilikay ako sa pagkamapahitas-on

5ug panalipdi ako sa tanang daotan nga mga tinguha.

6Ampingi ako nga dili mabuntog sa kahakog o sa kaulag; ayaw akog pasagdi nga mahimutang ubos sa gahom niining makauulaw nga mga kailibgon.

Mga Pagpanumpa

7Mga kabataan ko, pamati sa akong ipamulong mahitungod sa husto nga pagpanulti; buhata ang akong itudlo kaninyo ug dili gayod kamo malit-ag.

8Ang mga makasasala madakpan gumikan sa ilang kaugalingong mga pulong nga makapasakit ug mapahitas-on.

9AyawMat. 5:34; San. 5:12. pag-anad sa pagpanumpa ug ayaw sayon-sayona paggamit ang balaan nga ngalan sa Dios.

10Ang usa ka ulipon nga kanunayng bunalan dili gayod makalingkawas sa mga bun-og; ang usa ka tawo nga kanunayng manumpa sa Balaan nga Ngalan dili gayod makalingkawas sa sala.

11Ang usa ka tawo nga magpunayg panumpa makasala sa sulod sa kasingkasing ug ang silot dili gayod halayo sa iyang panimalay. Kon mapakyas siya sa pagtuman sa iyang panumpa, sad-an siya. Kon dili siya magtagad sa iyang panumpa, sad-an siya sa duha ka pilo. Kon dili kinasingkasing ang iyang panumpa sa sinugdan, dili siya mapasaylo ug ang iyang panimalay mapuno sa kasamok.

Mga Hugaw nga Panulti

12Adunay usa ka paagi sa pagpanulti nga nahisama sa kamatayon mismo—hinaot unta nga walay Israelita nga mahimong sad-an niini! Ang mga tawo nga diosnon dili molunang niining maong sala ug magpahilayo sila niini.

13Ayaw pag-anad pagsulti ug mga balikas ug panamastamas; sala kini.

14Tingali malimot ka sa imong kaugalingon samtang uban ikaw sa importante nga mga tawo ug mahisama kag buang tungod sa daotan nga pulong nga naanad ka pagsulti. Hunahunaa unsay bation sa imong mga ginikanan! Tunglohon mo ang adlaw sa imong pagkatawo ug manghinaot nga maayo pag mamatay ka!

15Kon mabatasan nimo ang paggamit sa mga sinultihan nga daotan, dili gayod ikaw makahunong niini sa tibuok mong kinabuhi.

Mga Sala sa Pakighilawas

16Adunay daghang paagi sa pagpakasala nga magpakanaog sa kapungot sa Ginoo apan ang kailibgon sa pagpakighilawas maoy usa ka mainit ug nagdilaab nga kalayo nga dili mapalong sa imong gusto; maut-ot lamang kini sa iyang kaugalingon. Ang usa ka tawo nga nagkinabuhi sa mga kalipay sa pagpakighilawas magpadayon niini hangtod nga ang kalayo maglaglag kaniya.

17Alang sa maong tawo ang tanang babaye iyang tinguhaon ug dili gayod siya matagbaw samtang buhi pa siya.

18Ang tawo nga magluib sa iyang asawa moingon, “Wala gayoy makahibalo, ngitngit dinhi ug walay nakakita kanako. Wala akoy angay nga kabalak-an. Mahitungod sa Labing Halangdon, dili gani siya makamatngon.”

19Kining tawhana mahadlok lamang sa mga tawo. Wala siya makaamgo nga ang mga mata sa Ginoo mas hayag pa kaayo kay sa udtong tutok. Nagtan-aw siya sa tanan nga atong gibuhat bisan kon gisulayan nato kini pagtago.

20Nahibalo siya sa tanan sa wala pa niya buhata ang kalibotan ingon man sa nahuman na kini.

21Kadtong tawhana nga makasasala masakpan sa higayon nga wala gayod niya paabota ug silotan siya atubangan sa katawhan.

22Sama usab niini ang usa ka babaye nga maluibon sa iyang bana ug maghatag kaniya ug usa ka bata nga anak sa laing lalaki.

23Una sa tanan, nakalapas siya sa Balaod sa Labing Halangdon. Ikaduha, nakasala siya sa iyang bana. Ug ikatulo, naghimo siya sa iyang kaugalingon nga usa ka daotang babaye pinaagi sa pagpanapaw ug sa pagpanganak sa bata sa usa ka lalaki nga dili iyang bana.

24-25Ang mga anak mag-antos tungod sa iyang sala. Dili sila makakaplag ug usa ka luna diha sa katilingban o makatukod ug mga banay. Kining maong babaye dad-on atubangan sa tigom

26ug pakaulawan hangtod sa hangtod. Panghimarauton ang iyang ngalan. Human siya mamatay,

27ang tanan makaamgo nga wala nay lain nga mas maayo kay sa pagkahadlok sa Ginoo ug wala nay mas tam-is pa kay sa pagtuman sa iyang mga kasugoan.