Sirac 39 - Cebuano Meaning-Based Bible

1Apan lahi niini ang tawo nga naghalad sa iyang kaugalingon aron pagtuon sa Balaod sa Labing Halangdon. Nag-usisa siya sa kaalam nga gikan sa karaang panahon ug nagtuon sa mga panagna.

2Gisag-ulo niya ang mga gipanulti sa mga bantogang tawo ug batid siya sa paghubad sa mga pasumbingay.

3Nagtuon siya sa tinagoan nga kahulogan sa mga panultihon ug makahimo paghisgot sa dili kaayo tin-aw nga mga bahin sa mga pasumbingay.

4Ang mga dagkong tawo magtawag kaniya aron paalagaron siya kanila ug makig-uban siya sa mga pangulo. Mopanaw siya ngadto sa mga yuta nga langyaw tungod sa iyang pagpaningkamot sa pagtuon mahitungod sa kaayo ug sa kadaotan sa tawo.

5Mobangon siya ug sayo aron sa pag-ampo ngadto sa Ginoo nga iyang Magbubuhat ug mangayo siya sa Labing Halangdon nga pasayloon ang iyang mga sala.

6Unya kon itugot sa gamhanang Ginoo, mapuno siya sa salabotan. Magpagula siya ug daghang mga maalam nga panultihon ug magpasalamat siya sa Ginoo diha sa pag-ampo.

7Aduna siyay kahibalo nga ipaambit ug maayong tambag nga ihatag ug makakita siya sa mga tinago sa Ginoo.

8Ipadayag niya ang iyang nakat-onan diha sa iyang mga pagpanudlo ug ang iyang garbo mao ang Balaod ug kasabotan sa Ginoo.

9Daygon siya sa tanan tungod sa iyang kaalam ug dili gayod kini mawala tungod kay ang kaliwatan nga umaabot mahinumdom man kaniya.

10Ang mga dili Judio maghisgot mahitungod sa iyang kaalam ug diha sa tigom maninggit sila sa pagdayeg kaniya.

11Kon moabot siya hangtod sa gulang nga panuigon, mamatay siya nga usa ka tawo nga bantogan. Apan kon mamatay siya sa dili pa siya mahimong bantogan, makuntento na siya niini.

Usa ka Himno sa Pagdayeg sa Dios

12Sama sa takdol nga bulan, hayag ug puno ang akong hunahuna nga buot lang ipakig-ambit kaninyo.

13Pamati kanako, kamong mga madasigon nga mga anak nako ug bukhad kamo sama sa usa ka tanom nga rosas sa tampi sa sapa.

14Bukhad sama sa humot nga lirio ug ipangalimyon ang inyong kahumot ngadto sa kahanginan sama sa insenso. Awita ang mga pagdayeg sa Ginoo ug pasalamati siya tungod sa tanan nga iyang nabuhat.

15Isangyaw ang iyang himaya diha sa mapasalamaton nga pagdayeg! Dinuyogan sa honi sa alpa, laylaya kining honi:

16Ang tanan nga gibuhat sa Ginoo maayo gayod kaayo;

ang tanan nga iyang gisugo matuman sa iyang gitakda nga panahon.

17Walay bisan kinsa nga angay mangutana ngano nga ingon man niana ang mga butang;

kining mga pangutanaha matubag inig-abot sa husto nga panahon.

Misugo siya ug ang tubig natipun-og nga hataas

ug mitubo ang dagkong mga paril sa tubig sa iyang pagsulti.

18Bisan unsa ang iyang isugo matuman dayon;

walay kinutoban ang iyang gahom sa pagluwas.

19Nakita niya ang tanan nga gibuhat sa tanang tawo;

walay paagi sa pagtago gikan sa iyang panan-aw.

20Nakita niya ang tibuok panahon, gikan sa sinugdan hangtod sa kataposan,

ug walay butang nga makapakugang kaniya.

21Kinahanglan walay bisan kinsa nga mangutana ngano nga ingon man niana ang mga butang;

ang tanan niyang binuhat adunay kaugalingong katuyoan.

22Ang iyang panalangin nagaawas sama sa Nilo,

sama sa baha nga milukop sa uga nga yuta.

23Gihimo niyang parat ang tubig nga tab-ang,

ug iyang gipahamtangan sa iyang kapungot ang mga nasod.

24Alang sa mga diosnon, ang iyang mga paagi matarong;

alang sa mga daotan, puno sila sa mga lit-ag.

25Sukad sa sinugdan naghimo siya ug maayong mga butang alang sa mga maayo,

ug makalilisang nga mga butang alang sa mga makasasala.

26Ang labing gikinahanglan sa kinabuhi mao kini:

tubig, kalayo, puthaw, asin, harina, dugos, gatas, bino, sapot ug lana.

27Kining mga butanga maayo alang kanila nga mga diosnon,

apan mahimo silang daotan alang sa mga makasasala.

28Adunay mga hangin nga gibuhat aron magdala sa silot

ug may igo kining kakusog aron pagtay-og sa mga bukid.

Sa panahon sa paghukom, buhian nila ang ilang kusog

ug makabugnaw sila sa kapungot sa ilang Magbubuhat.

29-30Ang mga mananap nga mangtas, mga tanga ug mga bitin,

ang espada nga naglaglag sa daotan,

ang kalayo, ang yelo nga tibuok, ang gutom ug ang sakit:

kining tanan gibuhat ingon nga silot.

31Kining tanan malipayon nga nagtuman sa sugo sa Ginoo,

ug andam sila sa pag-alagad kaniya dinhi sa kalibotan.

Kon ang ilang panahon sa pag-alagad moabot na,

dili gayod sila mosupak.

32Dugay na ako nga mituo niini busa human nako kini hunahunaa pag-ayo, ako kining gisulat:

33Ang tanan nga gibuhat sa Ginoo maayo;

ihatag niya ang tanang gikinahanglan sa husto nga panahon.

34Walay makaingon nga ang ubang mga butang mas daotan kay sa uban,

kay ang tanan maayo man diha sa iyang husto nga dapit.

35Busa karon, awiti ang Ginoo ug mga pagdayeg sa tibuok ninyong kasingkasing

ug dayga ang ngalan niya.