1Bisan kinsa makapangangkon nga siya imong higala apan adunay mga tawo nga higala sa ngalan lamang.
2Ang kasakit gumikan sa usa ka suod nga panaghigalaay nga molubad sama ka sakit sa kamatayon.
3Ang pagkadaotan lang gyod natog taras! Nganong ingon man niini ang tawo? Nganong nalukop man sa limbong ang kalibotan gumikan niini?
4Adunay mga tawo nga higala nimo samtang maayo ang imong kahimtang apan mosumbalik sila batok kanimo kon moabot na ang mga kasamok.
5Ang matuod nga higala motabang kanimo batok sa imong mga kaaway ug manalipod sila kanimo panahon sa away.
6Ayaw gayod hikalimti ang maong higala nimo. Paambita siya sa mga bunga sa imong kadaogan.
Pagbantay sa Pagdawat ug Tambag7Bisan kinsa makahatag ug tambag apan adunay mga tawo nga maghimo niini alang lamang sa ilang kaugalingong kaayohan.
8Pagbantay kon adunay motanyag kanimo ug tambag. Susiha una unsa ang iyang tuyo diha niining butanga kay makasiguro ikaw nga naghunahuna siya una sa tanan mahitungod sa iyang kaugalingon. Nganong magpaibabaw man gayod siya inay unta ikaw?
9Pasaligan ka niya nga maorag maayo ang lakaw ug unya mosibog siya aron pagpaminaw unsa ang mahitabo kanimo.
10Ayaw pagpakitambag kang bisan kinsa nga wala mosalig kanimo ug ayaw paghatag ug tambag kang bisan kinsa nga nasina kanimo.
11Ayaw pangayo ug tambag sa usa ka babaye mahitungod sa usa ka kaatbang niya,
sa usa ka talawan mahitungod sa gubat,
sa usa ka magpapatigayon mahitungod sa hinangyoay,
sa usa ka pumapalit mahitungod sa pagpamaligya,
sa usa ka tawo nga tihik mahitungod sa pagpasalamat,
sa usa ka mapintas nga tawo mahitungod sa kaluoy,
sa usa ka tapolang sulugoon mahitungod sa trabaho,
sa usa ka temporaryo nga trabahante mahitungod sa pagtibawas sa usa ka buhat,
sa usa ka tapolang ulipon mahitungod sa usa ka malisod nga buluhaton.
Ayaw pagtagad sa bisan unsang tambag nga ilang ihatag.
12Apan ibutang hinuon ang imong pagsalig diha sa usa ka tawo nga diosnon ug giila nga matinumanon sa mga sugo sa Ginoo, sa usa ka tawo nga may pagbati alang kanimo ug maguol kon makita ka niya nga mapakyas.
13Ug salig sa kaugalingon nimong panghukom; wala nay mas kasaligan pa nga tambag gawas niini.
14Usahay ang imong kaugalingong pangagpas labaw nga makatug-an kanimo kay sa pito ka bantay didto sa usa ka hataas nga bantayan.
15Labaw sa tanan, pag-ampo ngadto sa Labing Halangdon aron pakitaan ka niya sa matarong nga butang nga angay buhaton.
Ang Kaalam ug Pagsalig16Luyo sa tanan nga nabuhat anaa ang pagplano ug ang paghunahuna.
17-18Ang hunahuna nagtumong sa upat ka butang: kini mao ang maayo ug ang daotan, ang kinabuhi ug ang kamatayon. Kining tanan magsugod diha sa hunahuna apan ang dila mao ang hingpit nga magmando kanila.
19Ang usa ka tawo mahimong may kahibalo sa pagpanudlo apan bisan pa niana dili siya mapuslanon alang sa iyang kaugalingon.
20Tingali abtik siya sa mga pulong apan magutman siya tungod kay ang mga tawo maglagot man kaniya.
21Mahitabo kini kon wala siyay igong kabuot ug kon ang Ginoo wala maghatag kaniya ug kaalam sa pagpahiluna pagsulti.
22Ang usa ka tawo mahimo nga maghunahuna sa iyang kaugalingon nga maalam ug magpakita siya kanimo nga wala siya magduhaduha mahitungod sa iyang nahibaloan.
23Bisan kinsa nga sa tinuoray maalam mahimong magtutudlo sa iyang katawhan ug makasiguro sila nga ang iyang gitudlo mao ang kamatuoran.
24Ang tanan magdayeg sa maong tawo ug magsulti nga siya palaran.
25Ang gidaghanon sa mga adlaw sa kinabuhi sa tawo may kinutoban apan ang kinabuhi sa Israel dili gayod masukod pinaagi sa mga adlaw.
26Ang usa ka tawo nga maalam makakab-ot sa pagsalig sa iyang katawhan ug mahinumdoman siya hangtod sa kahangtoran.
Pagpugong sa Gana27Anak, sa imong pagkinabuhi, pugngi ang imong gana ug ayaw pagkaon bisan unsa nga imong nahibaloan nga makadaot kanimo.
28Ang tanang pagkaon dili maayo alang sa tanan ug dili ang tanan makagusto sa samang matang sa pagkaon.
29Ayaw paghunahuna nga kinahanglang imohon ang tanang matang sa pagkaon ug ayaw pagpakadalo tungod sa bisan unsang pagkaon.
30Kon magpalabi kag kaon, masakit ka; kon himoon mo kini sa tanang panahon, kanunay kang sakitan sa tiyan.
31Ang kadalo sa pagkaon nakapatay sa daghang mga tawo. Likayi kini ug motaas ang imong kinabuhi.
Who We AreWhat We EelieveWhat We Do
2025 by iamachristian.org,Inc All rights reserved.
