Sirac 35 - Cebuano Meaning-Based Bible

1Ang pagtuman sa Balaod sama ka bililhon sa daghang mga halad; mao kini ang halad sa pakigdait mismo.

2Ang pagbalos sa usa ka kaluoy sama sa usa ka halad sa trigo ug ang paghatag ngadto sa mga kabos sama sa halad sa pasalamat.

3Ang pagpahilayo sa sala makapahimuot sa Ginoo ug magpapas sa sala.

4Apan ayaw pag-adto sa Templo kon wala kay halad;

5ang Balaod nagsugo nga magdala kag halad.

6Ang halad sa usa ka tawo nga matarong maoy magdihog sa halaran; usa kini ka mahumot nga baho alang sa Labing Halangdon.

7Ang Ginoo modawat sa mga halad nga gihimo sa usa ka tawo nga matarong ug dili siya makalimot niini.

8Dayga ang Ginoo pinaagi sa madagayaon nga paghalad. Ayaw pagdinalo sa una mong mga abot.

9Pagmalipayon2 Cor. 9:7. inighatag nimo sa imong gasa ug sa imong ikapulo.

10Paghatag ngadto sa Labing Halangdon kutob sa imong mahimo sama nga siya naghatag kanimo sa madagayaon gayod.

11Ang Ginoo magbalos kanimo ug mas daghan pa.

12Apan ayaw pagsulay sa pagsuborno kaniya o sa pagsalig sa mga halad nga imong nakuha sa paagi nga dili maayo. Dili siya modawat niini.

Ang Hustisya sa Dios

Ang Ginoo makiangayon ug wala siyay pinalabi.

13Wala siya maghukom batok sa kabos; kon ang usa ka tawo nga linupigan mag-ampo ngadto kaniya, ang Ginoo mamati gayod.

14Kon ang mga ilo ug mga biyuda mag-ampo, sila iyang tagdon.

15Ang mga luha nga moagas gikan sa aping sa usa ka biyuda nagasinggit ug sumbong batok sa tawo nga maoy hinungdan sa iyang kasakit.

16Alagari nga mahinangpon ang Ginoo ug dawaton ka niya; ang imong mga pag-ampo moabot hangtod sa kapanganoran.

17Ang pag-ampo sa usa ka tawo nga mapaubsanon mosaylo sa mga panganod. Dili kini mohunong hangtod nga moabot sa Ginoo nga Labing Halangdon diin magpabilin kini hangtod nga iyang tubagon pinaagi sa pagpatunhay sa hustisya ug pagsilot sa mga sad-an.

18Ang Ginoo mobuhat sa walay langan. Dili siya makapailob sa daotan nga mga tawo. Manimalos siya pinaagi sa pagdugmok sa mga wala moila kaniya. Puohon niya sa hingpit ang mga walay kaluoy ug ang mga mapahitas-on ug laglagon niya ang gahom sa mga daotan.

19Hatagan niya ang tagsatagsa ka tawo sumala sa iyang mga hunahuna ug mga binuhatan. Tungod sa kaluoy sa Ginoo, ang iyang katawhan malipay sa iyang paghukom sa ilang kaso.

20Sa panahon sa kaguol ang iyang kaluoy hangpon sama sa ulan human sa usa ka hataas nga hulaw.