1Gikan sa mga pulo nga Grego, si Antioco nga anak ni Hari Demetrio, mihimo sa mosunod nga sulat ngadto kang Simon, ang Pangulong Pari ug gobernador sa mga Judio, ug ngadto sa tibuok nasod:
2“Si Hari Antioco ngadto kang Simon, ang Pangulong Pari ug gobernador, ug ngadto sa nasod nga Judio, komusta.
3Sumala sa inyong nasayran, ang gingharian sa akong mga katigulangan gipanag-iya sa mga mabudhion. Nakahukom ako sa pagbawi niini ug pag-uli sa iyang kabantog kanhi. Nagtigom ako ug usa ka dakong pundok sa kasundalohan nga sinuholan ug naghikay ug mga sakayan sa gubat.
4Naglaraw ako sa pagtakas sa yuta ug pagsulong kanila nga naglaglag sa daghang mga lungsod ug naggun-ob sa nasod.
5“Busa karon, gidasonan nako ang tanang mga pagpahigawas kaninyo gikan sa pagbayad ug buhis ug mga balayranan nga gitugot kaninyo sa mga hari kanhi.
6Gihatagan ko kamog awtoridad sa paghulma sa inyong kaugalingong mga salapi ingon nga kuwarta diha sa inyong kaugalingong nasod.
7Ang Jerusalem ug ang Templo magawas sa buhis. Ang tanang mga hinagiban nga inyong nahimo ug ang mga panalipod nga inyong natukod ug karon inyong gipuy-an magpabilin nga inyoha.
8Dugang pa niini, ang tanang mga utang nga karon inyong balayranan alang sa panudlanan sa hari o bayranan sa umaabot, gipapas na hangtod sa hangtod.
9Inigkabalik na nako pagmando sa akong gingharian, hatagan ko ikaw, ang imong nasod ug ang Templo sa sama ka dagkong pasidungog nga ang himaya sa imong nasod makita sa tibuok kalibotan.”
10Sa tuig 174, misulong si Antioco sa yuta sa iyang mga katigulangan. Kadaghanan sa mga sundalo mibali ngadto kaniya ug tungod niini diyutay na lang kaayo ang nahibilin uban kang Tripo.
11Si Tripo, nga gigukod ni Antioco, mikagiw ngadto sa siyudad sa baybayon sa Dor.
12Nakaamgo siya nga walay kalaoman ang iyang pagkabutang karon nga gibiyaan siya sa tanan niyang mga tropa.
13Unya ang Dor gilibotan pag-ataki ni Antioco pinaagi sa 120,000 ka maayong pagkabansay nga mga sundalo ug sa 8,000 ka sundalong nagkabayo.
14Inubanan sa mga sakayan sa dagat nga miapil sa pag-ataki, gilibotan niya sa hingpit ang lungsod ug gipiit kini pag-ayo ug walay bisan usa nga nakasulod o nakagula niini.
Ang Roma Nagpaluyo sa mga Judio15Samtang1 Mac. 12:16. kini nanghitabo, si Numenio ug sila nga uban kaniya nahiabot sa Jerusalem gikan sa Roma dala ang mosunod nga sulat nga gipadala ngadto sa nagkalainlaing mga hari ug mga nasod:
16“Gikan kang Lucio, konsul sa mga Romano, ngadto kang Hari Tolomeo, komusta.
17Usa ka delegasyon gikan sa among mga higala ug mga kaabin nga mga Judio miabot kanamo aron pagbag-o sa unang kasabotan sa panaghigalaay ug panag-abin. Gipadala sila sa Pangulong Pari nga si Simon ug sa katawhan nga Judio
18ug nagdala sila ug usa ka gasa nga usa ka bulawan nga taming nga may gibug-aton nga 571 ka kilo.
19Busa nakahukom kami sa pagsulat ngadto sa nagkalainlaing mga hari ug mga nasod aron pag-awhag kanila sa dili pagdagmal sa mga Judio, sa ilang mga lungsod o sa ilang mga nasod sa bisan unsang paagi. Kinahanglan dili sila makiggubat batok sa mga Judio o magpaluyo niadtong mosulong sa mga Judio.
20Nakahukom kami sa pagdawat sa taming ug sa paghatag kanila sa panalipod.
21Busa kon may bisan kinsang mabudhion nga moikyas gikan sa Judea ug modangop sa inyong yuta, itugyan sila ngadto kang Simon, ang Pangulong Pari, aron silotan niya sila sumala sa balaod sa mga Judio.”
22Si Lucio mihimo sa samang sulat ngadto kang Hari Demetrio, ngadto kang Atalo, ngadto kang Ariarates ug kang Arsaces
23ug ngadto sa tanan nga mosunod nga mga nasod: Sampsames, Esparta, Delos, Mindos, Sicion, Caria, Samos Pamfilia, Lisias, Halicarnaso, Rodes, Paselis, Cos, Side, Arado, Gortina, Nidos, Cipre ug Cirene.
24Usa ka kopya sa sulat gipadala usab ngadto kang Simon, ang Pangulong Pari.
Si Antioco VII Nahimong Kaaway ni Simon25Gilibotan pagsulong ni Hari Antioco sa ikaduha ka higayon ang Dor, ug kanunay kini niyang giataki. Nagtukod siya ug mga plataporma alang sa pag-ataki ug ang iyang babag nakasanta kang Tripo ug sa iyang mga tawo sa pagsulod o sa paggawas.
26Gipadala ni Simon ang 2,000 ka sundalo nga maayong pagkabansay aron pagtabang kang Antioco ingon man ang mga plata ug bulawan ug daghang mga kahimanan.
27Apan midumili si Antioco sa pagdawat niini ug gipapas niya ang tanan nga kasabotan sa unang panahon nga iyang nahimo uban kang Simon ug nahimo siya nga iyang kaaway.
28Unya si Antioco nagpadala sa iyang sinaligan nga opisyal nga si Atenobios aron pagpakigsabotsabot kang Simon. Giingnan niya si Simon, “Ikaw ang naghupot sa Jopa, Geser ug sa kota sa Jerusalem nga mga siyudad nga sakop sa akong gingharian.
29Imong gilaglag kining mga yutaa ug nakadala ikaw ug dakong kagubot sa nasod. Gimandoan nimo ang daghang mga dapit sa akong gingharian.
30Karon kinahanglan iuli nimo kining mga siyudara nga imong nakuha ug kinahanglan nga mohatag ka kanako sa salapi sa buhis nga imong napaningil gikan sa mga dapit nga imong gihuptan gawas sa yuta sa Judea.
31Kon dili ka buot mobuhat niini, kinahanglan nga mobayad ka kanako ug 16,500 ka kilo nga plata ug 16,500 pa ka kilo nga plata nga dugang aron ibayad kanako tungod sa mga kadaot ug sa mga buhis nga nawala. Kon magdumili ka sa pagbuhat bisan hain niini, makiggubat kami kanimo.”
32Sa paghiadto ni Atenobios ngadto sa Jerusalem ug pagkakita niya sa kaharianon sa korte ni Simon, sa bulawan ug sa plata nga mga kobiertos didto sa iyang hawanan alang sa kombira ug sa uban pa nga pasundayag sa dakong kadato, natingala siya. Gihatag niya ang mensahe sa hari ngadto kang Simon
33ug si Simon mitubag, “Wala gayod kami makakuha ug yuta gikan sa laing mga nasod o nakasakmit kami ug bisan unsa nga iyaha sa laing katawhan. Gibawi lamang namo ang pagbalik sa kaugalingon namong katigayonan nga among nasunod gikan sa among katigulangan, yuta nga sa walay katarongan giagaw kanamo sa among mga kaaway sa usa ka panahon o sa lain.
34Karon naggamit lamang kami niining kahigayonan sa pagbawi sa kabilin nga gikan sa among katigulangan.
35Mahitungod sa Jopa ug Geser nga inyong giangkon, mohatag kami kaninyo ug 3,300 ka kilo nga plata bisan pa nga ang mga tawo niining mga siyudara nakahimo ug dakong kadaot sa among nasod.”
Si Atenobios wala motubag
36apan mibalik siya nga masuk-anon ngadto sa hari. Sa pagsugilon niya ngadto sa hari sa gisulti ni Simon ug sa pagtaho sa kaharianon sa korte ni Simon ug sa tanan nga iyang nakita, ang hari nasuko pag-ayo.
Ang Kadaogan ni Juan batok kang Cendebeo37Samtang nanghitabo kini, si Tripo misakay sa usa ka sakayan ug miikyas ngadto sa lungsod sa Ortosia.
38Gitudlo ni Hari Antioco si Cendebeo nga magmamando sa mga kayutaan sa baybayon, sinangkapan ug mga sundalo nga naglakaw ug nagkabayo
39ug gisugo siya sa paglihok batok sa Judea. Gisugo usab siya sa pagtukod pag-usab sa lungsod sa Kidron ug sa paglig-on sa mga ganghaan niini aron mahimong makaaway niya ang katawhang Judio. Ang hari mismo mipadayon sa paggukod kang Tripo.
40Unya si Cendebeo miabot sa Jamnia ug misugod paghasol sa mga Judio pinaagi sa pagsulong sa Judea. Gidakop niya ang mga tawo ug gipamatay.
41Gitukod niya pag-usab ang Kidron ug nagbutang siya ug pipila ka bahin sa kasundalohan didto ug nakahimo silag mga sulong ug patrolya sa mga dalan sa Judea sumala sa gisugo sa hari.
Who We AreWhat We EelieveWhat We Do
2025 by iamachristian.org,Inc All rights reserved.
