Deuteronomio 25 - Cebuano Meaning-Based Bible

1“Kon adunay kaso nga husayon sa hukmanan, hukmi ninyo kon kinsay nasayop ug kinsay husto.

2Kon ang sad-an angay latoson, pakulobon siya sa maghuhukom diha sa iyang atubangan ug ipalatigo siya sa gidaghanon nga angay sa iyang sala.

3Apan2 Cor. 11:24. ang labing daghan kutob ra gayod sa 40 ka latos. Kon ipalatos siyag labaw niini, maulawan siya.

4“Ayaw1 Cor. 9:9; 1 Tim. 5:18. sap-ungi ang baba sa baka samtang naggiok kini.

Katungdanan alang sa Igsoon nga Namatay

5“KonMat. 22:14; Mar. 12:19; Luc. 20:28. magtipon pagpuyo ang duha ka igsoong lalaki ug unya mamatay ang usa kanila nga walay anak, kinahanglan nga dili magminyo ang biyuda niya ngadto sa laing tawo nga dili sakop sa panimalay. Ang igsoon sa iyang bana kinahanglang maoy mangasawa kaniya. Katungdanan kini sa igsoon sa usa ka bana nga namatay.

6Ang kamagulangang anak nga lalaki nga matawo maoy modala sa ngalan sa namatay nga igsoon aron dili mahanaw ang iyang ngalan sa Israel.

7KonRuth 4:7-8. magdumili siya sa pagpangasawa sa biyuda sa iyang igsoon, mahimong modangop ang biyuda ngadto sa hukmanan tungod kay nagdumili man ang maong tawo sa pagbangon sa ngalan sa iyang igsoon nga namatay.

8Unya ipatawag siya ug pakigsultihan sa mga kadagkoan sa siyudad. Kon moingon siya nga dili siya gusto nga mangasawa sa biyuda,

9moduol kaniya ang biyuda atubangan sa mga pangulo. Kuhaon sa biyuda ang sandalyas sa igsoon sa iyang namatayng bana ug unya lud-an niya ang nawong sa maong lalaki ug moingon, ‘Mao kini ang himoon ngadto sa lalaki nga magdumili sa pagbangon sa ngalan sa iyang igsoon.’

10Nganlan ang banay sa maong tawo, ‘Ang banay sa tawo nga gihuboan ug sandalyas.’

Ubang mga Balaod

11“Kon may duha ka lalaki nga mag-away ug ang asawa sa usa kanila motabang sa iyang bana ug gunitan niya ang itlog sa kaaway sa iyang bana,

12putla ang iyang kamot sa walay kukaluoy.

13“AyawLev. 19:35-36. paggamit ug timbangan nga dili husto

14ug ayaw paggamit ug dili hustong sukdanan.

15Ang husto gayong sukdanan ug timbangan mao lamay gamita aron mabuhi kamog dugay didto sa yuta nga ihatag kaninyo sa Ginoo nga inyong Dios.

16Gikasilagan sa Ginoo ang mga tawo nga manlimbong.

Ang Sugo sa Pagpatay sa mga Amalekanhon

17“HinumdomiExo. 17:8-14; 1 Sam. 15:2-9. ang gibuhat kaninyo sa mga Amalekanhon sa nagpanaw kamo gikan sa Ehipto.

18Gilipot kamo nila sa dihang gipangapoy ug nangaluya na kamo pag-ayo ug gipamatay ang tanan nga nanglimbasog nga nagsunod kaninyo.

19Busa kon hatagan na kamo sa Ginoo nga inyong Dios ug kalinaw didto sa yuta nga ihatag niya kaninyo, puoha ninyo ang mga Amalekanhon aron dili na gyod sila mahinumdoman pa. Ayaw gayod kini kalimti!