Mga Maghuhukom 3 - Cebuano Meaning-Based Bible

Gipasagdan ang mga Nasod aron Pagsulay sa Israel

1Ang Ginoo nagbilin ug pipila ka nasod aron pagsulay sa mga Israelita nga wala makasinatig mga gubat sa Canaan.

2Gituyo kini niya aron pagtudlo sa matag kaliwatan sa mga Israelita mahitungod sa gubat labi na niadtong wala pa gayod makasinatig gubat.

3Ang nahibilin mao ang lima ka siyudad sa mga Filistihanon, ang tanang mga Canaanhon, ang mga Sidonihanon ug ang mga Hibihanon nga nagpuyo sa Kabukiran sa Lebanon gikan sa Bukid sa Baal Hermon hangtod sa Agianan sa Hamat.

4Sila maoy gigamit aron pagsulay sa mga Israelita kon motuman ba sila o dili sa mga sugo nga gihatag sa Ginoo sa ilang mga katigulangan pinaagi kang Moises.

5Busa ang mga Israelita namuyo tipon sa mga Canaanhon, sa mga Hitihanon, sa mga Amorihanon, sa mga Perisihanon, sa mga Hibihanon ug sa mga Jebusihanon.

6Nakigminyo sila sa katawhan ug misimba sa ilang mga diosdios.

Si Otniel

7Ang mga Israelita nalimot sa Ginoo nga ilang Dios. Nagpakasala sila batok kaniya ug misimba sila sa mga Baal ug sa mga Asera.

8Busa nasuko ang Ginoo sa Israel ug mitugot nga mabuntog sila ni Cusan-rasataim nga hari sa Mesopotamia. Nailalom sila kaniya sulod sa walo ka tuig.

9Unya ang mga Israelita mituaw sa Ginoo ug nagpadala siyag usa ka tawo aron pagluwas kanila. Kini mao si Otniel nga anak sa manghod ni Caleb nga si Kenes.

10Ang espiritu sa Ginoo nagmando kaniya ug nahimo siyang pangulo sa Israel. Si Otniel nakiggubat ug mitugot ang Ginoo nga mabuntog niya ang hari sa Mesopotamia.

11Nagmalinawon ang Israel sulod sa 40 ka tuig. Unya namatay si Otniel nga anak ni Kenes.

Si Ehud

12Ang mga Israelita nagpakasala na usab batok sa Ginoo. Tungod niini gihimo sa Ginoo si Eglon, hari sa Moab, nga mas gamhanan pa kay sa Israel.

13Si Eglon nakig-abin sa mga Amorihanon ug sa mga Amalekanhon ug gibuntog nila ang Israel ug giilog nila ang siyudad sa mga palmera.

14Giulipon ni Eglon ang Israel sulod sa 18 ka tuig.

15Unya ang mga Israelita mituaw sa Ginoo ug nagpadala siyag usa ka tawo aron pagluwas kanila. Siya mao si Ehud, usa ka tawo nga walhon, anak ni Gera gikan sa banay ni Benjamin. Ang mga Israelita nagpadalag mga gasa pinaagi kang Ehud alang sa hari sa Moab nga si Eglon.

16Naghimo si Ehud ug usa ka punyal nga duhay sulab nga tunga sa metro ang gitas-on. Gitakin niya kini sa iyang tuong kilid ilalom sa iyang bisti.

17Unya gidala niya ang mga gasa ngadto kang Eglon. Si Eglon usa tawo nga tambok kaayo.

18Sa gikahatag na ni Ehud ang mga gasa ngadto kang Eglon, gipapauli niya ang mga tawo nga nagdala sa mga gasa.

19Apan sa didto na si Ehud sa Gilgal duol sa kinulitang bato, mibalik siya sa hari ug miingon, “Kamahalan, may sikreto akong ibalita kanimo.”

Ang hari miingon sa iyang mga sinaligan, “Biyai una kami!” Busa nanggula sila.

20Samtang nag-inusara paglingkod ang hari sa iyang bugnaw nga lawak sa itaas, miduol kaniya si Ehud ug miingon, “May mensahe ako gikan sa Dios alang kanimo.” Mitindog ang hari.

21Pinaagi sa iyang walang kamot gilanit ni Ehud ang punyal gikan sa tuo niyang kilid ug gidunggab ang tiyan sa hari.

22Mitaop ang tibuok punyal bisan gani ang puloan niini ug nalubong kini sa tambok tungod kay wala man kini hulbota ni Ehud ug nagpabilin diha sa tiyan sa hari ug migawas ang hugaw gikan niini.

23Unya migula si Ehud, gitakpan niya ang mga pultahan sa likod ug gikandadohan

24ug mipahawa siya. Nangabot ang mga sulugoon ug nakita nila nga gikandadohan ang mga pultahan. Nagdahom sila nga diha sa sulod ang hari nangasilyas.

25Dugay silang nagpaabot apan wala gayod mogula ang hari. Busa gikuha nila ang yawi ug giablihan ang pultahan. Nakita nila ang ilang agalon nga nagbuy-od sa salog nga patay na.

26Miikyas si Ehud samtang naghulat sila. Miagi siya sa kinulit nga mga bato ug miikyas ngadto sa Seirata.

27Pag-abot niya didto, gipatingog niya ang budyong nga sungay sa laking karnero didto sa kabungtoran sa Efraim aron pagtawag sa mga Israelita alang sa gubat. Unya gipangulohan niya sila gikan sa kabungtoran.

28Giingnan niya sila, “Sunod kamo kanako! Padag-on kamo sa Ginoo batok sa inyong mga kaaway nga taga-Moab.” Busa misunod sila kaniya paingon sa kapatagan ug giilog nila ang dapit nga tabokanan sa mga Moabihanon paingon sa Jordan. Wala nila tugoti nga may makatabok bisag usa ka tawo.

29Niadtong adlawa nakapatay silag mga 10,000 ka isog ug kusgan nga mga sundalong Moabihanon. Walay usa kanila nga nakaikyas.

30Sa maong adlaw gibuntog sa Israel ang Moab. Ug nagmalinawon ang nasod sulod sa 80 ka tuig.

Si Samgar

31Ang sunod nga maghuhukom mao si Samgar nga anak ni Anat. Nakapatay siyag 600 ka mga Filistihanon pinaagi sa tugsok sa ilong sa baka. Giluwas usab niya ang Israel gikan sa mga kaaway.