Nehemias 6 - Cebuano Meaning-Based Bible

Laraw sa Pagpatay kang Nehemias

1Sa dihang nabalitaan ni Sanbalat, ni Tobias ug ni Gesem nga taga-Arabia ug sa uban pang mga kaaway namo nga nahuman na namo ang pag-ayo sa kota (bisan tuod kon wala pa namo ikataod ang mga sira sa mga ganghaan niini),

2gipatawag ako ni Sanbalat ug ni Gesem kay kuno buot silang makigkita kanako didto sa usa ka balangay sa kapatagan sa Ono. Apan daotan diay silag tuyo kanako.

3Busa nagsugo akog mga tawo sa pagbalibad kanila nga dili ako makaadto kay daghan akog buhat ug dili ko buot nga usikan ko ang akong panahon aron lamang sa pagpakigkita kanila.

4Sa makaupat ka higayon gipasugoan ako nila nga buot silang makigkita kanako apan gitubag ko sila sa mao gihapong balibad.

5Unya sa ikalima nga higayon gipadad-an ako ni Sanbalat ug abli nga sulat pinaagi sa iyang sulugoon.

6Ang maong sulat nag-ingon, “Nakabalita kami sa ubang nasod ug bisan si Gesem nag-ingon nga ikaw ug ang mga Judio naglaraw sa pagrebelde ug maoy hinungdan nga giayo mo ang paril sa siyudad kay buot ka man nga mahimong hari.

7Nagpili ka kunog mga propeta nga maoy moproklamar kanimo ingon nga hari sa Juda dinhi sa Jerusalem. Sa walay duhaduha masayran kini sa hari busa maayo nga magsabotsabot kita.”

8Gitubag ko siya sa pag-ingon, “Bakak kanang imong giingon. Nagtumotumo ka lamang.”

9Buot nila kaming hadlokon sa pagtuo nga moundang kami sa among gibuhat. Apan misamot hinuon ang akong tinguha sa paghuman niini.

10Usa ka adlaw niana miadto ako sa balay ni Semaias, anak ni Delaias ug apo ni Mehetabel nga dili makabiya sa iyang balay. Miingon si Semaias kanako, “Magtigom kita didto sa Templo sa Dios ug takpan ta ang mga pultahan niini kay moanhi sila sa gabii ug patyon ka nila.”

11Apan miingon ako, “Dili mahimo nga magtinalawan ako. Nagtuo ka ba nga motago ako sa Templo aron maluwas? Dili ako moadto!”

12Nasabot ug nakita ko nga wala siya sugoa sa Dios apan nagsulti siyag pasidaan batok kanako kay gisuholan man siya ni Tobias ug ni Sanbalat.

13Gisuholan siya paghadlok kanako aron makasala ako. Sa ingon may kapasikaran na sila sa pagdaot sa akong ngalan agig pagbiaybiay kanako.

14Nag-ampo ako, “Ayaw kalimti, O Dios, ang gibuhat ni Tobias ug ni Sanbalat ug siloti sila. Hinumdomi usab ang babayeng propeta nga si Noadias ug ang ubang propeta nga naghadlok kanako.”

Natapos ang Trabaho

15Nahuman gayod ang pag-ayo sa paril sa Jerusalem sa ika-25 nga adlaw sa bulan sa Elul tapos sa 52 ka adlaw nga pagtrabaho.

16Ang tanan namong mga kaaway ug tanang kanasoran nakabalita bahin niini ug nangahadlok sila. Nakita nila nga ang maong kalamposan nahimo pinaagi sa tabang sa Dios.

17Niadtong panahona, ang mga kadagkoan sa Juda nakigsinulatay kang Tobias.

18Daghan siyag kaabin nga taga-Juda kay umagad man siya ni Secanias nga anak ni Ara. Ang iya usab nga anak nga si Johanan nangasawa sa anak ni Mesullam nga anak ni Baraquias.

19Gidayeg nila ang maayong mga nabuhat ni Tobias diha sa akong atubangan ug ilang gitaho kaniya ang akong gipanulti ug gisulatan ako niya aron mahadlok ako.