Ester (Grego) 3 - Cebuano Meaning-Based Bible

Si Haman Naglaraw sa Paglaglag sa mga Judio

1Unya usa ka panahon niana gipasidunggan ni Hari Ahasuero ang usa ka tawo nga ginganlag Haman nga anak ni Amadati ug usa ka taga-Bougia pinaagi sa pagpauswag kaniya ngadto sa katungdanan sa pagkaprimero ministro.

2Nagsugo ang hari nga ang tanang mga opisyal nga diha sa iyang serbisyo motahod kang Haman pinaagi sa pagyukbo kaniya. Silang tanan mihimo niini gawas ni Mardoqueo nga nagdumili sa pagyukbo kang Haman.

3Ang ubang mga opisyal nga nag-alagad sa hari nangutana kaniya ngano nga wala siya magtuman sa sugo sa hari.

4Matag adlaw giawhag nila siya sa pagtuman apan wala siya mamati kanila. Mipasabot siya sa pag-ingon, “Ako usa ka Judio ug dili ako makayukbo kang Haman.” Busa gisuginlan nila si Haman kon giunsa pagsupak ni Mardoqueo ang mga kasugoan sa hari.

5Naglagot pag-ayo si Haman sa iyang pagkahibalo nga si Mardoqueo dili moyukbo kaniya,

6busa naghimo siyag mga laraw sa pagpatay sa tanang mga Judio sa tibuok Emperyo sa Persia.

7Sa ika-12 nga tuig sa pagmando ni Hari Ahasuero, nagsugo si Haman nga himoon ang ripa aron mahibaloan ang hustong adlaw ug bulan sa paglaglag sa tanang Judio sulod sa usa ka adlaw. Ang ika-14 nga adlaw sa bulan sa Adar mao ang petsa nga napilian.

8Busa giingnan ni Haman ang hari, “Anaay usa ka kaliwat sa mga tawo nga nakatag sa kanasoran sa tibuok nimong emperyo. Nagtuman sila sa mga batasan nga lahi sa bisan unsang katawhan. Dugang pa niana, wala sila magtuman sa mga balaod sa emperyo busa dili maayo sa imong mga katuyoan nga pasagdan lamang sila.

9Kon makapahimuot kanimo Kamahalan, pagpakanaog ug usa ka sugo nga kinahanglang patyon sila. Kon buhaton mo kini, isaad ko ang pagbutang ug 340,000 ka kilo nga plata ngadto sa panudlanan sa hari.”

10Gikuha sa hari ang iyang singsing nga gigamit niya sa pagtimaan sa mga kasugoan nga opisyal ug gihatag kini ngadto kang Haman aron kasilyohan ang sugo nga sulaton batok sa mga Judio.

11Nagsulti kaniya ang hari, “Diha lang kanimo ang salapi apan buhata ang bisan unsa nga gusto mo mahitungod nianang kaliwata sa mga tawo.”

12Busa sa ika-13 nga adlaw sa unang bulan, gitawag ni Haman ang mga sekretaryo sa hari ug gidiktar ang usa ka sugo nga pagahubaron ngadto sa tanang sinultihan sa emperyo ug ipadala ngadto sa tanang mga magmamando ug mga gobernador. Gipakanaog kini sa ngalan ni Hari Ahasuero ug gipadala ngadto sa tanang 127 ka probinsiya gikan sa India ngadto sa Etiopia.

13Gidala sa mga sinugo kining kasugoan ngadto sa tagsatagsa ka probinsiya sa emperyo. Nahisulat niini ang kamandoan nga sa usa ka adlaw lamang sa ika-12 nga bulan, ang bulan sa Adar, ang tanang mga Judio kinahanglang patyon ug ang ilang mga kabtangan sakmiton.