1Busa ang hari ug si Haman miadto aron pagpakigsalo kang Ester
2sa ikaduhang higayon. Samtang nag-inom sila ug bino, ang hari nangutana pag-usab kang Ester, “Karon, Rayna Ester, unsa may imong gusto? Tug-ani ako ug maimo kana. Ihatag ko kanimo bisan katunga sa akong emperyo.”
3Mitubag si Rayna Ester, “Kamahalan, kon makapahimuot kanimo, ang pagtugot sa akong ubos nga pangayo, ang akong tinguha mao nga ako ug ang akong katawhan mabuhi.
4Ako ug ang akong katawhan gibaligya ngadto sa kaulipnan. Ang among mga kabtangan gisakmit ug karon kami pagalaglagon--kaming tanan lakip ang among mga kabataan. Kon paigo lamang unta kaming himoong mga ulipon, hangtod karon magpakahilom lamang unta ako, kay dili man ako buot nga ang among suliran makahasol pa sa hari.”
5Unya si Hari Ahasuero nangutana kang Ester, “Kinsay nangahas sa pagbuhat sa maong butang?”
6Mitubag si Ester, “Ang among kaaway mao kining daotang tawo nga si Haman!”
Sa kalisang miatubang si Haman sa hari ug sa rayna.
7Mitindog ang hari gikan sa lamisa ug migula ngadto sa mga tanaman sa palasyo. Nakita ni Haman nga nahimutang siya sa usa ka piligroso nga kahimtang busa nagpabilin siya aron pagpakiluoy kang Rayna Ester alang sa iyang kinabuhi.
8Igo lang siya nga nakahapa sa tiilan sa lingkoranan ni Ester aron pagpangayo sa kaluoy, sa dihang mibalik ang hari sa lawak gikan sa mga tanaman. Sa pagkakita niya niini, ang hari misinggit, “Imo bang lugoson ang akong asawa dinhi sa akong kaugalingong palasyo?”
Sa pagkadungog ni Haman niini, mitalikod siya nga nawad-an na sa paglaom.
9Unya si Buogatan nga usa sa mga yunuko miingon, “Si Haman nagpahimo na ug usa ka bitayan didto sa iyang balay aron mabitay niya si Mardoqueo nga maoy nagtug-an kanimo, Kamahalan, mahitungod sa daotang laraw. Ug kini may 22 ka metros ang gihabugon!”
Ang hari misugo, “Bitaya si Haman didto.”
10Busa gibitay si Haman didto sa bitayan nga iyang gitukod alang kang Mardoqueo. Unya napuypoy ang kasuko sa hari.
Who We AreWhat We EelieveWhat We Do
2025 by iamachristian.org,Inc All rights reserved.
