1O Ginoong Dios sa tibuok kalibotan, tan-awa kami ug kaluy-i.
2Himoa nga ang tanang nasod mobarog diha sa kahadlok kanimo.
3Lihok batok sa mga nasod nga langyaw ug pakit-a sila sa imong gahom!
4Gigamit mo kami aron pagpakita kanila unsa ikaw ka balaan; karon gamita sila aron pagpakita kanamo unsa ikaw ka gamhanan.
5O Ginoo, himoa nga makakat-on sila sama nga nakakat-on kami nga walay laing Dios gawas kanimo.
6Hatagi kamig bag-ong mga timailhan ug pagbuhat ug dugang pang mga milagro; ipakita kanamo ang imong gahom nga mahimayaon!
7-9Padangata kanang panahona diin ang tanan makasulti mahitungod sa dagkong mga butang nga imong gibuhat. Ibubo ang imong makalilisang ug nagdilaab nga kapungot ug ayaw palingkawasa bisan usa sa among mga kaaway. Laglaga sila nga nagdaugdaog sa imong katawhan.
10Puoha ang mga kaaway nga nagmando ug naghunahuna nga sila lamang ang mahinungdanon dinhi sa kalibotan!
11Tigoma pag-usab ang kabanayan sa Israel ug ihatag kanila pagbalik ang ilang yuta sama sa imong paghatag niini kanila kaniadto.
12Ginoo, kaluy-i ang Israel, ang katawhan nga nailhan pinaagi sa imong ngalan, ang imong gitawag nga panganay.
13Kaluy-i ang Jerusalem, ang imong balaan nga siyudad ug ang imong gipili nga puloy-anan.
14Pun-a sa imong himaya ug sa mga awit sa pagdayeg ang imong Templo didto sa Bukid sa Sion.
15Ipakita ang paglaban mo sa imong katawhan nga imong gibuhat sa sinugdan; tumana ang mga panagna nga nabungat diha sa imong ngalan.
16Gantihi sila nga nagsalig kanimo ug ipakita nga matarong ang imong mga propeta.
17O Ginoo, patalinghogi ang pag-ampo sa imong mga sulugoon nga nangayo sa panalangin ni Aaron alang sa imong katawhan. Unya ang tanan dinhi sa yuta moila nga ikaw ang Ginoo, ang Dios sa tanang katuigan.
Ang Pagpili ug Asawa18Ang tiyan modawat ug bisan unsang pagkaon apan adunay pagkaon nga mas maayo kay sa uban.
19Ug sama nga ang dila makaila sa mga lami sa nagkalainlaing matang sa karne, ang usa ka mahait nga salabotan makaila usab sa mga bakak.
20Ang usa ka tawo nga adunay hiwi nga panghunahuna maoy hinungdan sa kagubot apan ang usa ka tawo nga may kasinatian mahibalo unsaon pagbalos niini.
21Ang usa ka babaye modawat ug bisan kinsang lalaki aron pamanhon apan ang usa ka lalaki kinahanglang magpili pag-ayo sa iyang asawa.
22Ang katahom sa usa ka babaye makalipay sa usa ka lalaki; walay mas maanindot pa nga tan-awon alang sa mata sa tawo.
23Kon ang usa ka babaye maayo ug maaghop diha sa iyang pagpanulti, ang iyang bana mao ang labing palaran sa mga lalaki.
24Ang lalaki nga makapangasawa, makapanag-iya sa labing maayong butang: usa ka asawa nga motabang ug modasig kaniya.
25Kon ang usa ka yuta dili koralon, ang mga kawatan mosulod niini ug manguha sa ilang gusto. Ug kon ang usa ka tawo walay asawa, magsigi siyag suroysuroy ug unya mangagho.
26Ang mga tawo walay pagsalig sa usa ka lalaki nga walay puloy-anan ug matulog lang sa nagkalainlaing dapit matag gabii sama nga wala usab silay pagsalig diha sa usa ka kiriwan nga magsuroysuroy gikan sa usa ka lungsod ngadto sa laing lungsod.
Who We AreWhat We EelieveWhat We Do
2025 by iamachristian.org,Inc All rights reserved.
