1Ang matag tawo gihatagan ug daghang buluhaton. Usa ka mabug-at nga palas-anon ang gipahamtang kanatong tanan gikan sa adlaw sa atong pagkatawo hangtod sa adlaw nga mobalik kita ngadto sa atong inahang yuta.
2Puno kita sa kalibog ug kahadlok, nalisang sa adlaw sa atong kamatayon.
3-4Ingon niana kitang tanan gikan sa hari nga naglingkod sa iyang matahom nga trono ug nagsul-ob sa harianong bisti ug korona ngadto sa labing ubos nga tawo nga nagbisti ug nuog ug nagpuyo diha sa kakabos.
5Sa tibuok natong kinabuhi atong masinati ang kasuko, kasina ug ang kasamok. Kining mga butanga makasamok kanato; nagkinabuhi kita taliwala sa mapintas nga mga pakigbisog ug sa kahadlok sa kamatayon. Bisan kon mohigda na kita, naghunahuna kita sa bag-ong mga kasamok diha sa atong pagkatulog.
6Diyutay ra kitag kinatulgan kon aduna man ugaling. Sa paghikatulog nato, samukon kita sa atong mga hunahuna nga daw nagmata kita. Kon magdamgo kita nga nagdagan kita gikan sa usa ka kaaway,
7sa diha nga hapit na kita hiapsi, mahigmata kita ug mahuwasan sa dihang makaamgo nga wala diay angayng kahadlokan.
8Ania ang kinahanglan nga atubangon sa tanang mga binuhat, sa mga tawo ug sa mga mananap apan ngadto sa mga makasasala pito ka pilo ang pagkadaotan niini:
9ang kamatayon, ang kasamok pinaagi sa kusog, ang pakig-away, ang gubat, ang katalagman, ang gutom, ang sakit, ang kamatay.
10Kining tanang mga butanga gibuhat tungod sa mga daotan; sila mao ang hinungdan sa kalaglagan.
11Ang tanan nga naggikan sa yuta mobalik ngadto sa yuta sama nga ang tanang tubig modagayday balik ngadto sa dagat.
Ang mga Sangpotanan sa Daotan12Walay butang nga gikan sa suborno o sa pagpanlupig nga molungtad apan ang mga bunga sa pagkamaunongon magpabilin hangtod sa kahangtoran.
13Ang bahandi nga nakab-ot pinaagi sa limbong nahisama sa usa ka sapa nga nag-awas sa panahon sa tingdalugdog,
14nag-anod sa mga dagkong bato diha sa iyang pagbul-og apan unya sa kalit lamang mauga.
15Ang mga anak sa mga tawo nga wala magtuo sa Dios dili magbilin ug dagkong mga banay. Mahisama sila sa mga tanom nga buot mogamot diha sa pangpang ug
16sa mga balili sa tampi sa suba nga unang malaya kay sa bisan unsang tanom.
17Ang mga buhat sa kaluoy ug sa gugma molungtad hangtod sa kahangtoran.
Ang mga Kalipay sa Kinabuhi sa Tawo18Ang kinabuhi tam-is alang kaniya nga wala magsalig sa uban ug kaniya nga nagtrabaho aron mabuhi. Apan mas maayo ang pagkakaplag ug bahandi.
19Ang ngalan sa usa ka tawo maampingan kon aduna siyay mga anak o kon magtukod siyag usa ka siyudad apan ang pagkakaplag sa kaalam mas maayo nga paagi.
Ang pagpanag-iya ug mga hayop ug mga kakahoyan nga mamunga makahimo kanimong bantogan apan mas maayo ang paghupot ug usa ka asawa nga imong gihigugma.
20Ang bino ug ang honi makalipay kanimo apan ang usa ka malipayong kaminyoon mas maayo pa gayod.
21Ang mga plawta ug mga alpa maghimo ug maanindot nga honi apan ang usa ka maayong tingog mas maayo kay sa bisan hain niining duha.
22Ang kaambong ug ang katahom makapahimuot sa mata apan dili sama kaanindot sa bag-ong subol sa panahon sa tingbulak.
23Dili ikaw mahisalaag uban sa usa ka maayong higala o silingan apan ang usa ka but-an nga asawa mas maayo kay kanila.
24Maayo nga aduna kay mga igsoong lalaki ug mga magtatabang sa panahon sa kalisdanan apan mas makatabang ug dako kon magbansay ka pagpanghatag ngadto sa mga kabos.
25Ang bulawan ug plata maghatag ug kasigurohan apan mas maayo ang maayong tambag.
26Ang kadato ug ang kusog maghatag ug pagsalig apan ang kahadlok sa Ginoo maghatag ug mas dako pa gayod nga pagsalig. Kon may kahadlok ikaw sa Ginoo wala ka nay lain pang gikinahanglan. Mao kini ang hinabang nga imong gikinahanglan.
27Ang kahadlok sa Ginoo sama sa usa ka malamboon nga tanaman sa mga panalangin; dili na ikaw magkinahanglan ug lain pang mas mahimayaon nga kadangpan.
Pagpakilimos28Anak, ayaw pagkinabuhi sama sa makililimos; mas maayo pang mamatay kay sa magpakilimos.
29Kon nagsalig ikaw sa usa ka tawo alang sa imong pagkaon, buhi ka apan wala magpakabuhi. Gibulingan mo ang imong kaugalingon pinaagi sa pagdawat sa pagkaon gikan sa laing tawo. Apan ang tawong but-an ug may kahibalo maglikay gayod niini.
30Ang usa ka walay ulaw nga tawo makahimo sa pagpakilimos nga daw tam-is apan adunay nagadilaab diha sa sulod niya.
Who We AreWhat We EelieveWhat We Do
2025 by iamachristian.org,Inc All rights reserved.
