Ester (Grego) B - Cebuano Meaning-Based Bible

Ang Sugo ni Ahasuero batok sa mga Judio

14 Mao kini ang usa ka kopya sa sugo:

“Si Hari Ahasuero, ang Bantogan, nagpadala niining mosunod nga sugo ngadto sa mga gobernador sa iyang 127 ka probinsiya, gikan sa India ngadto sa Etiopia, ug sa mga opisyal nga ubos kanila:

15 “Human ako mahimong hari sa daghang mga nasod ug magmamando sa tibuok kalibotan, maoy akong tinguha nga ang akong mga ginsakpan magpuyo gayod kanunay nga malinawon. Mao kini ang akong pagbuot, dili tungod sa pagpagarbo sa akong gahom kondili tungod kay makatarunganon ako kanunay ug nagdumala sa akong mga ginsakpan sa minaayo. Hugot ang akong hunahuna nga ibalik ang kalinaw nga gipangandoy sa tanan ug sa pagbuhat sa gikinahanglan aron paghimo ug usa ka gingharian nga sibilisado ug walay kuyaw alang sa biyahe gikan sa usa ka utlanan ngadto sa lain.

16 “Gipangutana ko ang akong mga magtatambag unsaon pagkab-ot niining tuyoa ug si Haman naghimog usa ka sugyot. Gibantog siya dinhi kanato nga usa ka tawo nga may dakong kaalam ug sa tanang panahon nagpakita siya sa iyang pagtagad alang sa kaayohan sa gingharian. Tungod sa iyang walay bugto nga pagkamaunongon, gituboy siya ngadto sa ikaduhang labing taas nga katungdanan sa emperyo.

17 Karon lang bag-o gitug-anan kami ni Haman mahitungod sa usa ka masupilon nga katawhan nga nakatag diha sa ubang katawhan sa emperyo. Gipasabot kami niya nga kining mga tawhana nagbaton sa ilang kaugalingong mga balaod, supak sila sa ubang nasod ug sa kanunay wala magtagad sa mga sugo sa hari. Bunga sa ilang binuhatan, wala kami makahimo pagpabarog sa usa ka hiniusa nga kagamhanan nga among gitinguha pag-ayo alang sa emperyo.

18 “Kining mga tawhana kaaway sa atong kagamhanan ug naghimog makalilisang nga mga krimen nga naghulga sa kasigurohan sa emperyo. Nagsunod sila ug lain nga mga pamatasan, nagsubay sa ilang kaugalingong mga balaod ug sila ra ang nagpabilin diha sa ilang kanunay nga pagsupak sa ubang katawhan.

19 Tungod niining mga hitabo nga gihisgotan, nagmando kami nga patyon ang mga tawo nga gihisgotan ni Haman nga atong primero ministro. Silang tanan, lakip ang mga babaye ug mga bata kinahanglang patyon ug walay usa nga ibilin. Sila atong mga kaaway busa dili kita magpakitag kaluoy kanila. Kining sugoa kinahanglang tumanon niining tuiga, sa ika-14 ka adlaw sa ika-12 ka bulan, ang bulan sa Adar.

20 Kining mga tawhana nga maoy hinungdan sa daghang mga kagubot sa dugay nang panahon, mamatay sa ngilngig nga kamatayon sa usa lamang ka adlaw. Human niana, ang atong kagamhanan makabaton na ug kalinaw.”