Judit 11 - Cebuano Meaning-Based Bible

1Miingon si Holofernes kang Judit, “Ayaw kaguol ug dili ka angay nga mahadlok. Wala gayod ako makadagmal kang bisan kinsa nga buot moalagad kang Nabucodonosor nga hari sa tibuok kalibotan.

2Bisan karon, kon ang inyong mga tawo didto sa kabukiran wala pa mag-insulto kanako, dili unta ako makiggubat kanila. Sila ra ang hinungdan niining tanang kagubot.

3Apan tug-ani ako, nganong mibiya ka man kanila ug mianhi kanamo? Layo ka sa peligro dinhi. Wala kay angay nga kahadlokan. Karong gabhiona giluwas mo ang imong kinabuhi pinaagi sa imong pag-anhi dinhi ug dili ka mamiligro sa umaabot.

4Walay usa dinhi nga magpasipala kanimo. Ang tanan magtagad kanimo pag-ayo sama sa ubang mga sulugoon sa akong agalon nga si Nabucodonosor.”

5Unya miingon si Judit kang Holofernes, “Tugoti ako sa pagsulti kanimo, sir, ug palihog patalinghogi ang akong isulti. Tug-anan ko ikaw sa tinuod.

6Kon sundon mo ang akong tambag, ang Dios maghimog dakong butang diha kanimo ug ikaw dili mapakyas sa imong laraw.

7KayJer. 27:6; Dan. 2:38. nanumpa ako kanimo pinaagi sa kinabuhi ug kusog ni Nabucodonosor nga hari sa tibuok kalibotan nga nagpadala kanimo aron pagdalag kahusay sa tanang mga ginsakpan sa iyang gingharian. Dili lamang ang mga tawo ang nag-alagad kaniya tungod kanimo kondili hangtod usab ang mga mananap nga ihalas, ang kahayopan ug ang kalanggaman nagsugot kaniya. Tungod kanimo, si Nabucodonosor ug ang iyang tibuok gingharian mouswag.

8Nakadungog kami sa imong pagkamakinaadmanon ug kaigmat. Ang tibuok kalibotan nasayod nga ikaw ang labing maalamon, batid ug labing maayong heneral sa tibuok emperyo sa Asiria.

9Si Aquior giluwas sa kalakin-an sa Betulia ug gitug-anan kami sa iyang gisulti sa imong konseho sa gubat.

10Sir, palihog tagda pag-ayo ang gisulti ni Aquior kanimo kay kini tinuod. Walay makapanamastamas o makabuntog sa among katawhan gawas kon makasala sila batok sa ilang Dios.

11“Apan dili ka mapakyas o masayop sa pagkab-ot sa imong tuyo. Kon ang mga Israelita makasala ug makapalagot sa ilang Dios, mangamatay sila.

12Ang ilang pagkaon nangahurot na ug diyutay na lang kaayo ang ilang tubig busa napugos sila pag-ihaw sa ilang mga hayop ug pagkaon sa mga kalan-on nga gidili gayod sa Balaod sa Dios.

13NakahukomExo. 23:19; Lev. 27:30. sila pagkaon sa trigo nga gilain gikan sa sayo nga ani ug sa mga ikapulo sa bino ug lana nga mga balaan ug gigahin alang sa mga pari nga nag-alagad sa Dios didto sa Jerusalem. Gidid-an kaming tanan bisan sa paghikap niining balaan nga pagkaon

14apan kay ang mga tawo sa Jerusalem nakasupak na niining balaora, ang katawhan sa among lungsod nagpadala ug mga mensahero ngadto sa Konseho didto ug naghangyo nga tugotan usab sila sa paghimo niini.

15Sa adlaw nga tugotan sila sa pagkaon, mokaon sila sa maong pagkaon ug makahimo ikaw sa paglaglag kanila.

16Sa pagkasayod ko gayod niini, mibiya ako sa akong mga katagilungsod. Gipadala ako sa Dios aron magbuhat uban kanimo sa butang nga makapahibulong sa tanan sa tibuok kalibotan nga makadungog niini.

17Sir, ako usa ka babaye nga nagtahod ug nagsimba sa Dios sa langit adlaw ug gabii. Magpabilin ako dinhi sa imong kampo ug matag gabii mogula ako ngadto sa walog aron pag-ampo sa Dios ug tug-anan ako niya kanus-a makasala ang mga Israelita.

18Sa dihang mahibaloan na nako kini, moanhi ako ug pahibaloon ko ikaw ug makagula ikaw uban sa tibuok mong kasundalohan. Ang mga Israelita dili makahimo sa pagpanalipod sa ilang kaugalingon batok kanimo.

19Giyahan ko ikaw latas sa kinataliwad-an sa yuta sa Juda hangtod moabot kita sa Jerusalem diin koronahan ko ikaw nga hari didto sa taliwala sa siyudad. Patibulaagon mo ang katawhan sa Jerusalem sama sa mga karnero nga walay magbalantay. Wala gani usa ka iro nga mangahas sa pagngulob batok kanimo. Ang Dios nagpadayag nang daan niining mga butanga kanako ug nagpadala kanako aron pagtaho niini nganha kanimo.”

20Si Holofernes ug ang iyang kaugalingong mga sulugoon nahimuot sa gisulti ni Judit ug gidayeg nila ang iyang kaalam.

21Nag-ingnanay sila, “Siya mao tingali ang labing maalamon ug labing matahom nga babaye sa kalibotan.”

22Unya miingon si Holofernes kaniya, “Maayo nga ang Dios nagpadala kanimo nganhi aron maghatag kanamo ug kadaogan ug maglaglag kanila nga nag-insulto kang Hari Nabucodonosor.

23Dili lamang ikaw maanyag kondili mahibalo ikaw nga mohimog usa ka pakigpulong. Kon buhaton mo ang imong gisaad, ang imong Dios mahimong akong Dios. Magpuyo ikaw sa palasyo ni Hari Nabucodonosor ug mahimong bantogan sa tibuok kalibotan.”