1Sa panahon nga napukan si Nicanor, si Antioco usab wala na magkadimao busa misibog siya gikan sa Persia.
2Nahitabo kini kay misulod siya sa siyudad sa Persepolis ug misulay sa pagpangawat diha sa usa ka templo ug sa pag-ilog sa siyudad. Busa ang mga tawo mialsa ug miataki kang Antioco ug napugos siya sa pagpasibog sa iyang kasundalohan nga puno sa kaulaw.
3Sa pag-abot niya sa Ecbatana, gisuginlan siya unsa ang nahitabo sa mga kasundalohan ni Nicanor ug ni Timoteo.
4Nasuko siya pag-ayo ug mihukom nga iyang ipahamtang ngadto sa mga Judio ang kaparotan nga iyang naangkon. Busa gisugo niya ang tigmaneho sa iyang karwahi nga dili mohunong hangtod nga moabot sila sa Jerusalem. Uban sa dakong garbo miingon siya, “Himoon ko nga usa ka lubnganan sa mga Judio ang Jerusalem.”
Apan wala siya mahibalo nga ang iyang gipadulngan mao ang silot kaniya sa Dios.
5Ug tuod man, sa pagkahuman gayod niyag sulti niining pulonga, ang Ginoo nga nagatan-aw sa tanan, ang Dios sa Israel, mipahamtang kaniya ug usa ka dili masabot nga balatian. Giataki siya sa usa ka hait nga sakit sa tiyan ug wala gayoy makaayo niini.
6Mao kini ang silot nga angay sa tawo nga hilabihang nakapaantos sa uban.
7Apan wala gayod kini makapahunong sa iyang pagkamapahitas-on. Nahimo hinuon siyang mas mapagarbohon kay sa kaniadto ug nagpangusmo siya sa kapungot ug nagpadayon sa iyang mga hulga batok sa mga Judio. Busa iyang gisugo ang tigmaneho sa karwahi nga pakusgan pa ang pagpadagan. Tungod niini nahulog hinuon siya sa iyang karwahi ug nagkapiangpiang.
8Tungod sa iyang pagkamapahitas-on naghunahuna siya nga mahimo niyang payukbuon kaniya ang mga balod sa lawod ug timbangon ang tag-as nga mga bukid. Apan dihadiha nahulog siya ug nahapla sa yuta ug giyayongan diha sa usa ka higdaanan. Tin-aw kini nga timaan sa gahom sa Dios ngadto sa tanan.
9Ang lawas niining maong tawo nga walay Dios giulod ug nag-ilaid sa makalilisang nga kasakit ug pag-antos. Ang baho hilabihan kangil-ad nga ang iyang tibuok kasundalohan giluod
10ug walay nakahimo sa pagduol aron pagpas-an kaniya. Apan sa hamubo lamang nga panahon sa wala pa kini, naghunahuna siya nga makakab-ot siya sa mga bituon.
Si Antioco Naghimo ug Usa ka Saad ngadto sa Dios(1 Mac. 6:8-17)11Si Antioco naguol pag-ayo ug nag-antos sa walay hunong nga sakit tungod sa silot nga gipahamtang sa Dios kaniya busa sa kataposan nakaamgo siya ug mibiya siya sa iyang pagkamapahitas-on.
12Unya sa diha nga dili na siya makaantos sa iyang kaugalingong kabaho, miingon siya, “Husto gayod nga ang tanang tawo kinahanglan nga mahimutang ubos sa Dios ug dili maghunahuna nga sila tupong kaniya.”
13Ang daotan nga si Antioco naghimo ug saad ngadto sa Ginoo nga wala na gayod maluoy kaniya. Si Antioco miingon,
14“Naghunahuna ako makausa sa pagpatag sa Jerusalem ug sa paghimo niadtong balaang siyudad nga usa ka lubnganan sa mga Judio apan karon akong gipahayag nga kini usa ka siyudad nga gawasnon.
15Naglaraw ako sa pagbalibag ngadto sa gawas sa patayng lawas sa mga Judio ug sa ilang mga anak aron kan-on sa mga ihalas nga mga mananap ug sa mga langgam kay wala ako mag-isip kanila nga angay nga ilubong. Apan karon hatagan ko sila sa samang mga katungod nga gipahimuslan sa mga lungsoranon sa Atenas.
16Kaniadto gitulis ko ang Templo ug gisakmit ang balaan nga mga galamiton niini apan karon pun-on ko kini sa maanindot nga mga gasa ug sa mas maayo nga mga galamiton kay sa kaniadto ug bayran ko ang bili sa mga sakripisyo gikan sa akong kaugalingon nga katigayonan.
17Gawas pa niining tanan, ako mismo magpaka-Judio. Moadto ako bisan diin nga gipuy-an sa mga tawo ug suginlan ko sila sa gahom sa Dios.”
Ang Sulat ni Antioco ngadto sa mga Judio18Si Antioco nawad-an sa paglaom ug wala makakaplag ug kahupayan sa iyang sakit tungod kay ang Dios nagsilot man kaniya sumala sa angay kaniya busa nagsulat siya niining mosunod nga sulat ngadto sa mga Judio:
19“Gikan kang Hari Antioco ngadto sa mga Judio, ang tinahod kong mga ginsakpan. Mainiton nga mga pangomusta ug mga panghinaot alang sa inyong maayong panglawas ug kahamugaway.
20“Manghinaot ako nga kamo ug ang inyong mga banay anaa sa maayong panglawas ug nga ang tanan maayo diha kaninyo. Ang dakong paglaom anaa sa Dios
21ug nahinumdom ako uban sa usa ka lalom nga kalipay sa pagtahod ug kaayo nga inyong gipakita kanako.
“Sa akong pagbalik padulong sa amo gikan sa Persia gitakboyan akog mabug-at nga sakit ug busa naghunahuna ako nga labing maayo ang pagsugod paghimog mga laraw alang sa kaayohan sa tanan nga katawhan.
22Wala ako kawad-i ug paglaom nga mamaayo; gani puno ako sa pagsalig nga mabawi ko ang maayong panglawas.
23Apan nahinumdom ako nga maoy naandan sa ang akong amahan ang pagtudlo ug usa ka manununod sa matag higayon nga moadto siya sa silangan sa Eufrates.
24Iya kining gihimo aron kon adunay mahitabo nga wala paabota o kon may daotan nga balita nga moabot, ang iyang mga ginsakpan dili magkaguliyang kay nahibalo na man sila kinsa ang gibilin sa pagmando.
25Nahibalo usab ako giunsa sa mga magmamando nga anaa sa mga utlanan sa akong gingharian sa pagbantay kanunay alang sa bisan unsang higayon nga moabot. Mao kana nga akong gitudlo ang akong anak nga si Antioco aron maoy mosunod kanako sa pagkahari. Sa makadaghan, gitugyan ko kaniya ang pagdumala kaninyo ug girekomendar ko siya nganha kaninyo sa akong paglakaw sa akong naandang mga pagduaw ngadto sa mga lalawigan sa silangan sa Eufrates. (Siya nagdawat karon ug usa ka kopya sa sulat nga magsunod.)
26Karon, giawhag ko kamo sa paghinumdom sa mga maayong butang nga akong nahimo alang kaninyo, sa tinagsa ug sa inyong nasod ug sa pagpadayon sa inyong maayong kabubut-on alang kanako ug sa akong anak.
27Nagsalig ako nga ayohon kamo niya pagdumala uban sa kaangayan sama sa akong gihimo kanunay.”
28Ug busa kining mamumuno nga nagtunglo sa Dios nag-antos sa samang makalilisang nga mga kasakit nga iyang gikapahamtang ngadto sa uban ug unya namatay siya sa alaot nga kamatayon didto sa kabukiran sa usa ka yuta nga langyaw.
29Ang iyang lawas gidala ni Felipe nga usa sa iyang suod nga higala balik sa ila. Apan nahadlok si Felipe sa anak ni Antioco busa miadto siya ngadto kang Hari Tolomeo Pilometor sa Ehipto.
Who We AreWhat We EelieveWhat We Do
2025 by iamachristian.org,Inc All rights reserved.
