1Sa tuig 172 si Hari Demetrio II nagtigom sa iyang kasundalohan ug miadto sa Media aron pagpangita ug dugang hinabang alang sa iyang gubat batok kang Tripo.
2Sa pagkadungog ni Hari Arsaces VI nga hari sa Persia ug Media nga si Demetrio misulod sa ilang yuta, gipadala niya ang usa sa iyang komandante kuyog ang pipila ka mga tropa aron pagdakop kang Demetrio nga buhi.
3Gisulong nila ug gibuntog ang kasundalohan ni Demetrio, gidakop siya nga buhi ug gidala siya ngadto kang Hari Arsaces nga mitambog kaniya ngadto sa prisohan.
4Ang yuta sa Judea nagmalinawon samtang buhi pa si Simon. Sulod sa tibuok niyang paghari, gigamit niya ang iyang gahom aron pagbuhat ug maayo alang sa iyang katawhan, ug kanunay sila nga nahimuot kaniya sa iyang pagkahari.
5Gidugangan niya ang iyang kabantog sa iyang pagkuha sa dunggoanan sa Jopa ug pag-abli niya sa agianan ngadto sa mga pulo nga Grego.
6Dili lamang kay iyang gipadako ang kayutaan sa iyang nasod ug gimandoan ang tibuok kayutaan,
7gidala usab niya pagbalik ang daghang mga binilanggo sa gubat ug nakuha niya ang Geser, Betzur ug ang kota sa Jerusalem. Gihinloan niya ang kota ug walay bisan usa nga misupak kaniya.
8Giuma sa mga Judio ang ilang yuta diha sa kalinaw; ang yuta mihatag sa iyang mga abot ug ang mga kahoy namunga.
9Ang mga batan-on nga mga lalaki nagpagawal sa ilang maanindot nga uniporme sa pagkasundalo, samtang ang mga tigulang nga mga lalaki naglingkod sa mga plasa sa siyudad ug naghisgot mahitungod sa dagkong mga butang nga nanghitabo.
10Gisangkapan ni Simon ang mga siyudad ug pagkaon ug gihatagan sila ug mga hinagiban alang sa pagpanalipod. Ang iyang kabantog mikaylap sa tanang dapit.
11Gidala niya ang kalinaw ngadto sa nasod ug ang kasadya sa Israel wala makaila ug kinutoban.
12Ang tanan nagpuyo nga malinawon taliwala sa ilang kaugalingon nga mga parasan ug mga kakahoyan sa igos ug walay nakapahadlok kanila.
13Niadtong mga adlawa ang tanang mga hari nga kaaway nangabuntog ug walay usa nga nahibilin didto sa yuta aron pagpakig-away batok sa mga Judio.
14Gisangkapan ni Simon ug hinabang ang tanang mga kabos sa iyang katawhan ug giniyahan sa balaod ni Moises, gikuha niya ang tanang mga tawo nga daotan ug wala mag-ilag balaod.
15Gisangkapan niya ang Templo ug mga luho nga mga kasangkapan ug gidugangan niya ug daghang mga galamiton aron magamit alang sa pagsimba.
16Sa pag-abot sa balita didto sa Roma ug Esparta nga si Jonatan namatay, nagdala kini ug dakong kasub-anan.
17Apan sa pagkadungog sa taga-Esparta nga si Simon mipuli sa iyang igsoon sa pagka Pangulong Pari ug nga nagmando siya sa mga kabalangayan ug sa iyang mga lungsod,
18nagkulit1 Mac. 8:22. sila didto sa mga papan nga bronsi ug usa ka pagbag-o nga kasabotan sa panaghigalaay nga ilang nahimo uban sa ilang mga igsoon nga Judio ug kang Jonatan ug gipadala ang mga papan ngadto kaniya.
19Gibasa kini atubangan sa mga tawo nga nagkatigom sa Jerusalem.
20Ang mosunod maoy usa ka kopya sa sulat nga gipadala sa mga taga-Esparta:
“Ang katawhan sa Esparta ug ang ilang mga magmamando ngadto kang Simon nga Pangulong Pari, ngadto sa mga pangulo ug sa mga pari sa mga Judio ug ngadto sa tanan nga among igsoon nga mga Judio, komusta.
21Ang delegasyon nga inyong gipadala nganhi sa among katawhan nagtug-an kanamo unsa katinamod ug unsa kainila ninyo. Ang ilang pagduaw maoy usa ka tinubdan sa kalipay alang kanamo
22ug usa ka taho sa ilang pagduaw gisulat sa among mga talaan nga publiko ingon niining mosunod: ‘Si Numenio nga anak ni Antioco ug si Antipater nga anak ni Jason nagpasidungog sa mga tinugyanan sa mga Judio nga mibarog sa among atubangan aron pagbag-o sa ilang kasabotan sa panaghigalaay.
23Ang tigom sa katawhan nahimuot sa pagdawat niining mga tawhana uban sa tanang mga pasidungog ug sa pagbutang ug usa ka kopya sa ilang taho didto sa publiko nga tigomanan sa mga sinulat aron ang katawhan sa Esparta makabaton ug usa ka taho niini. Usa ka kopya niining dokumentoha gihimo alang sa Pangulong Pari nga si Simon.’”
24Unya gipadala ni Simon si Numenio ngadto sa Roma dala ang gasa nga usa ka dakong taming nga bulawan nga motimbang ug 571 ka kilo aron pagdason sa panag-abin sa mga Judio uban sa mga Romano.
25Sa pagkadungog sa katawhan sa Israel mahitungod niining tanan, nangutana sila sa ilang kaugalingon, “Unsaon man nato pagpadayag sa atong mga pagpasalamat ngadto kang Simon ug sa iyang mga anak nga lalaki?
26Siya, ang iyang mga igsoong lalaki, ang tibuok banay sa iyang amahan maoy tore sa kusog alang sa atong nasod. Giiway nila halayo kanato ang atong mga kaaway ug giluwas ang atong nasod.”
Busa ila kining gisulat diha sa mga papan nga bronsi ug gibutang kini sa mga haligi didto sa Bukid sa Sion.
27Ang gisulat mabasa ingon sa mosunod:
“Sa ika-18 nga adlaw sa bulan sa Elul, sa tuig 172, sa ato pa, sa ikatulo nga tuig sa pagmando ni Simon, ang Pangulong Pari,
28didto sa usa ka dakong tigom sa mga pari, mga tawo, mga opisyal ug mga pangulo nga nasodnon, ang mosunod nga mga hitabo gipahibalo kanamo:
29Sa makadaghan sa diha nga may gubat nga nahitabo sa nasod, si Simon nga anak ni Matatias, usa ka pari sa banay ni Jehoiarib ug ang iyang mga igsoong lalaki mitahan sa ilang mga kinabuhi aron pagpanalipod sa atong nasod, sa atong Templo ug sa atong Balaod batok sa atong mga kaaway. Naghatag sila ug dakong himaya sa atong nasod.
30Gihiusa ni Jonatan ang atong katawhan ug nahimo siyang Pangulong Pari una pa siya mamatay.
31Ang mga kaaway sa mga Judio naglaraw sa pag-ilog sa yuta ug sa pagpanamastamas sa Templo.
32Unya si Simon maoy mimando ug nakig-away alang sa iyang yutang natawhan. Migasto siya ug usa ka dakong kantidad sa iyang kaugalingong salapi aron masangkapan ug mga hinagiban ug mga suhol ang kasundalohan sa iyang nasod.
33Gilig-on niya ang mga lungsod sa Judea ug labi na gayod ang Betzur didto sa mga utlanan, diin ang mga hinagiban sa kaaway gitigom kaniadto. Nagbutang siya ug usa ka bahin sa kasundalohan didto.
34Gilig-on niya ug mga kota ang dunggoanan sa Jopa ug ang siyudad sa Geser didto sa utlanan sa Asdod nga kanhi puy-an sa mga sundalo sa kaaway. Gipapuyo niya ang mga Judio didto ug gisangkapan niya ang mga lungsod sa tanan nga gikinahanglan sa mga tawo.
35Sa pagkakita sa mga tawo sa pagkamaunongon ni Simon sa iyang nasod ug giunsa niya pagdala ug himaya ang iyang nasod, gihimo siya nila nga ilang pangulo ug Pangulong Pari. Gihimo nila kini tungod sa tanan nga iyang nabuhat pinaagi sa iyang pagkamaunongon ug tungod kay nagdala siya sa hustisya ug naninguha sa tanang paagi pagdalag himaya alang sa iyang nasod.
36“Ubos sa iyang pagpangulo ang mga dili Judio naabog gawas sa yuta. Ang mga sundalo nga kaaway napugos sa paggula sa kayutaan sa amihanan sa Templo diin gitukod nila ang kota nga ilang gikampohan diin manggula sila ug manamastamas sa balaan nga Templo.
37Si Simon nagpapuyo ug mga Judio didto sa kota, gilig-on niya kini alang sa kasigurohan sa nasod ug sa siyudad sa Jerusalem ug gipatas-an niya ang mga paril sa siyudad.
38Sangpotanan niini, gidasonan siya ni Hari Demetrio sa pagka Pangulong Pari
39ug gihatagan siya sa titulo nga “Higala sa Hari,” ug gihatagan siya ug dakong dungog.
40Gihimo kini ni Demetrio tungod kay nakadungog siya nga ang mga Romano nagtawag sa mga Judio nga ilang mga higala, mga kaabin ug mga igsoon ug nga nakadawat sila sa delegasyon ni Simon uban sa tibuok nga pagpasidungog.
41“Busa, ang mga Judio ug ang ilang mga pari nalipay sa paghupot kang Simon ug sa iyang mga kaliwat nga ilang mga pangulo ug Pangulong Pari hangtod magpakita ang usa ka matuod nga propeta.
42Si Simon maoy nagmando sa ilang nasod, maoy engkargado sa Templo ug maoy magmamando sa ilang kasundalohan. Siya ang engkargado sa mga kinahanglan nga militar, sa paglig-on sa mga kota ug sa mga buhat nga publiko.
43Ang mga tawo kinahanglan nga magtahod kaniya sa tanan nga mga butang. Ang tanang mga kasabotan sa gobyerno kinahanglan nga himoon sa iyang ngalan. Naghupot siya sa katungod sa pagsul-ob sa mga bisti nga harianon uban sa bulawan nga hibilya sa abaga.
44“Walay bisan kinsang tawo, pari man o dili, nga may katungod pinasubay sa balaod sa pag-anular sa bisan unsa niining desisyon o sa pagbalhin o pag-usab sa bisan unsang sugo ni Simon, sa pagtigom sa bisan unsang panagpundok sa nasod nga walay pagtugot o sa pagsul-ob sa mga bisti nga harianon uban sa bulawan nga hibilya sa abaga.
45Bisan kinsa nga mosupak ug dili magtagad niining mga lagdaa, silotan.
46“Ang mga tawo mihatag sa ilang pag-uyon nga walay bisan usa nga misupak sa pagtugot kang Simon sa katungod sa pagbuhat sumala niining mga lagdaa.
47Miuyon si Simon ug mitando siya sa pagkalabawng pangulo: Pangulong Pari, komandante sa kasundalohan ug gobernador sa mga Judio ug sa mga pari.”
48Gihukman nga kining pahayaga kinahanglan nga ikulit sa mga papan nga bronsi ug ipahimutang sa usa ka makita nga dapit sulod sa hawan sa Templo.
49Ug nga may mga kopya nga kinahanglan ibutang didto sa panudlanan sa Templo, diin si Simon ug ang iyang mga anak makadumdom niini.
Who We AreWhat We EelieveWhat We Do
2025 by iamachristian.org,Inc All rights reserved.
