Judit 16 - Cebuano Meaning-Based Bible

Ang Awit ni Judit sa Pagdayeg

1Unya miawit si Judit ug usa ka awit sa pasalamat sa atubangan sa tibuok Israel ug ang mga tawo misabat niining awit sa pagdayeg.

2Miawit siya sa pag-ingon,

“Dayga ninyo ang akong Dios ug awiti siya;

Dayga ninyo ang Ginoo

pinaagi sa mga tambol ug piyangpiyang.

Pag-awit ug usa ka bag-ong awit alang kaniya.

Dayga ug sangpita siya aron kamo tabangan.

3Ang Ginoo maoy usa ka manggugubat nga nagtapos sa gubat.

Giluwas ako niya sa mga naggukod kanako

ug gidala ako niya pagbalik sa kampo sa iyang katawhan.

4Gikan sa kabukiran sa Amihanan,

miabot ang mga taga-Asiria

uban ang ilang mga tagnapulo ka libo nga kasundalohan.

Ang ilang mga tropa nag-ali sa mga suba didto sa mga walog;

ang ilang mga sundalong nagkabayo mitabon sa mga bukid.

5Nanghulga sila sa pagsunog sa atong nasod,

sa pagpamatay sa atong mga batan-ong lalaki,

sa pagpusdak sa atong mga kabataan ngadto sa yuta,

sa pagbihag sa atong kabataan,

ug sa pagdala sa tanan natong batan-ong mga babaye.

6Apan ang Ginoong Makagagahom nagsanta kanila;

gigamit niya ang usa ka babaye aron pagsanta kanila.

7Ang ilang bayani wala patya sa mga batan-ong sundalo;

wala siya atakiha ug patya sa gamhanang mga higante.

Si Judit, ang anak nga babaye ni Merari,

mao ang naglaglag kaniya pinaagi sa iyang kaanyag.

8Gihatagan niyag kadaogan ang gidaugdaog nga katawhan sa Israel,

sa diha nga gihubo niya ang iyang mga bisti sa pagkabiyuda,

ug gisul-ob ang mga sinina nga matahom aron pagdani kaniya.

Ang iyang mahalon nga mga pahumot iyang gigamit

ug gibugkosan niya ug laso ang iyang buhok.

9Ang iyang maanindot nga sandalyas namatngonan sa ilang bayani

ug ang iyang kaanyag nakabihag sa iyang kasingkasing.

Unya ang espada mipunggot sa iyang liog.

10Ang mga taga-Persia mikurog sa iyang pagkamapangahason;

ang mga taga-Media natingala sa iyang kaisog.

11Unya ang atong katawhan misinggit sa kadaogan.

Mga huyang sila ug gidaugdaog,

apan gipugos nila ang kaaway sa pagsibog diha sa kaguliyang ug kalisang.

12Kita ang mga kaliwat sa mga ulipon,

apan ang atong mga kaaway misibog ug nanagan;

gipamatay nato sila sama sa mga nangagiw nga ulipon.

Nangalaglag sila pinaagi sa kasundalohan sa Ginoo.

13“Mag-awitSal. 144:9. ako ug usa ka bag-ong awit ngadto sa akong Dios.

O Ginoo, ikaw makusganon ug mahimayaon!

Dili gayod ikaw mabuntog.

14Mag-alagad unta kanimo ang tanan mong binuhat.

Mihatag ikaw sa sugo ug ang tanan kanila nahimo;

gihuypan mo sila sa imong gininhawa ug silang tanan nangahimo.

Walay makasupak sa imong sugo.

15Ang mga bukid ug ang mga dagat nangurog,

sa imong pagduol ang mga bato nangatunaw sama sa talo.

Apan adunay kaluoy alang sa tanan nga nagtuman kanimo.

16Ang1 Sam. 15:22; Sal. 51:16-17; Os. 6:6. Ginoo labing mahimuot kanila nga nagtuman kaniya

kay sa tanan nga pinili nga karne didto sa altar

o sa tanang labing humot nga mga sakripisyo.

17Ang mga nasod nga mosukol batok sa akong katawhan mangamatay.

Ang Ginoo nga Labing Gamhanan mosilot kanila sa Adlaw sa Paghukom.

Magpadala siyag kalayo ug mga ulod aron mokaon sa ilang mga lawas

ug manghilak sila sa kasakit hangtod sa kahangtoran.”

Ang Kabantog ni Judit

18Sa paghiabot sa mga tawo didto sa Jerusalem, nanghinlo sila sa ilang kaugalingon ug nanimba sa Dios. Gihalad nila ang ilang halad nga sinunog, mga halad nga kinabubut-on ug ang mga gasa.

19Gihalad ni Judit ngadto sa Dios ang tanang mga kabtangan ni Holofernes nga gihatag kaniya sa mga tawo. Ug agig usa ka linain nga halad aron pagtuman sa usa ka panaad, gihalad niya ngadto sa Ginoo ang moskitero nga nakuha niya gikan sa higdaan ni Holofernes.

20Sulod sa tulo ka bulan nagpadayon ang mga tawo sa pagsaulog atubangan sa Templo sa Jerusalem ug si Judit nagpabilin didto uban kanila.

21Sa natapos na ang mga pagsaulog, ang tanan namauli sa ila ug si Judit mipauli balik sa Betulia aron magpuyo didto sa iyang kaugalingong kayutaan. Sa nahabilin niyang kinabuhi nabantog siya sa tibuok Israel.

22Daghang mga lalaki ang gusto nga mangasawa kaniya apan wala gayod siya magminyo pag-usab human sa kamatayon sa iyang bana nga si Manases.

23-24Ang iyang kabantog nagpadayon pagkaylap ug nagpuyo siya didto sa balay nga gibilin kaniya sa iyang bana. Sa wala pa siya mamatay, gibahin ni Judit ang iyang kabtangan ngadto sa suod nga mga paryenti sa iyang bana ug sa iyang kaugalingong paryenti ug gihatagan niyag kagawasan ang iyang ulipon nga babaye. Sa pagkamatay niya didto sa Betulia sa edad nga 105, gilubong siya tupad sa iyang bana ug ang mga tawo sa Israel nagbangotan sulod sa pito ka adlaw tungod sa iyang kamatayon.

25Samtang buhi pa si Judit ug sa daghang katuigan human sa iyang kamatayon, walay bisan usa nga nangahas paghulga sa katawhan sa Israel.