2 Macabeo 14 - Cebuano Meaning-Based Bible

Gidaot ni Alcimo si Judas(1 Mac. 7:1-21)

1Tulo ka tuig human niini nahibaloan ni Judas ug sa iyang mga tawo nga si Demetrio nga anak ni Seleuco milawig ngadto sa dunggoanan sa Tripoli uban sa usa ka dakong pundok sa kasundalohan ug sa usa ka panon sa sakayan.

2Gitaho nga napatay ni Demetrio si Hari Antioco ug ang iyang magbalantay nga si Lisias, ug nga si Demetrio na ang mipuli sa pagpangulo sa maong nasod.

3May usa ka tawo nga ginganlag Alcimo nga kanhi mao ang Pangulong Pari apan midawat na sa paagi sa pagkinabuhi sa mga Grego sa panahon sa pag-alsa. Nahibalo siya nga tungod niini dili na gayod siya makabalik sa pagka-Pangulong Pari ug labot pa namiligro usab siya.

4Busa nakigkita siya kang Hari Demetrio sa tuig 151. Gigasahan niya ang hari ug usa ka purongpurong nga bulawan ug usa ka sanga sa palmera uban sa pipila ka mga sanga sa olibo nga sumala sa tradisyon igasa ngadto sa Templo apan nagpakahilom lamang usa siya.

5Unya nakahigayon siya pagtuman sa iyang daotan nga mga laraw sa diha nga gitawag siya ni Demetrio alang sa usa ka tigom sa iyang mga magtatambag ug gipangutana siya unsa ang gihunahuna nga buhaton sa mga Judio.

Miingon si Alcimo,

6“Adunay pundok sa mga Judio nga ginganlan ug Hasidio nga gipangulohan ni Judas Macabeo. Sila ang naghimo nga magpadayon ang gubat ug ang pag-alsa sa mga tawo ug dili sila buot nga makaangkon ug kalinaw ang ilang nasod.

7Tungod kanila wala na ako maghupot sa mahimayaong katungdanan sa pagka-Pangulong Pari, ang katungod nga akong napanunod gikan sa akong katigulangan. Busa mianhi ako dinhi,

8una sa tanan, tungod sa matinuoron nga kahingawa alang sa imong mga kaayohan sa pagkahari ug ikaduha, tungod usab sa paghunahuna mahitungod sa akong kaugalingong katagilungsod kay ang mga binuang nga mga paagi ni Judas ug sa iyang mga sumusunod nagdala sa makalilisang nga mga pag-antos sa among tibuok nga nasod.

9O Mahal nga Hari, nahibalo ikaw sa tanan mahitungod niining mga butanga busa buhata aron maundang ang mga pagdaugdaog sa among nasod ug katawhan kay ikaw maluluy-on man ug manggihatagon ngadto sa tanan.

10Samtang buhi pa si Judas, dili gayod makapahimulos ang among nasod sa kalinaw.”

Gipadala ni Demetrio si Nicanor aron Pagsulong kang Judas

11Sa pagkahuman gayod ni Alcimo sa iyang pakigpulong, ang uban nga mga magtatambag midali pagpahimulos niining higayona sa pagpukaw sa kasuko ni Demetrio batok kang Judas tungod kay siya gidumtan usab nila.

12Busa gitudlo dayon ni Hari Demetrio si Nicanor nga mao ang tigmando sa iyang mga elepante aron maoy mahimong gobernador sa Judea ug gipadala siya didto

13uban sa sugo nga pagpatay kang Judas, pagpatibulaag sa iyang mga sumusunod ug paghimo kang Alcimo nga Pangulong Pari sa labing dakong Templo sa tibuok kalibotan.

14Ang tanan nga mga langyaw sa Judea nga nangagiw tungod sa mga pag-ataki ni Judas, karon naghugpong ug nakig-abin sa mga kasundalohan ni Nicanor tungod kay naghunahuna sila nga ang kaparot o kasamok nga mahiagoman sa mga Judio maoy ilang kauswagan.

15Ang

17Si Simon nga igsoon ni Judas maoy nakig-away kang Nicanor apan sa hinayhinay nagkapildi siya sa gubat tungod sa usa ka wala paabota nga lihok sa kaaway.

18Apan sa pagkadungog ni Nicanor unsa kaisog ug kamadasigon si Judas ug ang iyang mga tawo sa ilang pagpakig-away alang sa ilang nasod, mihukom siya sa dili paghusay niining butanga pinaagi sa gubat.

19Inay niana, nagpadala siya kang Posedonio, Teodoto ug Matatias aron paghimog usa ka panagsabotsabot uban sa mga Judio.

20Human matuki ang mga kondisyon sa kasabotan gipahibalo kini ni Nicanor ngadto sa iyang kasundalohan ug miuyon sila ug walay misupak.

21Unya gitakda ang adlaw sa panagtagbo sa mga pangulo. Usa ka karwahi ang gipaabante gikan sa matag kampo ug gipahimutang ang mga lingkoranan alang sa seremonya.

22Si Judas nagbutang ug mga sundalo nga andam sa gubat sa mga dapit nga mahinungdanon kay tingali unyag may kalit nga magbudhi gikan sa kaaway. Apan ang duha ka pangulo nagtagbo nga mahigalaon.

23Si Nicanor nagpabilin una didto sa Jerusalem human niadto. Wala niya daugdaoga ang mga Judio sa bisan unsang paagi ug gipapauli pa niya ang mga tawo nga mibali ngadto kaniya.

24Ang duha ka tawo nahimong maayong mga higala ug si Judas nahimong kanunayng kauban ni Nicanor.

25Giawhag siya ni Nicanor sa pagpangasawa ug nga magsugod siya ug usa ka banay. Busa gihimo kini ni Judas ug nagpuyo siya sa usa ka malinawon nga kinabuhi.

Si Nicanor Nakig-away kang Judas

26Nakita ni Alcimo nga maayo ang panag-abin ni Nicanor ug ni Judas busa mikuha siya ug usa ka kopya sa kasabotan ug nakigkita kang Hari Demetrio. Giingnan niya ang hari nga si Nicanor nagbudhi sa gobyerno tungod kay gitudlo man niya ang mabudhion nga si Judas aron maoy mahimong iyang manununod.

27Kining bakak nga pasangil nakapungot sa hari ug sa iyang kasuko nagsulat siya ngadto kang Nicanor nga nagpahibalo kaniya nga wala siya malipay sa kasabotan ug nagsugo kaniya sa pagdakop kang Judas Macabeo ug sa pagpadala kaniya sa walay langan ngadto sa Antioquia.

28Sa pag-abot niining mensahe ngadto kang Nicanor, naguol siya ug wala siya mahibalo unsa ang iyang buhaton tungod kay dili siya buot nga mabugto ang kasabotan uban sa usa ka tawo nga nagtuman sa iyang bahin sa sabot.

29Apan dili usab mahimo nga dili niya tumanon ang sugo sa hari busa nangita siyag paagi sa pagbitik kang Judas.

30Sa laing bahin si Judas nakamatikod usab nga si Nicanor nagkaanam ka lain kaniya; nagkaanam pagkadaotan ang pagtagad kaniya ug nahibalo siya nga kini usa ka daotang tilimad-on. Busa gitigom niya ang dakong pundok sa iyang sumusunod ug nagtagotago na siya.

31Sa1 Mac. 7:29-30. pagkaamgo ni Nicanor nga hilupigan siya sa kaabtik ni Judas, miadto siya sa dako ug balaan nga Templo sa panahon nga ang mga pari naghalad sa sakripisyo ug gisugo niya sila sa pagtugyan kang Judas ngadto kaniya.

32Apan ang mga pari mipahayag ubos sa panumpa nga wala silay kalibotan hain magtago si Judas.

33Unya gipataas ni Nicanor ang iyang tuo nga bukton padulong sa Templo ug nanumpa siya: “Kon dili ninyo itugyan si Judas nga usa ka priso ngari kanako, patagon ko ang Templo sa Dios ngadto sa yuta, gub-on ko kining altar ug niining dapita tukoron ko ang usa ka mahimayaong templo alang kang Dionisio.”

34Unya mitalikod siya ug dihadiha ang mga pari mipataas sa ilang mga kamot ngadto sa langit ug nag-ampo ngadto sa Dios, ang makanunayon nga tigpanalipod sa atong nasod:

35“Ginoo, wala ka magkinahanglan bisan unsa apan nakapahimuot kanimo nga adunay Templo diin ikaw magpuyo uban kanamo.

36Ikaw lamang ang balaan ug ang imong Templo bag-o pa lamang nga nahinloan busa karon panalipdi ang iyang kabalaan hangtod sa kahangtoran.”

Si Rasis Namatay alang sa Iyang Nasod

37May usa ka pangulo sa Jerusalem nga ginganlag Rasis. Gisumbong siya ngadto kang Nicanor kay nakatabang man siya sa iyang katawhan sa daghang mga paagi ug gitahod siya nila pag-ayo ug gitawag nga “Amahan sa mga Judio.”

38Sa unang mga adlaw sa kagubot gitahan niya ang iyang kinabuhi alang sa pagtulon-ang Judio ug gipaatubang siya sa hukmanan tungod sa iyang pagkamaunongon.

39Agig pagpakita sa hilabihan niyang pagdumot sa mga Judio, si Nicanor nagpadala ug kapin sa 500 ka sundalo aron pagdakop kang Rasis

40tungod kay naghunahuna siya nga ang pagdakop kaniya maoy usa ka makabungog nga hampak batok sa mga Judio.

41Sa dihang hapit na makuha sa mga sundalo ang bantayan diin si Rasis midangop gipugos nila pag-abli ang mga ganghaan ngadto sa patyo ug gipakanaog nila ang sugo nga sunogon ang ganghaan. Si Rasis nakaamgo nga wala na siyay kalingkawasan busa misulay siya paghikog pinaagi sa iyang espada.

42Gipalabi niya ang kamatayon nga dungganan kay sa mamatay diha sa mga kamot sa daotan nga mga tawo nga maoy usa ka dakong kaulawan.

43Tungod sa kahinanali sa higayon, wala matarong paghansak ni Rasis ang iyang espada ngadto sa iyang kaugalingon maoy hinungdan nga wala kini makapatay kaniya. Busa samtang ang mga sundalo nagpunsisok ngadto sa lawak, midali siya pagdagan ngadto sa paril ingon sa usa ka maisog nga bayani milukso ngadto sa katawhan sa ubos.

44Ang mga tawo nga nagpundok midali pagsibog ug nahulog siya sa hawan nga ilang gibiyaan.

45Ug kay buhi pa man siya ug puno sa kaisog, mitindog siya ug samtang ang dugo nag-agas gikan sa iyang mga samad, midagan siya lahos sa pundok sa katawhan ug sa kataposan mikatkat siya sa usa ka tiptip nga pangpang.

46Sa diha nga nahutdan na gayod siya sa dugo, gibira niya ang iyang mga tinai sa duha niya ka kamot ug gisalibay kini ngadto sa pundok sa katawhan ug sa iyang paghimo niini nag-ampo siya ngadto sa Ginoo sa kinabuhi ug sa gininhawa nga ihatag kini pagbalik kaniya. Niining paagiha namatay siya.