1Si Judas Macabeo mibanos sa iyang amahan nga si Matatias.
2Ang tanan niyang mga igsoon nga lalaki ug ang tanang maunungong sumusunod sa iyang amahan mipaluyo kaniya, ug nalipay sila sa pagpadayon sa gubat sa Israel.
3Si Judas nagdalag mas dakong dungog ngadto sa iyang katawhan;
diha sa iyang salipod sa dughan,
nahisama siya sa usa ka higante.
Migamit siya sa iyang mga hinagiban ug nakiggubat;
ginamit ang iyang kaugalingong espada
gipanalipdan niya ang iyang kampo.
4Nahisama siya sa usa ka mangtas nga liyon nga nagangulob samtang mohasmag.
5Gipangita ni Judas sila nga naglapas sa Balaod
ug gisunog niya ang tanan nga nagdaugdaog sa iyang katawhan.
6Tungod sa kahadlok kaniya,
ang mga malapason sa balaod miuk-ok tungod sa kahadlok;
gipalambo niya ang kagawasan pinaagi sa iyang mga buhat.
7Gihimo niya nga alaot ang kinabuhi alang sa daghang mga hari
ug gidad-an niyag kalipay ang katawhan sa Israel.
Dayegon nato siya sa kahangtoran tungod sa iyang nabuhat.
8Nagsuroy siya sa kalungsoran sa Judea
ug gilaglag niya ang tanang mga tawo nga kaaway sa Dios.
Gipalingkawas niya ang Israel sa makalilisang nga giantos niini.
9Ang iyang kabantog mikaylap hangtod sa kinatumyan sa yuta,
ug gitigom niya ang mga tawo nga gihulga sa kamatayon.
10Unya si Apolonio nagtigom ug usa ka pundok sa kasundalohan sa mga dili Judio lakip ang usa ka dako nga gahom gikan sa Samaria aron pag-asdang sa katawhan sa Israel.
11Sa pagkahibalo ni Judas niini, migula siya aron pagpakiggubat ug gibuntog niya ang kasundalohan ug gipatay si Apolonio. Daghang mga dili Judio ang nangamatay ug ang nahibilin nanagan.
12Sa pagkatigom na sa mga sinakmit sa gubat, gikuha ni Judas ang espada ni Apolonio ug gigamit kini niya sa gubat hangtod sa adlaw nga namatay siya.
13Si Siron, ang heneral sa kasundalohan sa Siria, nakahibalo nga si Judas nagtigom ug usa ka pundok sa kasundalohan nga gitibuok sa usa ka pundok sa mga lalaki nga maunongon nga andam sa pagpakiggubat ubos sa iyang pagmando.
14Si Siron miingon sa iyang kaugalingon, “Magpakabantogan ako sa tibuok emperyo pinaagi sa pagbuntog kang Judas ug sa iyang mga tawo nga walay pagtahod sa sugo sa hari.”
15Unya misugod siya ug lain usab nga pagpakigsangka batok kang Judas ug miabin kaniya ang usa ka makusganon nga gahom sa mga tawo nga kaaway sa Dios nga madasigon sa pagtabang kaniya sa pagpanimalos batok sa Israel.
16Sa pagkaduol niya sa agianan sa Bethoron, si Judas migula aron pagsugat kaniya uban sa usa ka gamayng pundok sa kalakin-an.
17Sa pagkakita sa mga tawo ni Judas sa pundok sa kasundalohan nga nagpadulong batok kanila, nangutana sila, “Unsaon sa atong gamayng pundok sa kalakin-an sa pagpakiggubat batok sa usa ka pundok sa kasundalohan nga ingon kadako niana? Gawas pa, wala kita makakaon sa tibuok adlaw ug luya kaayo kita!”
18Mitubag si Judas, “Dili lisod alang sa usa ka gamayng pundok ang pagbuntog sa usa ka dakong pundok. Walay kalainan alang sa Ginoo kon luwason kita sa daghang mga tawo o sa pipila lamang ka buok.
19Ang kadaogan diha sa gubat wala mag-agad kon kinsay adunay labing dakong pundok sa kasundalohan. Ang gahom sa Ginoo mao ang magbuot sa sangpotanan.
20Ang atong mga kaaway nagpadulong batok kanato uban sa dakong garbo ug pagkadaotan. Nagtinguha sila sa pagtulis sa atong kabtangan ug sa pagpatay sa atong mga asawa ug kabataan.
21Apan kita makiggubat alang sa atong mga kinabuhi ug alang sa atong relihiyon.
22Inig-asdang nato, ang Ginoo maoy modugmok sa atong mga kaaway busa ayaw kamo kahadlok kanila.”
23Sa pagkahuman ni Judas pagsulti, siya ug ang iyang mga tawo mihimo ug usa ka kalit nga pag-asdang batok kang Siron ug sa iyang kasundalohan ug gipulpog nila sila.
24Gigukod nila sila ngadto sa agianan sa Bet Huron ngadto sa kapatagan ug gipatay nila ang mga 800 ka lalaki. Sila nga nakalingkawas mikagiw ngadto sa Filistia.
25Human niini, ang mga dili Judio sa bisan diin misugod sa pagkahadlok kang Judas ug sa iyang mga igsoon.
26Ang iyang kabantog nadungog ni Hari Antioco ug ang mga tawo sa tanang nasod nagsulti mahitungod kang Judas ug sa iyang mga kadaogan.
Si Lisias Gitudlo sa Hari nga Gobernador27Sa pagkadungog ni Antioco sa nahitabo, nasuko siya pag-ayo. Gisugo niya ang tanan nga mga kasundalohan sa iyang emperyo sa pagtigom diha sa usa ka dakong pundok sa kasundalohan.
28Gikan sa iyang panudlanan gibayran niya ang suhol sa tibuok tuig alang sa iyang kasundalohan ug gisugo sila sa pag-andam alang sa bisan unsang hitabo.
29Apan nasuta niya nga ang salapi sa iyang panudlanan nahurot na. Ang misulod nga salapi gikan sa mga buhis mikubos tungod sa kagubot ug sa mga kaguliyang nga gidala niya sa kanasoran. Nahitabo kini tungod kay iya mang giwagtang ang mga balaod nga gituman sukad pa sa unang mga panahon.
30Si Antioco naghatag kanunay ug daghang mga gasa nga labaw pa kay sa unang mga hari. Apan karon nabalaka siya nga tingalig dili na siya makahimo pagpadayon niini o bisan gani sa pagbayad sa mga galastohon. Nahitabo na man gani kini makausa o makaduha kaniadto.
31Naguol siya pag-ayo apan sa kataposan mihukom siya sa pag-adto sa Persia aron sa pagkobra sa mga buhis gikan sa mga probinsiya didto ug pagtigom ug usa ka dakong kantidad sa salapi.
32Si Lisias, usa ka tawo nga importante nga gihatagan sa titulo nga “Paryenti sa Hari,” iyang gitudlo sa pagka gobernador aron mag-atiman sa mga butang sa hari diha sa tibuok kayutaan gikan sa Suba sa Eufrates ug hangtod sa utlanan sa Ehipto.
33Gihimo usab sa hari si Lisias nga magbalantay sa iyang anak nga si Antioco V hangtod sa iyang pagbalik.
34Si Lisias maoy iyang gipaalima sa tanang mga elepante ug sa katunga sa iyang mga kasundalohan ug unya gihatagan siya ug makuti nga mga tugon mahitungod sa gusto niya nga pagabuhaton ug labi na gayod sa unsay iyang gusto nga buhaton mahitungod sa mga lumolupyo sa Judea ug Jerusalem.
35Gisugo si Lisias sa pagpadala ug kasundalohan batok sa mga Judio labi na sa mga Judio sa Jerusalem aron pagbungkag sa ilang gahom ug paglaglag kanila aron walay timaan nga mahabilin kanila.
36Gisugo siya sa pag-ilog sa ilang yuta ug paghatag niini ngadto sa mga langyaw nga mopuyo niadtong mga dapita.
37Gipauban sa hari ang laing katunga sa iyang kasundalohan ug mibiya siya gikan sa Antioquia, ang iyang ulohang siyudad, sa tuig 147. Mitabok siya sa Suba sa Eufrates ug miagi latas sa Mesopotamia.
Mga Kadaogan ni Judas(2 Mac. 8:8-29, 34-36)38Gipili ni Lisias si Tolomeo nga anak ni Dorimenes, si Nicanor ug si Gorgias nga mga komandante sa kasundalohan. Silang tulo takos nga mga tawo nga nagdala sa ngalan “Higala sa Hari.”
39Gibutang niya sila nga tigdumala sa 40,000 ka mga sundalo ug 7,000 ka mga sundalo nga nagkabayo ug gisugo niya sila sa pagsulong sa yuta sa Judea ug paglaglag niini sumala sa gisugo sa hari.
40Kining mga komandante nanggula uban sa tibuok nilang kasundalohan ug sa paghiabot nila sa mga patag duol sa Emmaus, nagkampo sila didto.
41Usa ka pundok gikan sa Edomea ug sa Filistia mitipon kanila. Ang mga magpapatigayon sa dapit nakadungog mahitungod sa kusog sa kasundalohan ug miadto sila sa kampo dala ang mga kadena ug usa ka dakong kantidad sa salapi kay naglaom sila sa pagpalit ug pipila ka mga ulipon nga Judio.
42Si Judas ug ang iyang mga igsoon nakakita nga ang ilang kahimtang misamot ug kalisod kay aduna may mga kasundalohan nga langyaw nga nagkampo sulod sa ilang kaugalingong mga utlanan. Nakahibalo usab sila nga ang hari nagsugo nga laglagon sa hingpit ang katawhan.
43Busa nahugot ang ilang hunahuna sa pagtukod pag-usab sa ilang naguba nga nasod ug sa pagpakig-away alang sa ilang yutang natawhan ug sa Templo.
44Unya ang tibuok katilingban nagtigom aron sa pagpangandam alang sa gubat ug aron pag-ampo sa kaluoy sa Dios.
45Ang Jerusalem nahawan sama sa usa ka kamingawan;
walay mga lungsoranon nga nahabilin o misulod sa siyudad.
Ang balaan nga Templo gipanamastamasan sa mga langyaw,
ug ang mga dili Judio nagkampo didto sa kota sa siyudad;
busa ang kasadya mipahilayo sa katawhan sa Israel,
ug ang tingog sa honi wala na madungog.
46Unya si Judas ug ang iyang mga tawo nagtigom ug nanggula ngadto sa Mispa nga atbang sa Jerusalem tungod kay kaniadto ang katawhan sa Israel aduna may usa ka dapit alang sa pagsimba didto.
47Diha sa halalom nga pagbangotan, nagpuasa sila niadtong tibuok adlaw, nagsul-ob ug bisting sako, nagbolibod ug mga abo sa ilang mga ulo ug gigisi nila ang ilang mga sapot.
48Ang mga dili Judio mikonsulta unta sa ilang mga diosdios sa maong kahimtang apan ang mga Israelita mibuklad sa basahon sa Balaod aron pagpangita sa pagmando sa Dios.
49Gipagula nila ang mga bisti sa mga pari, gihalad nila ang unang mga uhay ug ang ikapulo ug unya gidala nila ang pipila ka mga Nasareo nga nakahuman sa ilang mga panaad.
50Ang tibuok katilingban nag-ampo, “O Ginoo, unsa may among buhaton niining mga butanga? Asa man namo sila dad-a,
51karon nga ang imong balaang Templo giyatakyatakan ug gipanamastamasan sa mga dili Judio ug ang imong mga pari nagbangotan diha sa kaulawan?
52Ang mga dili Judio miabot aron paghasmag ug paglaglag kanamo. Nahibalo ikaw unsa ang ilang gilaraw nga buhaton!
53Kon dili ikaw motabang kanamo, unsaon man namo pagbarog batok kanila?”
54Unya gipatingog nila ang mga trumpeta ug naninggit sila sa makusog.
55Human niana, gibahin ni Judas ang iyang mga tawo ngadto sa mga pundok nga tagnapulo, tagkalim-an, tag-usa ka gatos ug tag-usa ka libo. Gibutangan niya ug mga pangulo nga maoy mag-atiman sa tagsatagsa ka pundok.
56UnyaDeut. 20:5-8; Mag. 7:3. aron pagtuman sa Balaod, gipapauli niya ang tanan nga bag-o pa lang naminyo o nagtukod ug balay o nagtanom ug parasan ingon man ang bisan kinsa nga nalisang.
57Sa kataposan ang kasundalohan migula ug nagpahimutang sa ilang luna sa habagatan sa Emmaus
58ug didto giingnan sila ni Judas, “Pangandam kamo sa inyong kaugalingon alang sa gubat ug pagmaisog kamo! Pag-andam kamo ugma sayo sa buntag aron pagpakiggubat niining mga dili Judio nga naghiusa sa ilang kasundalohan aron pag-asdang kanato ug paglaglag kanato ug sa atong Templo.
59Mas maayo pa kanato ang pagpakamatay nga makig-away kay sa pagbarog nga magtanga ug magpaminaw sa pagkaguba sa atong nasod ug sa atong Templo.
60Apan ang Ginoo magbuhat sa makapahimuot niya.”
Who We AreWhat We EelieveWhat We Do
2025 by iamachristian.org,Inc All rights reserved.
