Judit 5 - Cebuano Meaning-Based Bible

Ang Konseho sa Gubat didto sa Kampo ni Holofernes

1Sa pagkabalita ni Holofernes, ang heneral nga taga-Asiria, nga ang mga Israelita nangandam alang sa gubat ug gisampongan nila ang mga agianan sa bukid, gilig-on ang mga tumoy sa bukid ug nga nagbutang silag mga babag didto sa mga kapatagan,

2mibukal ang iyang dugo sa kasuko. Gitigom niya ang tanang pangulo nga taga-Moab, ang tanang mga heneral nga taga-Amon ug ang tanang gobernador sa kayutaan nga nag-ubay sa kabaybayonan sa Mediteraneo

3ug giingnan sila, “Nagpuyo kamo sa Canaan busa tug-ani ako mahitungod sa katawhan nga nagpuyo niining mga bukira. Unsa mang mga siyudara ang ilang gipuy-an? Unsa man ang gidak-on sa ilang kasundalohan? Unsa may tinubdan sa ilang gahom ug kusog? Kinsa man ang hari nga nangulo sa ilang kasundalohan?

4Ngano man nga sila ra sa tanan nga katawhan sa kasadpan ang nagdumili sa paggula ug pag-ampo kanako?”

Ang Pakigpulong ni Aquior

5Unya si Aquior, ang pangulo sa tanang taga-Amon, mitubag kang Holofernes sa pag-ingon, “Sir, kon mahimo, pamatia ako. Tug-anan ko ikaw sa tinuod mahitungod niining mga tawhana nga nagpuyo sa kabukiran duol sa imong kampo. Dili ako magbakak kanimo.

6Kining mga tawhana mga kaliwat sa ubang mga taga-Babilonia

7-8nga mibiya sa pagkinabuhi sa ilang mga katigulangan aron pagsimba sa Dios sa langit. Sa kataposan, gipapahawa sila sa ilang yuta tungod kay nagdumili sila pagsimba sa mga diosdios sa ilang mga katigulangan. Unya mikagiw sila ngadto sa Mesopotamia, diin nagpuyo sila sulod sa taas nga panahon.

9“HumanGen. 11:31–12:5. niini, gisugo sila sa ilang dios nga mobiya sila sa Mesopotamia ug moadto sa yuta sa Canaan, diin mipuyo sila ug nahimong mga adunahan kaayo sa bulawan, sa plata, ug sa mga hayop.

10UnyaGen. 42:1-5; Exo. 1:7. sa diha nga may usa ka gutom nga miabot sa tibuok yuta sa Canaan, kining mga tawhana nga gitawag ug mga Israelita nanglugsong ngadto sa Ehipto ug nagpabilin didto samtang aduna pay igong pagkaon. Sa ilang pagpuyo didto, nahimo silang usa ka dakong nasod nga may hilabihan kadaghang tawo nga dili na sila maihap.

11BusaExo. 1:8-14. gikontrahan sila sa hari sa Ehipto. Gipahimuslan sila ug gipatrabaho aron paghimog mga tisa. Gidaugdaog sila ug gihimo nga mga ulipon.

12ApanExo. 7:1–12:46. nag-ampo sila sa ilang dios ug ang ilang dios nagpadalag mga katalagman ug walay taga-Ehipto nga nakahimo sa pagsagang niini. Unya gipagula sila sa mga taga-Ehipto sa ilang nasod.

13GipaugaExo. 14:21-22. sa Dios sa mga Israelita ang Dagat nga Pula sa ilang atubangan

14ug unya gidala sila ngadto sa Sinai ug sa Cades Barnea.

“Gipapahawa sa mga Israelita ang tanang mga tawo nga nagpuyo sa habagatang bahin sa Canaan.

15Mipuyo sila sa yuta sa mga Amorihanon, gipamatay nila ang katawhan sa Hesbon, mitabok sila sa Suba sa Jordan ug gipanag-iya nila ang tibuok kayutaan sa bukid.

16Gihinginlan nila ang mga Canaanhon, ang mga Perisihanon, ang mga Jebusihanon, ang mga Siquemihanon ug ang tanang mga Gergasihanon. Ang mga Israelita nagpuyo na karon niining mga bukira sa dugay nang panahon.

17“KontraDeut. 28:1-68. sa ilang Dios ang pagkadaotan ug samtang wala sila magpakasala batok kaniya, nagmauswagon sila.

18Apan sa dihang misupak sila kaniya, nag-antos sila sa dakong kapildihan diha sa mga gubat ug sa kataposan nangabihag sila ngadto sa usa ka nasod nga langyaw. Gigun-ob ang templo sa ilang dios ug ang ilang mga siyudad gipuy-an sa mga langyaw.

19Apan karon nga mibalik na sila sa ilang dios, nahibalik sila sa ilang yuta gikan sa mga nasod diin sila gitibulaag. Gipanag-iya nila pag-usab ang siyudad sa Jerusalem diin anaa ang ilang templo ug nagpuyo sila pag-usab sa kabukiran nga wala pay nagpuyo.

20“Sir, kon kining mga tawhana nagpakasala karon batok sa ilang dios bisan sa wala nila hibaw-i ug kon makasiguro kita nga sad-an sila sa pipila ka kalapasan, molampos kita pag-ataki kanila.

21Apan kon wala sila magsupak sa balaod sa ilang dios, pasagdi sila, kay kon dili, labanan niya sila ug maulawan kita atubangan sa tibuok kalibotan.”

Ang Tubag sa Pundok

22Sa pagkahuman ug sulti ni Aquior, ang tanang mga tawo nga nagtindog libot sa tolda misupak kaniya. Ang mga pangabaga mismo ni Holofernes ingon man ang mga taga-Moab ug ang mga tawo sa kabaybayonan sa Mediteraneo nangayo nga patyon si Aquior.

23Nangutana sila, “Nganong mahadlok man kita niining mga Israelita? Huyang sila ug dili sila makahimog lig-ong pagpanalipod.

24Mopadayon kita, Heneral Holofernes! Sayon ra silang ihawon sa gamhanan mong kasundalohan.”