1Niadtong gabhiona wala pakatulga sa Ginoo ang hari busa gisugo sa hari ang iyang kaugalingong sekretaryo sa pagdala ngadto kaniya sa mga talaan nga opisyal sa emperyo ug sa pagbasa niini ngadto kaniya.
2Gibasa sa sekretaryo ang kasaysayan giunsa pagdiskubre ni Mardoqueo ang usa ka daotang laraw sa pagpatay sa hari--ang laraw nga gihimo sa duha ka yunuko nga nagsilbi nga mga guwardiya sa palasyo.
3Nangutana ang hari, “Giunsa man nato pagpasidungog ug pagganti niini si Mardoqueo?”
Mitubag ang iyang mga sulugoon, “Wala kay gihimo alang kaniya.”
4Sa diha nga nangutana ang hari mahitungod sa maayong buhat ni Mardoqueo, misulod si Haman sa patyo. Miabot siya aron pagpangayo sa hari nga bitayon si Mardoqueo didto sa bitayan nga naandam na.
Nangutana ang hari, “Kinsa man kanang anaa sa patyo?”
5Mitubag ang mga sulugoon, “Si Haman; naghulat siya aron makigkita kanimo.”
Miingon ang hari, “Paaria siya.”
6Busa misulod si Haman ug miingon kaniya ang hari, “Adunay usa ka tawo nga gusto ko kaayo nga pasidunggan. Unsa may angay kong buhaton alang niining tawhana?”
Si Haman naghunahuna sa iyang kaugalingon, “Kinsa pa bay gusto nga pasidunggan pag-ayo sa hari kondili ako?”
7-8Busa mitubag siya sa hari, “Padad-a ang mga sulugoon sa hari ug usa ka kapa sa pino nga lino alang niining tawhana, usa ka bisti nga imo mismo nga gisul-ob ug padad-a sila ug usa ka kabayo nga imo mismo nga gisakyan.
9Unya isul-ob kanang bistiha sa tawo nga higustohan mo pag-ayo ug unya himoa nga usa ka hamili nga tawo ang mag-una kaniya nga magsakay ug kabayo libot sa siyudad. Himoa nga magpahibalo ang maong tawo diha sa iyang paglibot: ‘Tan-awa giunsa pagganti sa hari ang tawo nga buot niyang pasidunggan!’”
10Unya ang hari miingon kang Haman, “Maayo! Buhata kanang tanan ngadto kang Mardoqueo, ang Judio nga naghupot ug usa ka taas nga katungdanan dinhi sa palasyo ug ayawg kalimti bisan usa ka butang niana.”
11Busa mikuha si Haman sa kapa ug kabayo ug iyang gisul-ob ang kapa kang Mardoqueo. Nagkabayo si Mardoqueo ug nag-una kaniya si Haman libot sa siyudad nga nagpahibalo sa mga tawo diha sa ilang paglakaw, “Tan-awa giunsa pagganti sa hari ang usa ka tawo nga buot niyang pasidunggan.”
12Unya mibalik si Mardoqueo ngadto sa patyo samtang si Haman midali pagpauli sa ila nga labihang ulawa.
13Gisuginlan niya ang iyang asawa ug ang tanan niyang mga higala sa tanan nga nahitabo kaniya. Unya silang tanan miingon kaniya, “Nagsugod na ikaw pagkalupig sa gahom ni Mardoqueo. Usa siya ka Judio ug dili ka makabuntog kaniya. Sa walay duhaduha pildihon ka niya kay ang buhi nga Dios nag-uban man kaniya.”
Gipatay si Haman14Samtang nagsultihanay pa sila, ang mga yunuko sa palasyo miabot aron pagdala kang Haman ngadto sa kombira ni Ester.
Who We AreWhat We EelieveWhat We Do
2025 by iamachristian.org,Inc All rights reserved.
