2 Macabeo 5 - Cebuano Meaning-Based Bible

Panan-awon mahitungod sa Usa ka Gubat

1Niining mga panahona, si Antioco IV mihimo sa iyang ikaduhang pagsulong batok sa Ehipto.

2Sulod sa mga 40 ka adlaw ang mga tawo sa tibuok Jerusalem nakakita ug mga panan-awon sa mga sundalo nga nagkabayo ug nagsul-ob ug bulawan nga salipod sa dughan ug nagdagan latas sa kapanganoran. Ang mga nanagkabayo sangkap ug andam na sa ilang mga bangkaw ug espada.

3Naglaray sila atbang sa usag-usa, nagdasdas ug nagsumbalik pagdasdas. Nagkasingki ang ilang mga taming, nag-ulan ug mga bangkaw ug nanglupad ang mga udyong sa kahanginan. Ang tanang nagkalainlaing matang sa salipod sa dughan ug mga renda nga bulawan sa mga kabayo misidlak tungod sa kahayag sa adlaw.

4Ang tanan nga didto sa siyudad nag-ampo nga kining mga talan-awon mahimo unta nga usa ka maayong tilimad-on.

Gisulong ni Jason ang Jerusalem

5Sa diha nga mikaylap ang usa ka bakak nga taho nga si Antioco namatay, si Jason mikuha ug kapin sa 1,000 ka tawo ug gipakalitan niya pagsulong ang Jerusalem. Napugos pagsibog ang mga tawo nga gibutang didto sa mga kota sa siyudad ug sa kataposan nakuha nila ang siyudad. Si Menelao mikagiw ngadto sa kota duol sa bungtod sa Templo aron pagluwas sa iyang kaugalingon

6samtang si Jason ug ang iyang mga tawo sa walay kukaluoy mipadayon sa pagpangihaw sa ilang isigka-Judio. Si Jason wala makaamgo nga ang kalamposan batok sa iyang kaugalingon nga katawhan mao ang labing pait nga kapakyasan. Iya pa ganing giisip ang iyang kalamposan nga usa ka kadaogan batok sa mga kaaway ug dili hinuon usa ka kapildihan sa iyang kaugalingong katawhan.

7Apan si Jason wala makabanos sa kagamhanan. Napugos hinuon siya sa pagkagiw pag-usab ngadto sa kayutaan sa mga taga-Amon ug sa kataposan ang iyang daotang laraw nagdala hinuon kaniya ug kaulawan ug disgrasya.

8Sa kataposan namatay siya nga alaot. Si Aretas, ang hari sa mga Arabo, mibalhog kaniya sa prisohan ug giisip siya nga usa ka kriminal ug gikasilagan tungod kay iyang gibudhian ang kaugalingon niyang katawhan. Ang tanan nangita kaniya ug napugos siya sa pagdagan gikan sa usa ka lungsod ngadto sa laing lungsod. Mikagiw siya ngadto sa Ehipto aron maluwas

9unya ngadto sa Grecia uban ang paglaom nga makadangop ngadto sa mga Espartano nga mga paryenti sa mga Judio. Sa kataposan, kining tawhana nga nagpugos sa daghang mga tawo sa pagbiya sa ilang kaugalingong nasod namatay nga usa ka kagiw didto sa usa ka yuta nga langyaw.

10Si Jason mipatay ug daghang mga tawo ug gibiyaan niya ang ilang mga lawas nga wala ilubong busa karon sa iyang kaugalingong kamatayon wala usay nagbangotan. Wala siya hatagi ug seremonyas sa paglubong ug wala gani siya ilubong tupad sa iyang mga katigulangan.

Gisulong ni Antioco ang Jerusalem(1 Mac. 1:20-63)

11Sa diha nga ang balita sa nahitabo sa Jerusalem miabot kang Antioco, nagtuo siya nga ang tibuok kayutaan sa Judea mialsa. Tungod niini nasuko siya pag-ayo busa mibiya siya sa Ehipto ug gisulong niya ang Jerusalem.

12Gimandoan niya ang iyang mga tawo nga tigbason sa walay kukaluoy ang tanan nga ilang hisugatan ug patyon si bisan kinsa nga ilang hikaplagan nga nagtago sa kabalayan.

13Gipatay nila ang tanan: bata ug tigulang, lalaki ug babaye bisan gani ang mga masuso.

14Sulod sa tulo ka adlaw ang Jerusalem nawad-an ug 80,000 ka tawo: 40,000 ang napatay ug ingon usab niana ang gidaghanon sa gibihag aron ibaligya nga mga ulipon.

15Apan wala matagbaw si Antioco. Nangahas pa gayod siya sa pagsulod sa Templo nga labing balaan sa tibuok kalibotan giniyahan ni Menelao nga nahimong mabudhion sa iyang relihiyon ug sa iyang katawhan.

16Pinaagi sa iyang mahugaw ug dili balaan nga mga kamot, gihakot ni Antioco ang balaan nga mga galamiton alang sa pagsimba lakip ang mga gasa nga gihatag sa uban nga mga hari aron madugangan ang himaya ug dungog sa Templo.

17Hilabihan niyang lipaya tungod sa iyang kadaogan nga wala siya makaamgo nga ang Ginoo nagtugot nga ang Templo mapanamastamasan tungod kay ang sala sa katawhan sa Jerusalem nakapasuko man kaniya sa hamubo nga panahon.

18Kon ang mga tawo sa Jerusalem wala pa moapil sa hilabihan nga pagpakasala, si Antioco masilotan unta dihadiha ug mapugngan sa paghimo sa maong binuang nga buhat. Mag-antos unta siya sa samang daotang kapalaran nga naangkon ni Eleudoro nga gipadala ni Hari Seleuco aron pagsusi sa panudlanan.

19Apan ang Ginoo wala magpili sa iyang katawhan tungod sa iyang Templo. Iyang gitukod ang iyang Templo tungod sa iyang katawhan.

20Busa ang Templo naangin sa katalagman nga nahiagoman sa katawhan apan sa kaulahian nakaambit usab sa ilang kahamugaway. Gipasagdan sa Ginoo ang Templo sa diha nga nasuko siya apan iya kining gipahiuli sa diha nga nabugnaw na ang iyang kasuko.

Laing Pagsulong batok sa Jerusalem

21Mikuha si Antioco ug mga 60,000 ka kilo nga plata gikan sa Templo ug midali pag-adto sa Antioquia. Hilabihan ang iyang garbo nga naghunahuna siya nga makahimo siya pagpalawig sa mga sakayan latas sa yuta nga mamala o sa pagpalakaw sa mga sundalo latas sa dagat.

22Nagtudlo siya ug mga gobernador aron pagpanggubot sa katawhan. Didto sa Jerusalem gibutang niya si Felipe, usa ka tawo nga gikan sa Frigia ug mas daotan pa kay kang Antioco mismo.

23Didto sa Bukid sa Gerisim gibutang niya si Andronico. Atua usab si Menelao nga nagdaugdaog sa iyang isigka-Judio sa paagi nga labaw kadaotan kay sa gihimo sa mga gobernador. Si Antioco nagdumot pag-ayo sa mga Judio

24busa nagpadala siya ug 22,000 ka sundalo nga sinuholan gikan sa Misia ngadto sa Jerusalem ubos sa pagmando ni Apolonio uban ang sugo sa pagpatay sa tanang mga lalaki didto sa siyudad ug sa pagbaligya sa mga babaye ug sa mga kabataan nga lalaki ingon nga mga ulipon.

25Miabot si Apolonio sa Jerusalem ug nagpatuo nga kalinaw ang iyang tuyo apan naghulat lamang diay sa Adlaw nga Igpapahulay. Unya sa diha nga miabot ang Adlawng Igpapahulay ug ang mga Judio namahulay, siya ug ang iyang mga sundalo nga sangkap sa armas nagmartsa gawas sa siyudad.

26Sa kalit gisugo niya ang iyang mga tawo sa pagpatay sa tanan nga nanggula aron sa pagtan-aw kanila. Mihasmag sila ngadto sa siyudad ug gipatay ang daghan kaayong mga tawo.

27Apan si Judas Macabeo ug ang laing mga siyam ka tawo nakakagiw ngadto sa kabukiran diin nagpuyo sila sama sa mga ihalas nga mga mananap. Aron dili sila mahimong hugaw, mga tanom nga nanurok didto ang ilang gikaon.