Sirac 50 - Cebuano Meaning-Based Bible

Si Simon, Anak ni Onias

1Ang Pangulong Pari nga si Simon nga anak ni Onias mao ang labing dako sa iyang kaigsoonan ug garbo sa iyang katawhan. Siya maoy nag-ayo sa Templo ug

2nagbutang sa sukaranan alang sa hataas nga sinapaw nga paril ug sa mga kota sa Templo.

3Ang sudlanan sa tubig nga sama kadako sa tangke nga bronsi gikalot samtang diha pa siya sa katungdanan.

4Naglaraw siya sa pagpanalipod sa iyang katawhan gikan sa mga pagsulong busa gilig-on niya ang siyudad aron makasukol batok sa naglibot nga ataki.

5Pagkamahimayaon niya sa iyang paggula sa Labing Balaan nga Dapit.

6Sama siya sa kabugason nga nagdan-ag diha sa mga kapanganoran, daw bulan nga takdol,

7sama sa adlaw nga nagdan-ag diha sa Templo sa Labing Halangdon, sama sa bangaw nga nagdan-ag diha sa himaya tadlas sa mga panganod,

8sama sa mga rosas sa tingbulak, sama sa mga lirio diha sa tampi sa usa ka sapa, sama sa mga sidro sa Lebanon sa panahon sa ting-init,

9sama sa nagsiga nga insenso, sama sa usa ka kupa nga hinimo sa sinalsal nga bulawan ug gidayandayanan sa tanang matang sa alahas,

10sama sa kahoy nga olibo nga puno sa mga bunga, sama sa kahoy nga sipres nga nagtuybo ngadto sa kapanganoran.

11Sa pagsul-ob ni Simon sa iyang harianon nga bisti ug sa pagsaka niya ngadto sa balaang altar sinul-oban sa hingpit nga kaanindot, gihimo niya ang usa ka hawan sa Templo nga usa ka mahimayaon nga talan-awon.

12Sa pagdunol ngadto kaniya sa mga pari sa mga bahin sa sakripisyo diha sa iyang pagbarog tupad sa altar uban sa iyang mga kaabag nga naglibot kaniya nga sama sa usa ka korona, sama siya sa usa ka batan-on nga sidro sa Lebanon linibotan sa mga kahoy nga palmera.

13Mao kini ang mga kaliwat ni Aaron diha sa ilang masanag nga mga bisti nga nagbarog atubangan sa tibuok tigom sa Israel nga nagbitbit sa mga halad alang sa Ginoo.

14Sa pagkahuman niya sa pag-alagad diha sa altar ug sa nahikay na ang sakripisyo ngadto sa Labing Halangdon ug Makagagahom sa tanan,

15gikab-ot niya ang usa ka kupa ug gibubo ang bino nga mahumot didto sa tiilan sa altar agig halad ngadto sa Labing Halangdon, ang Hari sa tibuok kalibotan.

16Unya ang mga pari naninggit ug mihuyop sa ilang mga trumpeta nga hinimo sa plata. Naghimo sila ug makusog nga tingog aron makadungog ang Labing Halangdon.

17Ang tanang mga tawo mihapa aron pagsimba sa ilang Ginoo, ang Makagagahom sa tanan, ang Labing Halangdon.

18Unya ang mga mag-aawit misugod pag-awit sa ilang mga pagdayeg ug milanog ang matahom nga honi.

19Ang mga tawo nagpadayon pag-ampo ngadto sa Makagagahom nga Ginoo, ang Labing Halangdon, hangtod ang pagsimba natapos.

20UnyaNum. 6:24-27. si Simon nanaog gikan sa altar, mipataas sa iyang mga kamot ibabaw sa tibuok tigom sa Israel ug sa dakong pagtahod mibungat sa panalangin nga gikan sa Ginoo

21samtang ang mga tawo mihapa sa ikaduhang higayon diha sa pagsimba aron pagdawat sa panalangin nga gikan sa Labing Halangdon.

Usa ka Panalangin

22Busa karon, dayga ninyo ang Dios sa tibuok kalibotan nga naghimog kahibulongang mga butang sa tanang dapit nga nagmatuto kanato sukad sa pagkahimugso nato ug maluluy-ong nagdumala kanato.

23Hinaot unta nga maghatag siya kanato ug kalipay ug kalinaw dinhi sa Israel hangtod sa kahangtoran.

24Hinaot unta nga padayonon niya ang iyang kaluoy kanato ug luwason kita sa panahon sa atong pagpanginahanglan.

Tulo ka Nasod nga Gidumtan

25Adunay duha ka nasod nga akong gidumtan ug adunay ikatulo nga dili gani angay nga hisgotan.

26Kini mao ang mga taga-Edom, ang mga nagpuyo sa mga siyudad sa Filistia ug ang mga buangbuang nga mga Samaryanhon.

Ang Kaalam ni Jesus nga Anak ni Sirac

27Ako si Jesus, anak ni Sirac ug apo ni Eleazar sa Jerusalem, nagbutang sa tanan kong kaalam pinaagi sa pagsulat niining basahona aron paghatag ug mga pagtulon-an ug kahibalo ngadto sa uban.

28Hinaot unta nga ang Dios manalangin sa tanan nga magpatalinghog niining mga pagtulun-ana. Bisan kinsa ang modawat niini sa kinasingkasing gayod mahimo nga maalamon.

29Bisan kinsa nga magkinabuhi niini makabaton ug igong kabaskog alang sa bisan unsang higayon tungod kay maglakaw man siya diha sa kahayag sa Ginoo.