Sirac 44 - Cebuano Meaning-Based Bible

Ang Himaya sa Dios diha sa Kasaysayan

1Busa daygon ta karon ang mga tawo nga diosnon

ug ang atong mga katigulangan sa nangagi nga mga kaliwatan,

2mga tawo nga gipasidunggan pag-ayo sa Ginoo.

Diha kanila nakita ang iyang kahalangdon sukad sa sinugdanan.

3Adunay uban nga nagmando ug mga gingharian,

ug gibantog sa ilang kusog.

Ang uban maalamon nga mga magtatambag,

ug ang uban nagsultig mga propesiya.

4Adunay mga pangulo sa mga nasod nga nagdumala sa mga lungsod subay sa ilang mga pamaagi,

mga magmamando nga nagpakanaog ug mga balaod,

mga maalamong tawo nga nagsultig maalamon nga mga pulong,

ug sila nga migamit ug lalom nga mga sanglitanan,

5mga magbabalak ug mga tigtagik ug mga honi,

6mga adunahan ug gamhanang mga tawo nga nagpuyo nga malinawon diha sa ilang mga panimalay.

7Kini silang tanan nangabantog sa ilang kaugalingong mga panahon,

gipasidunggan sa katawhan sa ilang panahon.

8May mga tawo nga nagbilin ug kabantog

ug ang mga tawo nagdayeg pa kanila hangtod karong mga adlawa.

9Adunay uban nga wala handoma

sama nga wala gayod sila matawo niining kalibotana,

ug nangamatay ug hingpit nga hikalimtan,

sila ug ang ilang mga anak sunod kanila.

10Apan daygon ta kining diosnon nga mga tawo,

kansang matarong nga mga binuhatan wala gayod hikalimti.

11Ang ilang kabantog magpadayon ngadto sa ilang mga kaliwat,

ug mao kini ang ilang mapanunod.

12Ang ilang mga kaliwat magpadayon sa pag-amping sa kasabotan

ug sa kanunay maghimo niini tungod sa gihimo sa ilang mga katigulangan.

13Ang laray sa ilang banay magpadayon hangtod sa hangtod,

ug ang ilang kabantog dili gayod makalimtan.

14Ang ilang mga lawas gibutang sa lubnganan,

apan ang ilang kabantog magpadayon hangtod sa kahangtoran.

15Ang mga nasod mag-asoy mahitungod sa kaalam niining mga tawhana,

ug ang katawhan sa Dios magdayeg kanila.

Si Enoc

16SiGen. 5:24; Heb. 11:5; Jud. 14. Enoc nakapahimuot sa Ginoo ug gibayaw siya ngadto sa kahitas-an. Nahimo siyang usa ka panag-ingnan sa paghinulsol alang sa tanang panahon nga umaabot.

Si Noe

17SiGen. 6:9–9:17. Noe maoy usa ka tawong hingpit nga matarong. Human moabot ang lunop, gihatagan niya ang tawo ug usa ka bag-ong sinugdanan. Tungod kaniya adunay mga tawo nga nahibilin sa kalibotan human sa lunop.

18Ang Ginoo naghimog walay kataposang kasabotan uban kaniya ug nagsaad nga ang kinabuhi dili na gayod laglagon pag-usab pinaagi sa lunop.

Si Abraham

19SiGen. 15:1–17:27; 22:1-18. Abraham mao ang bantogang amahan sa daghang mga nasod; walay sama kabantog kaniya.

20Nag-amping siya sa Balaod sa Labing Halangdon ug naghimo siyag usa ka kasabotan uban kaniya, usa ka kasabotan nga ang timaan anaa sa iyang lawas. Sa diha nga siya gisulayan nakaplagan siya nga matinumanon.

21Busa ang Ginoo naghimo ngadto kaniya ug usa ka panumpa nga ang iyang mga kaliwat mahimong usa ka panalangin alang sa kalibotan, nga ang ilang gidaghanon dili maihap sama sa mga balas, nga sila pasidunggan labaw pa kay sa ubang katawhan sa kalibotan ug nga ang ilang yuta moabot gikan sa dagat ngadto sa laing dagat, gikan sa Eufrates ngadto sa kinatumyan sa kalibotan.

Si Isaac ug si Jacob

22-23AngGen. 17:19; 26:3-5; 27:28; 28:14. Ginoo nagbag-o niadtong kasabotan uban kang Isaac ug unya giusab uban kang Jacob. Gibag-o ang saad nga ang mga kaliwat ni Abraham mahimong panalangin alang sa tanang katawhan. Ang Ginoo mipasalig kang Jacob nga panalanginan siya; gihatagan siya sa yuta nga mapanunod ug gibahin kini sa 12, usa alang sa matag usa ka banay.