1 Macabeo 16 - Cebuano Meaning-Based Bible

1Si Juan nga anak ni Simon mibiya sa Geser ug miadto aron pagtaho sa iyang amahan unsa ang nahimo ni Cendebeo.

2Miingon si Simon kang Juan ug kang Judas, ang iyang duha ka kinamagulangan nga mga anak, “Ang tibuok nga banay sa akong amahan, ang akong mga igsoong lalaki ug ako nakaaway sa mga gubat sa Israel sa tibuok namong kinabuhi ug sa makadaghan nagmalampuson kami sa pagluwas sa Israel.

3Tigulang na karon ako apan kamo, salamat sa Dios, anaa sa kinahingkoran sa kinabuhi. Kinahanglan kamong mopuli kanako ug sa akong mga igsoon diha sa pagpakig-away alang sa atong nasod. Ug hinaot unta nga ang Dios mismo mag-uban kaninyo.”

4Unya nagtigom si Juan ug 20,000 ka Israelitang sundalong naglakaw ug mga sundalong nagkabayo ug nanggula sila batok kang Cendebeo. Nagpagabii sila didto sa Modin

5ug unya sayo sa pagkabuntag miirog sila ngadto sa patag. Didtoy usa ka dakong pundok sa kasundalohan nga naglakaw ug nagkabayo nga milihok aron pagsugat kanila apan may usa ka sapa taliwala sa duha ka pundok sa kasundalohan.

6Si Juan ug ang iyang kasundalohan mipahimutang sa ilang kaugalingon atbang sa mga kaaway apan sa pagkakita ni Juan nga ang iyang mga sundalo nangahadlok sa pagtabok sa suba, mitabok siya pag-una kanila ug ang iyang mga tawo nakakita kaniya ug misunod sila.

7Gibahin ni Juan ang iyang kasundalohan ug gibutang ang iyang mga sakop nga nagkabayo taliwala sa mga naglakaw tungod kay dako ang gidaghanon sa mga nagkabayo sa kaaway.

8Mitingog ang mga trumpeta sa pag-ataki ug si Cendebeo ug ang iyang kasundalohan napildi ug daghan kanila ang napatay. Ang nanghibilin nanagan balik sa ilang mga kota sa Kidron.

9Si Judas nasamaran sa gubat apan ang iyang igsoon nga si Juan mipadayon sa paggukod sa kaaway hangtod sa Kidron nga gibag-o pagtukod ni Cendebeo.

10Ang miikyas nga mga sundalo nanagan ngadto sa mga bantayan didto sa mga patag sa Asdod ug gisunog ni Juan ang siyudad. Niadtong adlawa, 2,000 ka sundalong kaaway ang napatay ug si Juan mibalik nga walay kabilinggan ngadto sa Judea.

Ang Pagpatay kang Simon ug sa Duha Niya ka Anak nga Lalaki

11Si Simon, ang Pangulong Pari, mitudlo kang Tolomeo nga anak ni Abubo nga magmamando sa Patag sa Jerico. Si Tolomeo dato kaayo

12tungod kay bayaw man siya ni Simon.

13Apan ambisyoso ra siya kaayo ug buot siya nga mopuli sa pagmando sa nasod. Busa naghimo siya ug usa ka laraw sa pagpatay kang Simon ug sa iyang mga anak nga lalaki.

14Si Simon, kuyog sa iyang mga anak nga si Matatias ug si Judas, miduaw sa mga lungsod niadtong mga dapita aron pag-atiman sa ilang mga panginahanglan. Nahiabot sila sa Jerico sa bulan sa Sebat, ang ika-11 nga bulan sa tuig 177.

15Si Tolomeo, nga nagpadayon sa paglaraw pagpatay kang Simon ug sa iyang duha ka anak, midawat kanila didto sa usa ka gamay nga kota nga gihinganlag Dok nga iyang gitukod. Naghatag siya ug usa ka dakong kombira alang kanila apan nagbutang siya ug mga lalaki nga iyang gipatago sulod sa kota.

16Sa diha nga si Simon ug ang iyang mga anak nangahubog na, migula si Tolomeo ug ang iyang mga tawo gikan sa ilang gitagoan ug, binitbit ang mga espada, mihasmag sila sa hawanan sa kombira diin gipatay nila si Simon, ang iyang duha ka anak ug pipila ka mga sulugoon.

17Pinaagi niining makalilisang nga buhat sa budhi, gibaslan ni Tolomeo ug daotan ang maayo.

18Unya si Tolomeo misulat ug usa ka taho sa iyang nabuhat ug gipadala kini ngadto sa hari. Didto sa sulat naghangyo siya nga ipadala ang mga tropa aron pagtabang kaniya ug nga ang nasod ug ang mga siyudad itahan ngadto kaniya.

19Naghimo siya ug usa ka sulat ngadto sa mga opisyal sa kasundalohan nga nagdapit kanila sa pagtipon kaniya ug gisaaran sila ug mga plata, bulawan ug mga gasa. Unya nagpadala siya ug pipila sa iyang mga tawo ngadto sa Geser aron pagpatay kang Juan

20ug sa uban aron pagpanag-iya sa Jerusalem ug sa bungtod sa Templo.

21Apan may usa ka tawo nga midagan ngadto sa Geser nga nag-una sa mga tawo ni Tolomeo ug mitaho kang Juan nga ang iyang amahan ug ang iyang mga igsoon gipatay ug nga si Tolomeo nagpadala sa iyang mga sundalo aron pagpatay kaniya.

22Nalisang si Juan niining balitaa apan tungod kay gipasidan-an man siya pag-una, nakahimo siya pagdakop ug pagpatay sa mga tawo nga gipadala aron pagpatay kaniya.

23Karon ang ubang nahimo ni Juan gikan sa panahon nga mipuli siya sa iyang amahan: ang iyang mga gubat, ang iyang buhat sa kaisog, ang iyang pagtukod pag-usab sa mga paril ug ang iyang uban nga mga nahimo,

24ang tanan gisulat diha sa mga kasaysayan sa iyang pagmando ingon nga Pangulong Pari.